Bankada 6 iha PN Apoiu Estadu Emerjénsia

Plenaria Parlamentu Nasional Plenaria Parlamentu Nasional Foto File

Tempotimor (Dili)-Bankada neen iha Parlamentu Nasionál (PN) fó apoiu tomak ba estadu emerjensia ba teritóriu Timor Leste tomak hodi funu hasoru Corona Virus Deasses 2019 (Covid-19).

Prezidente bankada FRETILIN Aniceto Longuinhos Guterres deklara, FRETILIN apoiu no a favór ba pedidu ne'ebé PR husu ba PN atu aprova no autoriza estadu emerjénsia

"Bankada FRETILIN fó nia apoiu tomak ba médida ne'ebé Prezidente Repúblika (PR) husu atu deklara estasu emerjénsia, tanba ohin loron iha nasaun boot ne'ebé ekonomia maka'as, maibé sira foti médida estadu emerjénsia ka lockdown. Maibé iha ita-nia nasaun iha ema balun ne'ebé hanoin katak situasaun ne'e seidauk sériu nune'e seidauk bele tama ba estadu emerjénsia, maibé ita tenke kuidadu," dehan Aniceto.

Prezidente Bankada ne'e mós husu ba publiku atu hamutuk ho governu hodi luta kontra pandemia Covid-19.

"Iha situasaun ida ne'e ami hakarak bolu ita hotu nia atensaun katak, mai ita hamutuk hodi luta kontra pandemia Covid-19. Tanba ne'e, husu ba forsa polítika iha timor laran tomak atu tau ba kotuk interese partidária no seluk tan, hodi luta kontra pandemia ne'e," nia afirma

Iha fatin hanesan, prezidente bankada CNRT Duarte Nunes mós konkorda ho estadu emerjénsia.

"Ha'u konkorda ho señor PM no deputadu Aniceto, tanba iha situasaun emerjénsia ida ne'e, ita presiza esforsu hamutuk hodi luta kontra pandemia Covid-19. Tanba situasaun ne'ebé ita hasoru, ita hotu hatene ita iha kazu ida ne'ebé pozitivu ona kona-ba Covid-19," dehan Duarte.

Prezidente bankada PLP Francisco Vasconcelhos dehan, estadu Timor Leste nia preokupasaun ne'e importante tebes.

"Estadu Timor Leste nia preokupasaun ne'e importante tebes, tanba ne'e mak ita konsidera katak médida prevensaun ne'e importante tebes, tanba inimigu ida ne'e real. Nune'e PLP nia perspetiva katak presiza ita hotu nia kontribuisaun," dehan Vaskoncelhos

Entretantu, deputada Olinda Guteres mós deklara katak, bankada KHUNTO apoiu totál  ba pedidu emerjénsia ne'ebé PR husu PN atu aprova.

"Ami KHUNTO mós fó apoiu tomak ba pedidu ne'ebé mai husi PR ne'e, tanba di'ak liu ba ita-nia povu mak oinsa ita ho halo prevensaun."

Prezidente bankada PD António da Conceição mós apresia no apoiu ba governu atu halo nia serbisu hodi kontra pandemia Covid-19.

"Ohin Timor-Leste tenke hasoru pandemia ida ne'e, TL mós ohin tenke hasoru funu ida ne'e, entaun ita tenke lian ida hodi funu hasoru funu ne'e, ba povu Timor-Leste nia di'ak," dehan Kalohan.

Iha fatin hanesan Prezidente bankada UDT/FM Francisco de Jesus fó nia apoiu tomak ba pedidu emerjénsia.

"Corona virus hatudu mai ita katak ita tenke hamutuk hodi hasoru situasaun hotu-hotu, tanba ne'e ba Timor-Leste ninia di'ak ami bankada UDT/FM apoiu tomak."

Prezidente bankada PUDD António de Sa Benevides mós apoiu ba pedidu emerjénsia ne'ebé mai husi PR atu PN aprova.

"PUDD hakarak agradese ba governu liu husi ministériu saúde, tanba durante ne'e halo esforsu maka'as hodi kontinua servisu ba kombate pandemia ne'e, tanba ne'e bankada PUDD husu ba públiku tomak atu apoiu ba governu hodi hala'o ninia servisu," dehan António.

Rate this item
(0 votes)
Last modified on Thursday, 26 March 2020 11:56
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com