Liuhusi Konferénsia Partidu CNRT deside Gil da Costa ‘Oan Soru’ asume kargu hanesan Vise Prezidente Partidu, iha loron 23 fulan-janeiru 2022, Salau Oka, Osindo, Dili ba períodu 2022-2027, hodi troka matebian saudozu Ma’huno Bulerek Karatayano ne’ebé husi hela mundu.

Iha loron 11 fulan-maiu 2020, Partidu CNRT ne’ebé envolve-an iha Governu Aliansa Maioria Parlamentar (AM) lidera husi Primeiru Ministru (PM), Taur Matan Ruak ofisialmente deklara sai no retira membru iha Governu daualu.

Tanba ne’e, Partidu CNRT husik todan ba Primeiru Minsitru, Taur Matan Ruak (TMR) atu deside hodi hasai membru Governu daualu ne’ebé mai husi Partidu CNRT.

Deputadu CNRT iha Parlamentu Nasionál (PN), Domingos de Carvalho hatete, kona-ba Vise Prezidente Partidu, CNRT Gil Monteiro ‘Oan Soru’ ne'ebé okupa hela kargu Sekretáriu Estadu ba Asuntu Antigu Kombatente Libertasaun Nasionál no Veteranu, iha Governu daualu ida ne'e depende ba Primeiru Ministru (PM), Taur Matan Ruak, atu hasai desizaun ikus kona-ba ezonerasaun.

“Ne'ebé kompeténsia Primeiru Ministru, atu hakarak hasai yeah hasai, tanba Oan Soru mós foin dadauk sai membru estrutura partidu CNRT iha nivél nasionál ninian, hanesan primeiru vise prezidente tuir kedas Maun Boot Xanana, ne'ebé kompeténsia iha Primeiru Ministru”, dehan nia ba www.tempotimor.com iha Plenária Parlamentu Nasionál, tersa (22/02).

Maibé CNRT hakarak dehan de'it katak Sekretáriu Estadu ba Asuntu Antigu Kombatente Libertasaun Nasionál no Veteranu, Gil da Costa Monteiro “Oan Soru”, sei iha Governu ida ne'e nia laran tanba foin dadauk mak nia retoma ninia pozisaun hodi taka Primeiru Vise Prezidente partidu CNRT, Saudozu Mahuno Bulerek Karatyanao ne'ebé mak fila hikas ona mundu seluk.

“Entaun nia iha ne'ebá atu substitui de'it ida ne'e maibé desizaun ida ikus atu hasai ka la hasai ne'e kompeténsia Governu nian”, dehan nia.

Tanba ne'e, se karik primeiru ministru hakarak Kompaneru Gil Oan Soru mantein bele mantein nafatin, maibé nu’udar bankada CNRT sei mantein sai opozisaun ba Governu.

“Mais ami iha Parlamentu, iha Governu, ami ne'e opozisaun, ami la submete ba desizaun ruma ke Governu ninian ne'e, kuandu ami haree ba loos ami apoiu, e kuandu ida laloos nian ne'e ami krítika”, dehan nia.

Kona-ba koligasaun Aliansa Mudansa ba Progressu (AMP) ne'ebé uluk forma husi partidu CNRT, PLP ho KHUNTO hodi forma Governu, ida ne'e CNRT retira ona tanba ho orsamentu ne'ebé sumba iha PN.

Ho ida ne'e, CNRT agora dadauk sai hanesan opozisaun iha parlamentu maibé opozisaun ida ho konstrutivu atu hadi'a la'ós atu destroi la'e.

Ba kestaun ne’e, Vise Xefe Bankada CNRT, Patricino Fernandes, konsidera Sekretáriu Estadu Antigu Kombatente no Veteranu (SEAKV), Gil Monteiro da Costa Monteiro ‘Oan Soru’ laiha relasaun ho orden ne'ebé partidu CNRT hasai iha tinan 2020 hodi retira husi Governu daualu.

“Ha'u hanoin ne'e laiha relasaun ho deklarasaun sira ne'ebé iha 2020 kuandu diresaun partidu nian orienta ba kuadru partidu sira atu retira husi Governu hanesan membru Governu”, hatete Patrocino ba www.tempotimor.com iha Parlamentu Nasionál (PN), kuarta (23/02).

Tanba iha momentu ne'ebé partidu CNRT deklara retira husi Governu, ida ne'e nu’udar orden ida ba kuadru partidu CNRT de'it mak atu retira husi Governu.

Hanesan públiku no média sira hatene iha momentu ne'eba ne'e atual Sekretáriu Estadu Veteranu Gil Oan Soru, nia seidauk sai hanesan kuadru partidu CNRT nian, nia hanesan militante hanesan simpatizante ida babain, ho ida ne'e nia laiha obrigasaun atu kumpre ba orden ne'ebé mak hasai husi diresaun partidu CNRT.

“Nia foin mak konferénsia eleze nia iha dia 23 de janeiru liubá kotuk mak foin konferénsia eleze nia nu’udar Vise Prezidente iha partidu CNRT, ne'ebé ha'u hanoin ne'e laiha relasaun ho deklarasaun sira ne'ebé iha 2020 kuandu diresaun partidu nian orienta ba kuadru partidu sira para atu retira husi Governu hanesan membru Governu”, hatete nia.

Bankada CNRT mos haree katak espíritu Governu nian la'ós de'it atu hateke malu dehan tenke sai husi ida ne'e, no tenke sai husi ida ne'ebá, maibé hothotu oinsá mak atu aposta ba interese nasionál.

Maibé, karik Oan Soru ba ona Vise Prezidente Partidu CNRT mak lakon ona konfiansa husi Governu ida ne'e karik, ne'e kompeténsia Governu nian.

Tanba, moralmente partidu CNRT laiha obrigasaun atu hatete dehan Oan Soru ema CNRT ona tenke hasai nia husi ne'ebá, maibé ne'e filafali ba kompeténsia Primeiru Ministru nian atu deside.

Pozisaun CNRT mós fiar no hein katak Primeiru Ministru, karik nia iha moral, entaun nia difísil halo persegisaun ida polítikamente ba partidu CNRT, tanba Governu ida ne'e, nu’udar produtu CNRT nian.

Tanba iha momentu ne'eba, se la hodi Partidu CNRT karik ohin loron Primeiru Ministru mós la hetan kargu ida hanesan Primeiru Ministru no oitavu Governu mós laiha.

Ho ida ne'e, maka CNRT haee katak governu ida ne'e nu’udar produtu partidu CNRT nian, maibé tanba partidu CNRT haree katak presiza liu atu aposta ba interese nasionál katak Governu ida ne'e labele duni atu atende, no hala'o ninia kna’ar tuir programa ho promesa sira ne'ebé ba halo iha kamapaña, no Governu ne'ebé iha de'it intensaun mak atu sobu sistema sira tanba ne'e mak partidu CNRT retira husi governasaun ida ne'e.

Tuir deklarasaun ne’ebé fó sai husi Diresaun Partidu CNRT, ne’ebé lidera husi Kay Rala Xanana Gusmão katak, membru Governu sira husi Partidu CNRT retira hotu husi Governu daualu.

Tanba ne’e, Primeiru Adjuntu Sekretáriu Jerál partidu CNRT, Jacinto Rigoberto informa, liuhusi reuniaun membru Konsellu Nasionál Polítika (CPN) ofesliamente deside sai husi Governu daualu ne'ebé lidera husi PM Taur.

“Atu deklara publikamente katak CNRT nu'udar partidu retira-an publikamente husi VIII Governu atuál”, dehan Jacinto Rigoberto iha sede partidu CNRT, Bairo dos Grilhos, segunda (11/05/2020).

 Iha deklarasaun ne'e mós husu ba partidu nia ema ne'ebé partsipa iha Governu daualu atu rejigna-an.

“Atu rekomenda ba hothotu ne'ebé mak iha juñu 2018 ne'ebé mak partidu mak indizita hodi simu pose no hola parte iha Governu atuál atu rejigna-an ho livre vontade", nia dehan. 

 CNRT mós fó liberdade ba membru sira ne'ebé envolve iha Taur Matan Ruak nia Governu bele pesoalmente halo desizaun tuir individu ida-idak nia hanoin.

“Atu permite liberdade eskolla ba se-se de'it ne'ebé ho razaun nu'udar pesoál hakarak hela nafatin iha atuál Governu maibé lakon kedas lasus polítiku ho partidu CNRT, hodi nune'e nia ka sira la reprezenta partidu iha nia ka sira-nia desizaun ne'ebé sira deside liuhusi Governu nian," deklara nia.

Desizaun sai husi Governu daualu ne'e hetan aprovasaun pur unanimidade husi membru Komisaun Polítika Nasionál iha sede CNRT loron 30 abril 2020.

Iha momentu ne’ebá Segundu Vise Prezidente Partidu CNRT, Virgilio Smith hatete, deklarasaun sai husi Governu daualu PM simu ona karta.

“CNRT nu'udar partidu retira husi VIII Governu, ne'ebé karta ida ne'e haruka ona ba PM. Karta ne'ebé mak deklara partidu CNRT politikamente ka legalmente retira-an husi VIII Governu, ne'ebé membru sira livre eskolla", Virgilio dehan.

Desizaun ne’ebé foti husi Partidu CNRT atu dada sira-nia Membru ne’ebé envolve iha Governu daualu hanesan Hermenegildo Pereira asume kargu Ministru Prezidénsia Konsellu Ministru (MPKM); Dionísio Babo Soares asume kargu Ministru Negósiu Estranjéiru no Kooperasaun (MNEK); Sara Lobo Brites asume kargu Vise Ministra Finansas; Dulce de Jesus Soares asume kargu Ministra Edukasaun, Juventude no Desportu (MEJD); José Abilio Caetano asume kargu Vise Ministru Administrasaun Estatal; Arsenio Pereira asume kargu Sekretáriu Estadu Kooperativa (SEKooP); Teofilho Caldas asume kargu Sekretáriu Estadu Arte no Kultura (SEAK); Nelio Isaac Sarmento asume kargu Sekretáriu Estadu Juventude; no Gil da Costa Monteiro "Oan Soru" asume kargu Sekretáriu Estadu ba Asuntu Kombatente Libertasaun Nasionál (SEAKLN), inklu Ministru Defeza, Filomeno da Paixão de Jesus atu sai husi Governu daualu.

Maibé membru Governu daualu na’in-haat ne’ebé la obedese ba desizaun Partidu hodi kontinua envolve iha Governu daualu mak hanesan Ministru Defeza, Filomeno da Paixão de Jesus; Vise-Ministra Finansas, Sara Lobo Brites; Sekretáriu Estadu Arte no Kultura, Teófilo Caldas; no Sekretáriu Estadu ba Asuntus Kombatentes Libertasaun Nasionál, Gil da Costa Monteiro 'Oan Soru', kontra desizaun partidu hodi kontinua envolve-an iha Governasaun.

Tanba ne’e, Partidu CNRT mós foti desizaun hodi hasai Sekretáriu Estadu Arte no Kultura, Teófilo Caldas husi Estrutura Partidu CNRT nian hanesan koordenadór Postu Administrativu Na'in-Feto, Munisípiu Dili, maibé tauk hasai Gil da Costa Monteiro ‘Oan Soru’ husi Partidu CNRT no ikus Konfresista sira deside hodi promove ba Vise Prezidente Partidu hodi troka Ma’huno Bulere Karatayano, maske la sai husi Governu daualu.

Maske desizaun husi Partidu CNRT rasik fó sai atu dada sira-nia membru ne’ebé envolve iha Governu daualu, maibé Primeiru Ministru (PM), Taur Matan Ruak, rasik seidauk deside hasai membru Governu husi CNRT ida iha estrutura Governu daualu inklui mós partidu sira seluk. (*)