Prezidente Institutu Defeza Direitu Kriansa (INDDICA), Dinorah Granadeiro hatete, Partidu polítika sira asegura katak durante períodu mobilizasaun masa sei la mobiliza labaraik sira iha tempu kampaña no sei hetan kontrolu maka'as ba foinsa'e sira atu evita risku ba violénsia.

“Envolvimentu labarik nia iha kampaña eleisaun prezidensiál tinan ida ne'e, kontinua sai vítima durante períodu kampaña, tanba menus koñesimentu públiku kona-ba direitu labarik nia partisipasaun polítika ba konsiénsia eleitorál kona-ba atetude demokrátiku sei nafatin sai inpedementu ba prosesu hari’i paz no estabilidade durante iha períodu eleisaun”, dehan Dinorah iha salaun MSSI, (24/02).

Tanba ne’e, husu ba ekipa organizasaun husi kandidatu no partidu polítiku sira hodi kria mekanizmu ida atu labele husik labarik tama iha área kampaña polítika nian no halo komunikasaun baze hodi informa ba komunidade lokál kona-ba bandu partisipasaun labarik nian.

Responsavél Rede Advokasia Diretu Labarik, Marceira Pereira hatete, INDDICA) ho Rede Advokasia Diretu Labarik bandu família liliu ina aman utiliza sira labarik sira fa’an sasan iha tempu kampaña eleisaun prezidensiál.

“Inan-Aman no mahein haburas nafatin sentimentu respeitu ba malu, no labele fahe labarik sira-nia amizade, tanba diferensa polítika husi família sira, membru rede advokasia informa, ba inan-aman sira la bele utiliza labarik sira ba fa'an iha tempu kampaña eleisaun prezidensiál, hodi promove partisipa labarik iha prosesu aprendisajen iha kampaña”, dehan nia.

Tanba ne’e, profesór mantein kompromisu atu labele abandona labarik sira iha tempu kampaña, no labele fó lisensa ba alunu sira atu ba partisipa kampaña durante prosesu aprendizajen (ho esesaun husi estudante ne’ebé eleitór tiha ona tinan 17 tiha ona).

“Dirijente eskola no Profesór sira asegura kontinuasaun husi prosesu aprendizajen durante tempu kampaña no rejistu infrasaun dixiplinár ba profesór ne’ebé la marka prezensa”, haktenik nia.

Rede advokasia ho parseiru hotu Sosiedade sivíl no Konfisaun Relijiozu sira Igreja nian apoiu nafatin fahe informasaun kona-ba direitu labarik no bandu partisipasaun durante tempu kampaña.

Ho ida ne’e, bele fó sai informasaun liuhusi liturjia ba sarani sira misa iha tempu, durante períodu kampaña hodi labele envolve labarik iha prosesu kampaña nian laran. (*)