PM Taur dehan, estadu sei esforsu atu apoiu seguransa ba jornalista sira hodi kontinua halao sira-nia atividade.
"Ita-boot sira hatene, horseik mós Parlamentu Nasionál (PN) levanta katak tau-matan mós ba imi jornalista sira, estadu mós sei prepara hodi apoiu seguransa ba imi jornalista sira, entaun ha'u mós apelu ba imi nia xefe média sira tau-matan mós ba imi-nia seguransa, sira labele haruka imi sein seguransa ida, ne'e importante," dehan PM Taur Matan Ruak ba jornalista sira iha Palásiu Prezidensiál bairro-pite, Sesta (27/03/2020).
PM Taur dehan nia aseita ho levantamentu PN nian kona-ba seguransa jornalista sira nian durante estadu emerjénsia.
"Ha'u mós aseita ho preokupasaun PN ninian kona-ba imi jornalista sira, liu-liu ba importansia ne'ebé reprezenta ita-nia nasaun, ita-nia demokrásia iha momentu defisíl hanesan ne'e, agora ha'u mós apelu ida ba imi jornalista sira, situasaun ida hanesan ne'e, imi tenke kontribui halo serenidade par ema kalma, labele tau sensaziovik ka sensasionál ne'e halo ema pániku, dizorientadu hodi hamosu fali problema, ida ne'e de'it mak ha'u husu," dehan PM.
Entretantu deputadu sira iha PN mós husu governu atu tau atensaun ba jornalista sira liu-liu parte seguransa ba saúde nian, tanba jornalista mak hamriik uluk iha liña dahuluk hodi hasoru corona virus.
"Iha estadu emerjénsia ne'e parte saúde, defeze no seguransa, inklui mós ita-nia media sira, média sira ne'e mak ita atu ko'alia didi'ak karik sira mak hamriik iha primeira liña, mate primeiru mak sira, tanba ita atu hatene corona virus ne'e média sira fó sai mak ita foin hatene, tanba ne'e ita oresiza dignifika mós ita nia jornalista sira," dehan deputadu Khunto Luis Roberto iha plenária PN kinta horseik.