Tuir informasaun ne’ebé www.tempotimor.com asesu iha pájina MF, loron kuarta (12/04) katak, iha proposta Lei GOP 2024 kontempla valór despeza globál Setór Públiku Administrativu ho montante billlaun $1,7; Seguransa Sosiál millaun $291,9; no RAEOA millaun $81,1. Totál despeza globál ba proposta OJE 2024 mak billaun $2,07-iha redusaun 1% kompara ho totál OJE 2023.
Proposta Lei ne’e inklui medidas prinsipál konjuntu hamutuk 124 medidas tantu anuál no plurianual, organizadu iha área estratéjiku 16 ne’ebé Governu sei foku ba iha 2024.
Kompara ho Lei GOP 2023, iha proposta Lei GOP 2024 Governu halo redusaun siknifikativu ba medidas prinsipál husi 275 medidas tun ba 124 medida-iha redusaun 151 medida ka 45%. Ida-ne’e akontese tambá Governu halo rasionalizasaun.
Área estratéjiku 16 ne’e inklui: Konektividade Nasionál; Edukasaun no Formasaun; Saúde; Dezenvolvimentu Territoriál no Abitasaun; Agrikultura, Peskas no Floresta; Ekonomia no Empregu; Petróleu no Minerais; Eletrisidade no Enerjia Renovável; Inkluzaun no Protesaun Sosiál; Bee no Saneamentu; Turizmu; Ambiente; Kultura no Patrimóniu; Reforma Estadu; Defeza no Seguransa Nasionál; Relasaun Internasionál no Polítika Esterna.
Antes ne’e mós Konsellu Ministru aprova ona projetu Proposta Lei das Grandes Opções do Plano 2024 ne’ebé mak aprezenta husi Ministru Finansas, Rui Gomes.
Entretantu Ministériu Finansas mós realiza ona Jornada Planeamentu iha ne’ebé Membru Governu hamutuk ho responsável Entidades Estadu 109 diskute ona senáriu fiskál, opsaun tetu orsamentál ba 2024 inklui halo ona apresiasaun ba medidas prinsipál ne’ebé mak kontempla ona iha Proposta Lei GOP 2024.
PPL GOP 2024 ne’e mós inklui ona rekomendasaun sira husi Konsultasaun Sidadania ne’ebé mak Ministériu Finansas hamutuk ho Liñas Ministeriais relevante hanesan Edukasaun, Saúde, Obras Públikas, BTL, EDTL, Agrikultura no Turizmu halo ona ho parte interesada sira hanesan Xefe Sucos, reprezentante Veteranu, Juventude no lider relijiozu, no involve ema besik rihun 300 iha Munisípiu Aileu, Ainaro, Bobonaro, Ermera, Lautem no Vikeke. (*)
