“Maromak no bei ala sira, tulun ami ba, labele halakon de’it rán, no ruin povu-nian, sira ne’ebé terus tebese ba rai ne’e. Maromak tulun ami ba atu serbi rai ne’e ho di’ak hodi fó onra ba sira-nia sakrifisiu”, dehan PM Xanana iha ninia diskursu iha Igreja Parókia Imakulada Conceição, Balide, Dili, kuarta (30/08/2023).

Misa agradesimentu ne’e partisipa direita hosi membru IX Governu Konstitisionál hamutuk ho sarani no funsionáriu sira hotu hodi agradese ba Na’I Maromak no eroi tomak nia luta ba rai ne’e.

“Ita agradese ba Na’I Maromak ba loron di’ak ida-ne’e ita hanoin hikas tinan hirak ba kotuk, ita-nia povu ho korajen ho brani tebes bele hasoru problema, dezafiu, mate, terus, ba vota duni hodi ita hetan ukun-an”, hatete nia.

Xefe Governu konsidera misa agradesimentu ne’e nu’udar grasa ida hodi hanoin hikas povu nia konfiansa vota iha 30 Agostu 1999, no foin lalais Maiu 2023, povu fó fiar atu ukun ho konfiansa no responsabilidade bo’ot atu servi nasaun ho domin no defende povu nia interese liu buat hotu- hotu.

“Povu hili ita ukun-an ona, foin lalais iha Maiu 2023, povu hili tan ita atu mai ukun kaer povu nia mehi. No fó hikas povu nia mehi ba sira, responsabilidade boot tebes ba ita, agora nu’udar membru governu, deputadu, deputada labele sente dehan ita ema boot hotu ona, tenke sente ita hetan kna’ar ida husi Na’I maromak atu halo saida de’it mak ita bele, no tenke sai servidór di’ak”, dehan PM.

Ho matawen Líder Rezisténsia ne’e jura ba Na’I Maromak no matebian sira hotu katak, iha tinan 2024 mai n’e, governu sei halo nafatin misa agradesimentu ba Na’I Maromak no povu tomak.

“Tinan seluk ita sei mai iha-ne’e atu agradese. Agradese karik, ita halo buat di’’ak ruma ho maromak nia tulun, husu deskulpa karik ita loko-an tanba ita sai boot tiha ona, haluha tiha ita-nia kna’ar ne’ebé povu fó. Amu tinan seluk 30 Augustu 2024, ami sei mai iha-ne’e husu ba Maromak no povu atu perdua ani-nia sala, atu ami bele hala’o ami-nia kna’ar ho di’ak, umildade, transparánsia no ho domin ba rai no povu ida-ne’e”, deklara PM Xanana.

Nia hatutan, ba konfiansa ne’ebé povu hili la’ós priviléjiu maibé ne’e hanesan konfiansa ida ne’ebé kada membru IX Governu Konstitusionál tenke lori ho responsabilidade no domin.

Iha fatin hanesan Padre Selebrante Misa, Àngelo Salsinha dehan misa agradesimentu ne’e importante hodi hato’o agradese ba Na’I Maromak ba buat hotu ne’ebé Maromak halo no tulun povu iha tempu aat no di’ak sira.

Nia husu ba ukun aan orgaun estadu nian tomak, kaer ukun tenke halo buat di’ak ne’ebé promete ona ba povu tenki halo tuir, hodi nune’e povu bele tau konfiansa tomak ba ukun nain sira.

Hafoin misa, PM Xanana ho membru governu, Na’I luluk sira no sarani lori mós ai-funan no lilin ba tau iha rate boot Santa Kruz no sunu lilin no reza hodi presta omenajen rate Saudozu Jornalista Maxthal no eroi sira hotu iha Timor-Leste. (*)