Tuir informasaun ne’ebé www.tempotimor.com, asesu iha pájina TIC TIMOR, kina (31/08/2023) katak, iha serimónia atribui sertifikadu ne’e Sekreáaria Ezekutiva Inddica, Tereza Freitas lori Prezidente Inddica nia naran hato’o apresiasaun ba estrutura Ajénsia TIC TIMOR nomós ba formadór sira tanba fó ona tempu hodi fahe informasaun kona-ba portal nian.
“Lori prezidente nia naran hato’o agradesimentu ba TIC liliu ba formadór sira, ho website portal Inddica nian ne’ebé sei lansa iha tempu badak liga ba asuntu labarik nian oinsá atubele fó protesaun ba labarik sira no oinsá fahe informasaun ne’ebé pozitivu liga ba direitu tomak ne’ebé deskre ona iha konvensaun tomak”, informa nia.
Nia mós aumenta, materia sira ne'ebé hetan husi TIC TIMOR ne'e sai hanesan matadalan ida hodi ba oin sira bele dezenvolve liután informasaun kona-ba atividade Inddica nian ho di’ak liután.
“Ami espera kolega ne’ebé hetan ona informasaun sai hanesan baze ida ne’ebé iha tempu tuir mai sira mak sei dezenvolve informasaun sira ba iha portal ne’e rasik nune’e iha tempu badak sei lansa ho lema ida katak, lori informasaun labarik Timor-Leste ba mundu”, afirma nia.
Bainhira remata formasaun sira ne’e formandu sira bele fahe fali informasaun sira ne’e ba sira ne’ebé la tuir atu nune’e informasaun sira ne’ebé ligadu ba sensibilizasaun ka sosializasaun kona-ba papál Inddica nian karik iha ema balun ne’ebé la hatene informasaun bele liu direta ba Website Inddica ne’ebé iha tempu badak sei lansa.
Parte Inddica mós husu ba oin TIC no Inddica nafatin halo kooperasaun servisu, karik iha buat balun ne’ebé la entende, sira nafatin husu apoíu antes sira fó sai informasaun atividade Inddcia nian ba públiku.
Iha fatin hanesan, Diretór Diresaun Dezenvolvimentu Sistema Informasaun no Aplikasaun (DDSIA -TIMOR I.P), Justo Fernandes, mós hato'o apresiasaun ba formandu sira ne’ebé iha kompromisiu hodi tuir formasaun ne’e to’o remata maske ida ne’e la’ós ikus husi formasaun refere.
Tanba, TIC TIMOR prontu fó apoiu tekníka bainhira hetan difikuldade tanba buat ne’ebé relasiona ho teknolojia loron haat la sufisiente.
Diretór DDSIA ne'e mós informa ba formandu sira katak, dalaruma Ema hanoin katak portal ne'e fasil hodi utiliza maibé bainhira utiliza ona difisil tebes tamba iha informasaun barak ne'ebé ita presija hatene.
“Portal bainhira ita haree husi oin furak no fasil maibé bainhira ita tama ba laran iha buat barak ne’ebé ita presiza aprende klean liután hodi divulga informasaun sira ho di’ak tanba portal sai hanesan odamatan ba Instituisaun nian ba liur, karik iha atividade ruma ne’ebé ema atu hatene kona-ba papel no responsabilidade sira sei vizita pájina portal ne’e hodi hatene informasaun”, dehan Diretór ne'e.
Diretór mós fiar katak Portal ne'ebé TIC dezenvolve bele kobre ona informasaun sira ne’ebé Inddica hala’o no liuhusi ida ne’e atu fasilita Inddica bele atualiza ba públika informasaun ne’ebé pertinente ba labarik sira, Inddica sei uza mediadór ida ne'e ho di’ak. (*)