Login to your account

Username *
Password *
Remember Me

Gil Oan Soru ‘Metin’ iha Governu, 'Taur Mak Líder'

Observadór Polítika husi Universidade Nasionál Timor Lorosa'e (UNTL), Camilo Ximenes de Almeida. Observadór Polítika husi Universidade Nasionál Timor Lorosa'e (UNTL), Camilo Ximenes de Almeida. Foto Tempo Timor

Tempotimor (Díli)-Observadór Polítika husi Universidade Nasionál Timor Lorosa'e (UNTL), Camilo Ximenes de Almeida hatete, Primeiru Ministru (PM), Taur Matan Ruak, mak dehan líder lolos, tanba envolve Vise Prezidente Partidu CNRT, Gil da Costa Monteiro ‘Oan Soru’, ne'ebé sei metin iha estrutura Governu daualu.

“Ha'u hanoin nu'udar Primeiru Ministru parese difísil ba nia atu hasai tanba Oan Soru ne'ebé derepente mai tama iha CNRT mais pesoál ida ne'ebé mak parese Taur Matan Ruak koñese durante 24 anos e aumezmu tempu iha nia Governasaun, ne'ebé ha'u hanoin ida ne'e mak dehan líder”, dehan Camilo ba www.tempotimor.com iha Kampus Fakuldade Siénsia Sosiál, Kaikoli, kuarta (23/02).

Ba Primeiru Ministru (PM), Taur Matan Ruak, difísil atu hasai Sekretáriu Estadu Antigu Kombatente Libertasaun Nasionál (SEAKLN), Gil da Costa Monteiro ‘Oan Soru’ husi Governu, tanba durante ne'e nia asume kna’ar Sekretária Estadu nia kontribuisaun maka'as tebes.

“Líder ne'e labele eskolla de'it partidu iha ema ne'ebé mak iha ita-nia partidu bele fó posibilidade ba sira seluk mak kontinua maibé importante mak kontinua programa Governu nian ida ne'e ha'u hanoin buat ida hanaran take and give ne'e kerdizer ke ohin mak CNRT maibé se mak hatene maibé loron ruma nia partidu seluk tanba polítika ne'e dinámika”, afirma nia.

Tanba durante nia kaer pasta hanesan SEAKLN konsege halo mudansa boot ba insitituisaun Veteranu no poupa osan Veteranu nian no resolve dadus balu ne’ebé sai problema.

“La'ós haree de'it ba nia luta durante 24 anos maibé nia ema ida ne'ebé iha kapasidade bele halo mudansa iha instituisaun veteranu ne'e mak importante ita-boot sira haree durante tinan rua nia konsege poupa kada Veteranu nia osan subvensaun kada fulan $30 dolar e tinan rua ona ne'e hira mak iha banku?. Se Veteranu sira simu tomak hira mak sira gasta no hela hira”, esplika nia.

Nu'udar observadór polítika dehan Sekretária Estadu Oan Soru ne'e liu fali mak ema ne'ebé iha títulu akadémika, tanba nia konsege halo mudansa iha Sekretáriu Estadu liliu iha Veteranu nian.

Alende nia sai Vise Prezidente ba Partidu Kongresu Nasionál Rekonstrusaun Timorense (CNRT) sei la fó impaktu ba tanba nia serbisu iha SEAKLN la'ós reprezenta CNRT maibé indivídu.

“Ha'u hanoin ita lalika obriga nia sai husi CNRT tenke hasai nia maibé konforme nia se nia hakarak kontinua ha'u hanoin ne'e filafali ba nia, ha'u hanoin ba oin sei la fó impaktu ba CNRT tanba durante ninia serbisu nia la'ós reprezenta CNRT maibé nia reprezenta indivídu ne'ebé mak kaer pasta ida ne'e no nia no nia luta ema ida ne'ebé dedikasaun tomak hahú iha invazaun durante 24 anos iha ai laran ne'e ha'u hanoin nia laiha dúvida ba ida ne'ebé maibé importante mak líder ida no Sekretária Estadu ida ne'ebé mak halo mudansa buat importante ida ne'ebé bele fó kontribuisaun ba nasaun”, deklara nia.

Tanba iha loron 11 fulan-maiu 2020, Partidu CNRT ne’ebé envolve-an iha Governu Aliansa Maioria Parlamentar (AMP) lidera husi Primeiru Ministru (PM), Taur Matan Ruak ofisialmente deklara sai ona husi Governu daualu.

Tuir deklarasaun ne’ebé fó sai husi Diresaun Partidu CNRT, ne’ebé lidera husi Kay Rala Xanana Gusmão katak, membru Governu sira husi Partidu CNRT retira hotu husi Governu daualu.

Primeiru Adjuntu Sekretáriu Jerál partidu CNRT, Jacinto Rigoberto katak, liuhusi reuniaun membru Konsellu Nasionál Polítika (CPN) ofesliamente deside sai husi Governu daualu ne'ebé lidera husi PM Taur.

“Atu deklara publikamente katak CNRT nu'udar partidu retira-an publikamente husi VIII Governu atuál”, dehan Jacinto Rigoberto iha sede partidu CNRT, Bairo dos Grilhos, segunda (11/05/2020).

Iha momentu ne’ebá Segundu Vise Prezidente Partidu CNRT, Virgilio Smith hatete, deklarasaun sai husi Governu daualu PM simu ona karta.

“CNRT nu'udar partidu retira husi VIII Governu, ne'ebé karta ida ne'e haruka ona ba PM. Karta ne'ebé mak deklara partidu CNRT politikamente ka legalmente retira-an husi VIII Governu, ne'ebé membru sira livre eskolla", Virgilio dehan.

Desizaun ne’ebé foti husi Partidu CNRT atu dada sira-nia Membru ne’ebé envolve iha Governu daualu hanesan Hermenegildo Pereira asume kargu Ministru Prezidénsia Konsellu Ministru (MPKM); Dionísio Babo Soares asume kargu Ministru Negósiu Estranjéiru no Kooperasaun (MNEK); Sara Lobo Brites asume kargu Vise Ministra Finansas; Dulce de Jesus Soares asume kargu Ministra Edukasaun, Juventude no Desportu (MEJD); José Abilio Caetano asume kargu Vise Ministru Administrasaun Estatal; Arsenio Pereira asume kargu Sekretáriu Estadu Kooperativa (SEKooP); Teofilho Caldas asume kargu Sekretáriu Estadu Arte no Kultura (SEAK); Nelio Isaac Sarmento asume kargu Sekretáriu Estadu Juventude; no Gil da Costa Monteiro "Oan Soru" asume kargu Sekretáriu Estadu ba Asuntu Kombatente Libertasaun Nasionál (SEAKLN), inklu Ministru Defeza, Filomeno da Paixão de Jesus atu sai husi Governu daualu.

Maibé membru Governu daualu na’in-haat ne’ebé la obedese ba desizaun Partidu hodi kontinua envolve iha Governu daualu mak hanesan Ministru Defeza, Filomeno da Paixão de Jesus; Vise-Ministra Finansas, Sara Lobo Brites; Sekretáriu Estadu Arte no Kultura, Teófilo Caldas; no Sekretáriu Estadu ba Asuntus Kombatentes Libertasaun Nasionál, Gil da Costa Monteiro 'Oan Soru', kontra desizaun partidu hodi kontinua envolve-an iha Governasaun.

Tanba ne’e, Partidu CNRT mós foti desizaun hodi hasai Sekretáriu Estadu Arte no Kultura, Teófilo Caldas husi Estrutura Partidu CNRT nian hanesan koordenadór Munisípiu Dili, maibé tauk hasai Gil da Costa Monteiro ‘Oan Soru’ husi Partidu CNRT no ikus Konfresista sira deside hodi promove ba Vise Prezidente Partidu hodi troka Ma’huno Bulere Karatayano, maske la sai husi Governu daualu.

Maske desizaun husi Partidu CNRT rasik fó sai atu dada sira-nia membru ne’ebé envolve iha Governu daualu, maibé Primeiru Ministru (PM), Taur Matan Ruak, rasik seidauk deside hasai membru Governu husi CNRT ida iha estrutura Governu daualu inklui mós partidu sira seluk. (*)

Rate this item
(1 Vote)
Last modified on Friday, 01 April 2022 18:15
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2022 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks

Online Counter