Diretór STAE Munisípiu Baukau, Lucio freitas Salvador, hatete, tuir lei dekretu Governu Nu.10/2022 kona-ba lista internadus antes loron 10, lista votantes husi estasaun votasaun ambulante tama ona iha STAE Munísipiu nia liman.
Maibé, família ho pasiente hamutuk 200-resin ne’e, naran la tama iha STAE antes 10 dias, nune’e sira sei la tuir votasaun iha HoREX.
"Entaun sé mak bele vota, iha lista internadus ne'e, sira nia problema ne'e, antes 10 dias hatama ne'e sai tiha ona, sira seluk tama fali ne'e, lei lako'alia, lei ko'alia de'it sira ne'ebé internadus, signifika sira ne'ebé iha hela Ospitál laran, maibé sira nia lista ne'e iha," dehan nia iha kna'ar fatin, sabadu (19/03).
Xefe departemantu rekursu umanu, estatistika HoREX Baukau, Sebastião Amaral, haktuir, lista atu tuir votasaun iha HoREX Baukau, hahú iha loron 8 fulan-marsu tinan 2022 kedas hatama tiha ba Sekretáriadu Tékniku Administrasaun Eleitórál (STAE) Baukau hamutuk na'in-360, ne'ebé kompostu husi pesoal saúde na'in-120 no pasiente ho família na'in-240.
Maibé, pasiente ho família ne'ebé rejistu antes naran haruka tiha ona ba STAE atu tuir eleisaun iha HoREX Baukau, balun rekupera ona hodi fila ba ida-idak nia suku.
"Metade husi 200-resin ne'e iha atu tuir votasaun mais ne'e labele, tanba nia moras foun hotu," nia afirma
Tuir nia, lolós dadaun pasiente ho família tama iha HoREX tuir hotu votasaun, maibé la vota fali ne’e, halo alterasaun ruma la tuir ona lei.
"Tuir lolos ne'e ita preve de'it, 10 dias antes pasiente ida ne'ebé baixa nia alta ona, balun mate tiha ona, tanba ne'e ida aktual, ita preve ida ne'e, halo votasaun iha ne'e," dehan nia
Enkuantu pasiente hirak ne'e, husi Munísipiu Lautém, Manatutu, Vikeke no Baukau.
Nune'e, reprezentante família pasiente husi Munísipiu Vikeke, Postu Adminisitrativu Uatukarabau, Suku Loiulo, Aldeia Asafadae, Domingas Xavier Filipe, sente triste, tanba la ezerse nia direitu iha votasaun.
"Ha'u iha ne'e, tanba ha'u nia oan moras, ha'u hakarak atu vota, maibé sira lori box mai dehan, ami nia naran laiha, ami ne'e sidadaun timor, tuir lolos ami vota, foti ami nia númeru eleitorál ho naran, hakerek ba mak uza online, la'os diskrimina fali ami," nia hatete. (*)