Tempotimor (Dili) – Bankada FRETILIN iha Parlamentu Nasionál (PN) husu ba bankada Governu atu labele 'show force' ba proposta lei atividade petrolífeiru no lei fundu petrolífeiru ne'ebé hetan veto husi Prezidente Repúblika. Tanba, tuir bankada oposizaun ne'e, buat ida mak inkonstituisionalidade kontinua inkonstituisionalidade.

"Se ita hakarak show of power ne'e ita la'o. Maibé, ita la muda buat ida. Ida inkonstituisionalidade kontinua inkonstituisionalidade. Tanba la tuir buat ne'ebé mak tribunál hatudu nia konsekuénsia mak diploma ne'e sei la hetan promulgasaun," deklara Prezidente Bankada FRETILIN, Aniceto Guterres Lopes iha plenária PN, Tersa (08/10/19).

FRETILIN husu ba bankada Governu, atu halo reformulasaun ba diploma rua ne'ebé hetan julga husi Tribunál Rekursu no inkonstituisionalidade.

"Husu ba bankada Governu, mai ita hamutuk halo reformulasaun ba diploma sira ne'e, hanesan obrigasaun konstituisionál atu kumpri Konstituisaun RDTL no desizaun tribunal, nu'udar desizaun aas liu iha estadu Timor-Leste," dehan Aniceto Guterres.

Hatán ba deklarasaun ne'e, Prezidente Bankada CNRT Duarte Nunes katak, bankada Governu iha ona kondisaun ba halo reformulasaun ba diploma lei atividade petrolífeiru no lei fundu petrolífeiru.

Iha fatin hanesan, Bankada Partidu Libertasauan Povu (PLP), Maria Angelina Sarmento katak PLP prontu halo apresiasaun ba artigu ne'ebé mak ein kestaun.

"PLP Laiha objetivu show force. Maibé, oinsá mak show force be with dezenvolvimentu ba povu ida ne'e, atu lori dezenvolvimentu ne'ebé di'ak no sustentavel," dehan Maria.

Tempotimor (Dili) – Tuir eis Prezidente Rejiaun Administrativu Espesiál Oe-Cusse Ambeno no Zona Espesiál Ekonomia Sosiál Merkadu (RAEOA-ZEESM), Mari Alkatiri nia previzaun, LUGU sei ukun RAEOA-ZEESM tinan ida de'it.

"Ha'u la komenta ba ida ne'e. Imi hein de'it mak rona rezultadu. Tinan ida de'it. Tinan ida de'it. Hein tinan ida," dehan Mari Alkatiri iha Centro Convenções Dili (CCD), Kinta (07/11/19).

Iha sorin seluk, kandidatu forte ba Prezidente RAEOA-ZEESM, José Luis Guterres (LUGU) hatán katak, hein rezultadu mak sei haree.

"Hein mak ita haree. Ha'u lakohi mai gava iha ita boot sira nia oin. Ha'u bele hala'o hanesan ne'e. Ita hein. Ha'u hakarak imi akompaña nafatin, krítiku nafatin. Ha'u lakohi ema matenek ka oinsá. Ha'u hakarak rezultadu konkretu," dehan LUGU.

Nia mós husu públiku atu haree povu Oe-Cusse nia moris durante iha nia lideransa.

Tempotimor (Dili) - Planu Ministeriu Finansas sei aprezenta senáriu Orsamentu Jerál Estadu (OJE) 2020 oin rua ba Konsellu Ministru, iha 17 Jullu 2019. 

Tempotimor (Dili) – Estadu Timor-Leste ohin iha ona governu dawalu no gasta ona fundu minarai hamutuk bilaun sanolu resin haat (14). Maibé, infraestrutura bázika ba povu kontinua hakdasak.

Tempotimor (Dili) – Parlamentu Nasional (PN), Tersa (24/09/19) fó votus pezar ba Saudozu Padre João de Deus Pires, SDB ne'ebé fila ona ba Aman Maromak di Kadunan Santo iha Domingo (22/09/19) iha Hospitál Nasionál Guidu Valadares (HNGV), Dili.

Votus pezar husi Parlamentu Nasionál ba Saudozu Padre João de Deus Pires, SDB ne'e, liuhosi deklarasaun kada bankada ne'ebé hato'o sira-nia boa viajen ba Saudozu Padre João de Deus Pires, SDB no fó sentidu kondolénsia ba familia igreja Katólika, inklui familia boot Salezianu.

Iha prestasaun lideres bankada sira ne'e, Xefe bankada Partidu Uniaun Dezenvolvimentu Demokrátika (PUDD),  António de Sá Benevides hato'o ninia obrigadu ba Saudozu Padre João de Deus Pires, SDB ne'ebé durante ne'e sai motivadór ba sarani sira igreja Katólika iha Timor-Leste.

Votus pezar ne'ebé Parlamentu Nasional oferese ba Pe. João de Deus Pires ne'e ho rezultadu votasaun a favór 45 kontra no abstensaun zero.

Tempotimor (Dili) – José Luis Guterres ‘LUGU’ simu pose husi Preimeriu Ministru Taur Matan Ruak nu'udar Prezidente Autoridade Rejiaun Administrativa Oe-Cusse Ambeno no Zona Espesiál Ekonomia Sosiál  Merkadu (RAEOA-ZEESM), Kuarta (13/11/19) iha Palásiu Governu.

Hafoin simu pose, Prezidente RAEOA-ZEESM foun ne'e deklara katak RAEOA-ZEESM la'ós  ba partidu ida nian mesak. Maibé, ba povu Oe-Cusse hotu no ba nasaun Timor-Leste.

"Dezenvolvimentu RAEOA-ZEEMS, la'ós partidu ida rua nian. Maibé, ne'e importante ba nasaun Timor-Leste no ba povu Oe-Cusse tomak," José Luis deklara.

LUGU afirma, nia sei hamutuk ho Governu sentrál hodi investe dezenvolvimentu ba rai Oe-Cusse. Tanba, investimentu husi rai liur no rai laran mak foin bele kria empregu no kria rendimentu ba estadu.

Prezidente RAEOA ne'e hatete, dezenvolvimentu presiza mós partisipasaun husi povu. Tanba ne'e, nia parte sei kria enkontru ho povu iha tinan ida dala rua. Ho nune'e, nia dehan, bele simu ideia hotu atu hadi'a dezenvolvimentu iha rai Oe-Cusse.

Rezolve Ró Haksolok

Iha ninia deskursu, LUGU promete sei servisu hamutuk ho Governu sentrál, hodi rezolve Ró Haksolok ne'ebé to'o ohin loron sai preokupasaun públiku.

"Ami sei presiza ita boot Prezidente interinu señor Arsenio Paixão Bano ho administrasaun sesante. Tanba, ita presiza rezolve problema balun. Hanesan Ró Haksolok ne'ebé ohin loron iha hela rai Portugal," hatete LUGU.

Hatán kona-ba preokupasaun ba Ró Haksolok, Ministru Transporte no Komunikasaun (MTK), José Agustino da Silva katak, kona-ba Ró Haksolok, Ministru Prezidensia Konsellu Ministru (MPKM) mak hatene.

"Hanesan na'in hira hatene, asuntu kona-ba Ró Haksolok ne'e exelénsia MPKM mak haree mak asuntu ne'e," dehan José Agustino.

Tempotimor (Dili) -Falta loron de’it Dr. Mari Alkatiri hit ain husi Ambeno no lakon kadeira presidente Zona Especial Ekonomia Merkadu (ZEESM). Inisiativa balun mosu husi bloku Aliansa Mudansa ba Progresu (AMP) relasiona ho pozisaun Prezidente Autoridade Rejiaun Administrativa Espesial Oecussi-Ambeno (RAEOA).

Hanesan publiku hatene, pozisaun Prezidente Autoridade RAEO ne'ebé daudauk ne'e "okupa" husi Mari Alkatiri sei remata iha fulan Juñu ne'e nia rohan.

Ho nune’e, AMP hahú hanoin atu propoin, eis Prezidente da Republika no Primeiru Ministru, Kay Rala Xanana Gusmão hodi okupa kargu Prezidente Autoridade RAEO hafoin mandatu husi Alkatiri remata.

"Ami nia preferensia maka Maun Bo'ot Xanana mak troka Alkatiri, " dehan pesoal prinsipal ida husi partidu ida iha AMP ninia laran, husu Tempotimor labele mensiona ninia naran.

Tuir fonte konfirmadu husi parte AMP ne'ebé koñese prosesu ne'e hatete, razaun AMP nomeia Xanana relasiona mós ho pozisaun Xanana ne'ebé daudauk ne'e nu'udar Reprezenta Espesial Governu Timor Leste ba Asuntu Negosiasaun Fronteira Maritima no Rai-maran.

Bainhira Xanana kaer RAEO, fonte ne'e dehan, sei fó posibilidade di'ak liu atu rezolve kestaun fronteira rai-maran iha Oekusse ho Indonezia no so eis comandante en xefe das FALINTIL ne’e maka iha kbi’it hodi hadi’a liu tan oekusse.

Relasiona ho informasaun ne'e, tempotimor.com halo konfirmasaun ba Primeiru Ministru Taur Matan Ruak.

PM Taur ho koko nega hodi dehan seidauk simu informasaun refere husi bloku AMP. Maske nune'e Taur deklara la kontra inisativa hotu-hotu ne'ebé di'ak hodi kontribui ba dezenvolvimentu Timor Leste.

“Informasaun ha'u seidauk hatene. Imi jornalista sira mak ba foti iha ne'ebé ha'u la hatene, mais inisativu hotu-hotu ne'e di'ak par ajuda dezenvolve Timor ne'e. Ha'u hanesan Primeiru Ministru, ha'u la kontra ho apoiu inisativa hotu-hotu ”, dehan PM Taur iha palásiu Prezidensiál Bairu-Pite, Segunda (10/06/2019).

Bainhira jornalista husu kona-ba karik governu iha ona figura rasik atu troka Alkatiri, PM Taur dala ida tan ho diplomatikamente hatete, governu seidauk iha figura hodi troka Alkatiri iha RAEOA.

Tuir informasaun ne'ebe Tempotimor.com obtein iha tempo badak governu sei hakotu lia iha konsello dos Ministru hodi fo sai lider preferensial hodi troka prezidente ZEESM atual.

Tempotimor (Dili) –  Sekretáriu Estadu Formasaun Profisionál no Empregu (SEFOPE), Julião da Silva katak maske iha peskiza balun ne'ebé hatudu katak dezempregu iha rai laran %11, maibé presiza halo fali Oralia, tanba  dadus la konkretu.

"SEFOPE mós prevé ona Orsamentu Jerál Estadu tinan 2020 mai para halo fali Oralia ida hodi hetan dadus ne'ebé konkretu, para Governu bele halo polítika ida para oinsá kontribui ba redúz númeru dezempregu iha nasaun Timor-Leste," dehan SEFOPE iha Ministériu Finansas, Segunda (07/10/19).

Nia afirma,  dadaun ne'e juventude ne'ebé mak asesu ona ba kampu servisu foin mak %46 resin.

"Sira ne'ebé asesu ona ba servisu aumenta %46 resin. Espera katak oportunidade tuir mai Governu halo polítika ida ne'ebé di'ak no forte. Tanba ne'e, iha VIII Governu iha kompromisiu hodi fó kampu servisu ba joven sira 60.000 kada tinan," tenik Julião.

Nia mós dehan, liuhusi polítika VIII Governu mak iha tinan 2020 Governu sei estabelese sentru formasaun ne'ebé ho estandar internasionál ne'ebé sei akumula juventude sira husi 5.000 to'o 10.000, hodi asesu ba nesesidade indústria ne'ebé iha.

Tempotimor (Díli) – Governu iha ona polítika atu funu hasoru lixu iha Kapitál Díli. Tan ne'e, iha tinan 2020 sei implementa oinsá bele raut lixu uza teknolojia.  

"Polítika Governu nian iha 2020 kona-ba saneamentu raut lixu ne'e, sei fó ba kompañia mak jere. Ne'ebé la'ós ona ho servisu manual. Maibé, ho teknolojia,” hatete Diretór Saneamentu Munisípiu Díli, Domingos dos Santos Soriano iha nia knaar fatin, Tersa (10/09/19).

Tuir Domingos, ho teknolojia ne'e foer ne'ebé komunidade sira hatama hotu ona iha lixu fatin ka plastiku, diretamente fakar kedas ba kareta laran. La'ós hanesan agora, ne'ebé sei aplika manual.

"Polítika ne'ebé  Governu planu hela ne'e, sei implementa iha fulan Juñu 2020. Tan ne'e, agora halo hela tenderizasaun ba kompañia hotu-hotu, tantu kompañia internasionál, nasionál inklui lokál hodi tuir projeitu ne'e," Soriano informa.

Kompañia ne'ebé iha futuru sei halo jestaun ba lixu ne'e, iha kompañia tolu. Nune'e, ida halo ateru ba lixeiru iha Tibar, rua seluk halo sirkulasaun iha Dili laran hodi rekolla lixu. Nune'e, iha inisiu tinan 2020 sei hadia fatin lixu nian iha Díli laran tomak.

Tempotimor (Dili)-Institutu Defeza Nasional (IDN) ne'ebé tutela iha Ministériu Defeza (MD) rezeita sira-nia asesor ne’ebé iha lista ne’ebé governu haruka ba Parlamentu Nasional. Iha lista refere, anunsia katak asesor iha IDN hamutuk na’in 36.

Diretór asuntu Akademiku IDN, Guilherme Soares hatete, IDN durante ne’e hetan duni apoiu husi asesor internasional no nasional maibé nia númeru la barak hanesan fó sai iha lista.

Lista Asesor ne’ebé Kria Konfuzaun ba PN: Governu “Taka Ibun”

"Primeiru atu hatete katak notisia ne'ebé fó sai hodikalan husi média online Tempotimor.com ne'e, iha parágrafu ida ne'ebé ko'alia kona-ba Institutu Defeza Nasionál (IDN) dehan asesór na'in 36, kompostu husi asesór internasional na'in 3 no asesór nasional na'in 33, entaun ami atu konfirma fila fali katak, informasaun ida ne'e la loos," deklara Guilherme Soares ba Tempotimor.com iha nia knaar fatin Kolmera, Sesta (22/11/19).

Diretór ne’e dehan, númeru asesor ne’ebé durante ne’e serbisu iha IDN hamutuk na’in 8, kompostu husi asesor internasional na’in 3 no asesor nasional na’in 5.

"Númeru asesór ne'ebé mak iha IDN tinan 2019, asesór internasional hamutuk na'in 3, asesór nasionál na'in 5. Maibé asesór (internasional) na'in 3 ne'e agora la serbisu tiha ona, tanba sira mai ne'e kuandu ami presiza mak ami bolu, liu-liu hanesan asesór jurídiku sira ne'e, mai halo serbisu fulan ida no rua, fila fali ona," nia esplika.

Nia informa mós katak, total funsionariu ne’ebé serbisu iha IDN hamutuk na’in 30, kompostu husi funsionariu permanente na’in 3 no funsionariu kontratadu na’in 27.

“Entaun totál husi funsionáriu no asesór ne'ebé serbisu iha IDN hamutuk ema na'in 38," deklara nia.

Tuir nia, informasaun ne’ebé Tempotimor fó sai bazeia ba lista ne’ebé hetan halo ema hakfodak tanba hatete katak númeru asesor iha IDN hamutuk na’in 36.

Notisia Relevante: Iha Governu AMP, Ministériu Ida Asesor to’o na’in 192

Guilherme afirma, asesor internasional na’in 3 ne’ebé serbisu iha IDN espesifikamente ba area juridiku. Enkuantu asesor nasionál sira iha area tekniku informasaun no teknolojia (IT), area formasaun, gabinete apoiu administrasaun no asesor ba militar nian.

Bainhira Tempotimor husu kona-ba salariu asesor na’in 8 ne’ebé serbisu iha IDN, Diretór asuntu Akademiku ne’e dehan, kestaun salariu ne’e kompetensia Ministériu Finansas nian hodi klarifika.

Page 1 of 24

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com