Prezidente Komisaun Nasional Eleisaun (CNE) Alcino de Araujo Baris informa asuntu ne'e liu husi workshop ho tema Kolokiu Nasionál ba Subvensaun Partidu Polítiku Asentu Parlamentar, ne'ebé hala'o iha edifisiu CNE.

Prezidente CNE ne'e dehan, orsamentu subvensaun públiku ba partidu polítiku sira ne'e kada tinan aloka husi Orsamentu Jeral Estadu (OJE) hamutuk milaun $6, ne'ebé fahe ba partidu polítiku sira bazeia ba kadeira ne'ebé sira iha.

"Milaun $6 ne'e sei fahe fali ba partidu sira bazeia ba kadeira sira ne'ebé iha, tanba kada kadeira ida hetan $92.000 itál, purtantu ida ne'ebé hetan kadeira barak liu, nia mak hetan barak liu”, dehan Alcino, Kinta (27/06).

Alcino dehan, orsamentu subvensaun ne'e kada tinan sempre aloka ba partidu politiku sira hodi uza ba sira-nia interese, no CNE halo akompañamentu no auditoria.

Nia hatutan, lei fó mós kompetensia ba CNE atu bele kontrola partidu polítiku sira hodi labele hetan osan illegal.

“Lei fó mós kbiit ba CNE atu tau matan mós ba prtidu polítiku sira atu labele hetan ona ke illegal, hanesan mai fali husi fontes ne'ebé kontra lei, hanesan mai husi estrajeiru, osan sira destinadu tiha ona ba kofisaun relijiozu, ba ona defisiente sira, tanba ne'e fontes orsamentu ba partidu polítika sira tenke legal husi estadu”, dehan prezidente CNE ne'e.

Prezidente CNE ne'e konfirma, to'o agora CNE seidauk hetan partidu polítiku ne'ebé hetan osan husi fontes illegal ka kontra lei.