PR Horta konsidera eventu ne’ebé Embaixada Indonézia hala’o iha mundu tomak inklui Timor-Leste la’o ho ambiente paz bele hametin unidade ba foin sa’e sira atu hakotu violensia promove dame, tolerensia no kultura ba mundu.

“Ha’u hanoin konserte muzika no kultura kalan ida ne’e rame tebes, ne’e hanesan eventu ne’ebé Indonézia halo iha propinsia hotu, parese iha Timor-Leste mak rame liu, tanba ohin kalan imi foin sa’e rihun mai hamutuk iha ne’e ho Avo Nana rame loos, tanba ne’e ha’u agradese ba Embaixador Okto Dorinus Manik ho nia ekipa tomak lori artisia husi sorin mai anima ita iha kalan ne’e,” informa PR Horta liu husi deskursu.

Iha fatin hanesan, PM Xanana dehan konsente amizade ida ne’e hatudu ba mundu katak, Timor-Leste no Indonézia hakat makas tebes hodi konsolidade unidade no fó oportunidade ba governu Timor-Leste no Indonézia servisu makas ajuda malu iha área hothotu.

“Ha’u kontente tanba sa? tanba, Indonézia no Timor-Leste hatudu ba mundu katak, tempu iha kotuk ne’ebé hotu ona, agora ita hare ba oin hodi fó razaun duni ba prezidente no atan ha’u atu komesa servisu ho Timoroan sira ne’ebé sei iha rai sorin para bele fila fali mai hela ho ita ho dame. Ohin kalan ne’e hatudu ho sira nain rua ne’ebé mai kanta ne’e halo ita hotu mai partisipa ho fuan no laran, ha’u admira no kontente tebes, tanba imi iha ne’e ho familia mós kontente, ha’u hakuak imi hotu ho domin,” PM agradese.

Entretantu, Embaixadór Indonézia ba Timor Leste, Okto Dorinus Manik, orgullu ba eventu tinan ne’e reme tebes ho povu Timor-Leste nia vontade hodi partisipa.

Iha mós, Artista Indonézia, Toton Caribo no Justy Aldrin sente orgullu bele mai anima povu ho artisa Timoroan sira.

“Ami orgullu bele mai Timor, hasoru PM Xanana no PR Horta ho povu sira haree direita ambiente iha ne’e amizade tebes,” dehan Tonton Caribo

Artista Toton Caribo no Justy Aldrin hatutan, muzika favoritu tema, Bale Pulang, Pergi Dan Jangan Kembali no muzika seluk ne’ebé sira hananu Timoroan barak hatene, tanba iha muzika ida tema “Se Dimana” sira konta uza mós lian tetun atu promove mós lian tetun iha Nusa Tenggara Timor (NTT).

Durante konserte muzika, lider nasionál ne’e tun direita anima foin sa’e no labarik sira hodi dansa no tebe hamutuk no konserte ne’e hetan seguransa masimu husi Komandu PNTL. (*)