Deputadu António Verdial ne'ebe ninia Partidu KHUNTO mos tama iha governu Koligasaun Alianca Mudanca ba Progresu (AMP), hato'o kestaun ne'e hafoin halo kontaktu eleitoral iha area rural ne'ebé karreta labele asesu.

"Ha'u kuandu halo kontatu eleitoral ba suku sira ne'e kareta labele tama ba, ha'u para kareta depois la'o ba durante oras tolu ka haat nia laran, no ha'u haree nesesidade bázika ne'ebé povu infrenta hanesan estrada, bee-moos, eletrisidade, eskola no mós sira-nia hela fatin la seguru", dehan deputadu António iha ima Parlamentu Nasionál, Segunda (08/07/2019).

Bazeia ba nia esperensia ne'e, nia husu ba membru governu sira atu banati tuir.

"Hanesan deputadu husu ba governu atu labele tuur de'it iha kadeira manas (kursi panas), se bele sira mós tuun ba iha terenu atu bele identifika objetivu ne'ebé povu uza iha eskola fatin", dehan Verdial.

Nia komenta, durante halo kontatu eleitoral ba komunidade sira iha área izoladu sira, povu informa katak governante la ba suku sira ne'ebé izoladu ka remotas liu.

"Ha'u la'o ba área rural, sira hatetn katak membru governu sira la ba duni iha ne'ebá, hanesan suku Asumanu ne'ebé ohin ha'u temi to'o oras ne'e eletrisidade seida'uk iha. Ne'ebé reprezenta povu ha'u tuun ba terenu fila mai hakilar iha ne'e, par ajuda governu hodi governu bele ba haree depois halo i tenke halo, la'os la halo," dehan nia.

Deputadu ne'e dehan buat ne'ebé povu presiza mak infraestrutura bazika sira ne'e atu fasilita povu hodi bele sente ukun aan ida ne'e.