Prezidente CNE, José Agostinho da Costa Belo hatete, prosesu paktu unidade ne'ebé realiza liuhusi seremónia kultural timor nian kada Munisípiu, sei aprezenta rezultadu iha nasionál antes asina plaka.

"Ohin ita halo ne'e, ba moris nian, isin di'ak kampañia karik ho kondisaun ne'ebé di'ak, fuan malirin laran malirin, objetivu halo ida ne'e, la'os atu fahe malu, maibé hamutuk liután, eleisaun ne'e loron ida de'it, Prezidente mós ba tinan 5, ba timor oan ne'e tinan ba tinan, tanba ne'e ita halo kuandu iha situasaun ita la'o," dehan José, iha salaun apuramentu Baukau, kuarta (23/02).

Prezidente Autoridade Munisípiu Baukau, Olivio Freitas hatete, paktu unidade atu fó matak malirin ba ema hotu iha kampaña Eleisaun Prezidensiál nian, atu kandidatu sira respeita malu iha palku polítika, labele insulta malu, kritika malu no atake malu.

"Manu ne'e fó ba heroi sira, bibi timor ida ne'e, ha'u komprende katak, ne'e ba matebian sira mak haree, se sira uluk ho sira nia vida tomak hodi liberta rai Timor-Leste, ita tenke dignifika," PAM hatete

Tanba ne'e, lia-na'in husi Postu Administrativu Baukau Vila, Baguai, Laga, Kelikai, Venilale no Vemase ho lia no hanoin ida hakarak atu eleisaun Prezidensiál susesu.

Enkuantu seremonia paktu unidade ne’e, CNE Baukau konvida hotu reprezentante kandidatu Prezidente Repúblika period 2022-2027 nian iha Munisípiu Baukau, maibé reprezentante kandidatu na'in-4 de'it mak partisipa.

Kandidatu na'in-4 ne'ebé partisipa iha seremónia paktu mak, reprezentante kandidatu Partidu CNRT, Khunto, PD no Fretilin. (*)