“Ha’u vizita Korea, ema ne'ebá disiplina maka’as, serbisu maka’as, transforma sira-nia mental no transforma sira-nia vida, ida ne'e sai ezemplu ida ita bele banati tuir. Maibé sira mós iha moto ida baibain sira uza, toba tarde hader sedu to'o uluk iha serbisu fatin tanba ne'e imi labele haluha”, dehan Taur iha Salaun Ótel Timor Lodge, Komoro, sesta (06/05).

Tanba ne’e, sei taumatan nafatin ba traballadór sira no akompaña traballadór sira-nia serbisu iha ne'ebá.  Nune'e mós agradese tanba família sira bele husik nia oan sira ba serbisu.

“Espera sira-nia hases-an husi imi, ne'e sai papel ida ida-ke pozitivu, la’ós negativu, sei ajuda imi, tanba hakrak ka lori Timor ba oin no dudu Timor ba oin hahú hadi’a moris uluk, se moris ne'e la muda mak sei la muda Timor-Leste ne'e”, hatete Taur.

Nune'e husu ba trabaladór sira katak ba sei hetan rai foun, ema foun, hahalok foun, hahán foun, lisaun foun no situasaun foun.

Tanba ne'e, mudansa ida-ke boot, maibé iha traballadór  barak desde 2009 sira hatudu kapasidade, adapta-an no mudansa. Ida ne'e dehan la’ós ida ne'ebé forte liu no iha ida ne'ebé matenek liu mak nia ba oin, maibé sira ne'ebé hatene adapta-an, muda-an tuir anbiente ho situasaun ne'e mak sei ba oin

“Ha’u deseja ba ha’u-nia oan sira, susesu iha imi-nia serbisu, imi labele haluha imi husik ita-nia rai iha kotuk, imi-nia família, maibé imi labele haluha sira. Baibain ema dehan dook husi matan besik iha fuan, entaun imi bele la'o mesak maibé iha sira no ami hotu besik imi ho matan na’in Maromak akompaña iha imi-nia situasaun”, enkoraja Taur.

Bainhira sama ona rai Korea traballadór tenke sente hanesan mós ema Korea, tanba ne’e hahalok tenke tuir sira, dispilina, no regra mak importante. (*)