Prezidente Repúblika Populár Xina, Xi Jinping agradese no parebeniza Primeiru Ministru Xanana no Prezidente Repúblika, José Ramos-Horta ne’ebé kontinua hetan fiar husi povu Timor-Leste hodi kaer hikas ukun ba tinan lima.

Prezidente Xi Jinping konsidera vizita PM Xanana ne’e sei hametin liután lasu kooperasaun bilaterál entre rai rua estabelese durante ne’e.

“Benvindo Primeiru-Ministru Xanana ne’ebé hetan filafali fiar husi povu hodi ka’er hikas ukun. Ba oin Xina nafatin iha kooperasaun di’ak atu apoiu nafatin Timor-Leste”, dehan PR Xina Xi Jimping.

Xefe Estadu fó garante katak, Xina sei apoia nafatin governu Timor-Leste hodi avansa ba dezenvolvimentu ida ne’ebé prosperu no moris iha dame nia laran.

Entretantu Primeiru Ministru, Kay Rala Xanana Gusmão agradese Estadu Xina ne’ebé dezde tempu rezisténsia to’o independénsia apoia prosesu kontrusaun estadu no nasaun Timor-Leste.

“Xina la’ós primeira vez hatene kona-ba independénsia Timor -Leste nian, Señor Prezidente, maibé Xina sempre apoiu boot Timor-Leste durante iha situasaun ne’ebé difísil iha funu naruk nian, ida-ne’e importante tebes, depois manán tiha funu, primeiru estabelese kooperasaun diplomátiku difísil tebes, tanba funu foin remata iha tinan 24, maibé atu informa katak, Xina sempre iha ami-nia fuan no agradese mòs ba oportunidade ida-ne’e señor prezidente”, dehan PM Xanana durante enkontru bilaterál ho PR Xi Jinping iha sidade Hangzhou Repúblika Popular Xina.

PM Xanana hatete, interesante teb-tebes hasoru Xefe Estadu Xina hodi troka opiniaun kona-ba relasaun bilaterál nomós kona-ba kestaun nasionál no regionál ne’ebé sai interese komum.

Nune’e PM Xanana fó lembra katak, iha tinan 2014 nia hasoru Prezidente Xi Jinping hodi asina akordu kooperasaun rai rua nu’udar momentu ne’ebé sai meius importante ba amizade entre nasaun rua.

“Dezde ita assina parseria bilaterál iha tinan 2014, ne’ebe abranje amizade, ita iha viziñu di’ak no relasaun bilaterál haklean. Timor -Leste kontinua apoia programa “Bealt and Road” hanesan inisiativa di’ak liu atu responde ba nesesidade infraestrutuas iha ita-nia rejiaun”, haktenik PM Xanana.

Timor-Leste asume hela atu hametin liután relasaun bilaterál ba parseira estratéjika ida ne’ebé mak luan liu. Timor-Leste mós hein katak, sei aumenta kooperasaun iha área oi-oin hodi permite atu kontribui ba estabilidade no dezenvolvimentu regionál no global.

Ho enkontru ne’e, Timor- Leste hein ho esperansa atu asina planu kooperasaun entre Governu Repúblika Popular Xina no Governu-RDTL kona-ba promosaun konjunta ba inisiativa “Bealt and Raoad” hodi hametin no promove kooperasaun ida ne’ebe mak kualidade aas liu.

Tanba akordu kooperasaun ne’e foka ba área haat mak hanesan, revitalizasaun industria, dezenvolvimentu infraestrutura, autosufisiénsia alimentar no hadi’ak meiu susbsisténsia.

Parte seluk, Timor-Leste agradese mós ba Xina ninia apoiu durante pandemia COVID oferese aimoruk vasina Sinovak no ekipamentu hodi tulun povu Timor-Leste luta hasoru moras ne’e. (*)