Atu kapasita jornalista timoroan sira, Asosiasaun Jornalista Timor Leste (AJTL) no Komité Internasional Kruz Vermella (ICRC) fo formasaun kona-ba kobertura iha fatin konflitu sira.

Tuir membru Konsellu Imprensa (CI), Francisco Belo Simões hateten, jornalista Timor ladun halo kobertura iha situasaun funu hanesan nasaun post konflitu sira seluk, maibé nu'udar jornalista presiza aprende atu sai hanesan bukae.

"La sala ita aprende saida mak ita bele aprende, liu-liu oinsa bele hetan esperiénsia husi péritu sira husi Indonézia kona-ba jornalista halo kobertura iha área sira konflitu ka funu", dehan nia, iha Hotel JL Vila, Sesta (5/7).

Nia hatutan, jornalista Timor hola parte iha konflitu oituan, hanesan krize polítika no militar iha 2006 maibé jornalista sira la hetan risku.

"Esperiénsia sira hanesan ne'e nu'udar valór ida. Para iha tempu ruma kuandu iha konflitu jornalista hatene ona prosesu kobertura", nia Francisco.

 Entretantu, Prezidente AJTL, David Hugo hateten, programa sira ne'e atu kapasita jornalista sira para bele sai profisional liután bainhira kobertura iha konflitu nia laran.

 Alende ne'e, péritu husi média Kompas, Josie Susilo Hardianto dehan, jornalista ne'e halo kobertura iha área konflitu tenke hatene oinsa atu lori dame ba ema iha área konflitu ne'e rasik.

"Jornalista oinsa mak halo promosaun para oinsa konflitu ne'e bele hotu lalais. Tanba ne'e, jornalista la'os de'it ko'alia kona-ba akontesimentu ka konflitu ne'e, maibé oinsa mak jornalista ajuda hodi harii pás iha fatin konflitu ne'e rasik", tenik nia.

Iha fatin hanesan, reprezentante ICRC, João Martins dehan, husi semináriu ne'e oinsa atu kapasita no kontribui koñesimentu ba jornalista sira bainhira halo kobertura iha tempu funu.

Importante husi semináriu ne'e mak oinsa atu hasa'e sira (jornalista) nia koñesimentu liu-liu iha sira-nia direitu no lei bainhira sira halo kobertura tempu konflitu ka funu.