Tuir informasaun ne’ebé www.tempotimor.com, asesu iha pájina Mídia TIC TIMOR, kuarta (23/08/2023) katak, formasaun ne’e ho objetivu atu fasilita funsionáriu Indica ne’ebé sei responsabiliza ba portal refere hodi halo públikasaun kona-ba informasaun atividade Indica nian ho profisionál, Seguru no Efisiente.

Iha formasaun ne’e Diretór Diresaun Dezenvolvimentu Sistema Informasaun no Aplikasaun (DDSIA) TIC TIMOR I.P, Justo Fernandes hatete, servisu tékniku ne'ebé TIC fó sei kontinua fó asistensia bainhira iha failansu ruma ne'ebé Indica hasoru iha parte tékniku nian.

“Apoiu formasaun ne’e la’ós ikus ba apoiu ne’ebé TIC fó maibé sei iha kontinuasaun, TIC TIMOR hanesan ajénsia teknolojia ida ne’ebé prontu fó asisténsia tekníka bainhira INDDICA presiza”, dehan Diretór Justo.

Tanba, TIC TIMOR kria ona sistema lubun ba Instituisaun Estadu sira hodi hafasil servisu ne'ebé ho kualidade di’ak.

“Alende halo manutensaun ba portal ne’e tanba TIC TIMOR iha sentru dadus ne’ebé governu investe ona sistema hamutuk 142 iha ne’eba ita kobre ona 57 instituisaun governu”, informa nia.

Iha fatin hanesan Prezidente INDDICA, Dinorah Granadeiro hato'o ninia gratidaun ba Ajénsia TIC TIMOR tanba bele hetan oportunidade ba formasaun ne'ebé bele fasilita sira hodi hala'o servisu.

“Ha'u hato'o agradese wain ba TIC TIMOR ne’ebé mak simu ona ami-nia pedidu hanesan instituisaun foun ne’ebé mak estabelese iha 2021 bazeia ba dekretu lei númeru 04/ 27 janeiru”, informa nia.

Nia hatete, INDDICA hanesan instituisaun ida ne’ebé mak ho papél importante ida liuliu iha parte avokasia nian, mídia hanesan meius importante ida ne’ebé mak INDDICA iha hanesan mós matadalan ida hodi halo publikasaun, halo avokasia liga ho asuntu labarik iha Timor-Leste.

Tanba ne’e, INDDICA apresia tebes ba TIC nia servisu ba formasaun ne’ebé iha funsionáriu sira bele iha koñesimentu klean hodi utiliza portal hodi halo publikasaun ba atividade sira.

Ba formasaun refere fó husi formadór diresaun dezenvolvimentu sistema informasaun no aplikasaun (DDSIA). Bainira remata formasaun ne'e Ajénsia TIC mós sei atribui sertifikadu apresiasaun ba formandu sira. (*)