Makse Partidu opozisaun la hola parte, maibé Parlamentu Nasionál (PN) kontinu ajenda debate hodi altera lei númeru 19 ho 21 RAEOA-ZEESM no ikus mai hetan aprovasaun ho votus a favor 34, abstensaun 0, no kontra 0.
Ho alterasaun ne'e signifika katak PN hasai ona kompetensia Prezidente Repúblika hodi nomeia no fó pose ba kandidatu Prezidente Autoridade RAEO-ZEEsM. Kompetisaun ida ne'e atribui fali ba governu.
Tuir Lei RAEO-ZEESM anterior, governu mak propoin kandidatu Prezidente Autoridade RAEO-ZEESM ba Prezidente Repúblika hafoin PR deside no fó pose. Maibé ho alterasaun ne'e governu mak sei buka, hili, no fo pose rasik.
Ba asaun walkout husi partidu opozisaun, Deputadu husi Bankada PLP Cornelio Gama "L-7" hato'o ninia lamentasaun.
Deputadu ne'e konsidera asaun husi deputadu Bankada FRETILIN no PD hatudu katak sira nega ona saudozu rihun ba rihun ne'ebé sakrifika an ba rai no povu ida ne'e.
"Ohin opozisaun abandona parlamentu, ita (deputadu) 65 (atu) ko'alia kona-ba povu, ko'alia kona-ba progresu dezenvolvimentu, iha ne'e ita haree Fretilin abandona plenária. Depois mak dehan Fretilin ne'e hanesan ne'e no hanesan ne'ebá, di'ak liu muda tiha Fretilin, ha'u lakohi ko'alia tan Fretilin", dehan deputadu L-7 iha plenária PN, Segunda (08/07/2019).
"Se ita ko'alia kona-ba estadu, Fretilin hatene katak ema rihun atus rua nia mate ne'e nega tiha ona ohin loron ida ne'e, ne'e ha'u hatete loloos."
Nia mòs la konkorda deputadu sira abandona parlamentu, tanba parlamentu mak kaer estadu, no dezenvolvimentu nasional.
"Iha parlamentu nasional ne'e, ita neenolu resin lima ne'e labele falta, ida ne'e ha'u la konkorda, tanba ne'e nasaun nian. Ita kaer nasaun ne'e, parlamentu mak ko'alia kona-ba projetu dezenvolvimentu nian", dehan deputadu bankada PLP ne'e.
Deputadu ne'e subliña, bankada Fretilin abandona plenária ne'e kontra Konstitusaun RDTL artigu 10.
"Ne'e la'os halimar, ne'e ema rihun atus rua mak mate, mak ita mai tuur iha ne'e, se lakohi mai di'ak liu sai ona. Mai respeita ita nia nasaun, respeita ita nia povu, respeita ita nia dezenvolvimentu."
