“Rezultadu provizóriu inisiál husi Eleisaun prezidensiál segunda volta hatudu ona katak Doutor José Ramos Horta mak sei sai Prezidente Repúblika ba períodu 2022-2027, ne'e mak vontade povu nian, esprese liuhusi buletin de votu, diretu politiku demokratiku, ne'ebé garante husi konstituisaun repúblika. Ha’u simu rezultadu eleisaun segunda ronde ho laran hakmatek no ho ksolok, tanba povu rasik mak hili ninia prezidente repúblika ba tinan lima tuir mai”, dehan nia liuhusi konferénsia imprensa iha Salaun Luz Calarita, sesta (22/04).
Tanba ne'e, hato'o parabéns ba José Ramos Horta nu’udar Prezidente Repúblika eleitu ba mandatu 2022-2027 no fiar katak Prezidente Repúblika eleitu sei koopera ho Parlamentu Nasionál no Governu konstituisionál daualu, nomós Tribunál Rekursu, hodi hatutan konkista sira ne'ebé hetan ona iha tinan lima liubá.
“Parabéns mós ba povu Timor-Leste tomak, dala ida tan kompatriota sira, feto no mane hatudu maturidade politika no hatene hametin ambiente paz, prokubidade no estabilidade iha tempu kampaña no eleisaun”, dehan nia.
Iha ne’e, agradese mós ba apoiu hotu ne'ebé fó durante eleisaun prezidensiál husi kampaña primeiru volta to'o iha segunda volta, liliu apoiu tomak inkondisionál ne'ebé maihusi partidu FRETILIN.
Nune’e ba kampaña segunda volta haksolok tebes ho partisipasaun direta husi Prezidente Partidu Libertasaun Povu (PLP), Jenerál Taur Matan Ruak, no konselleru Másimu Partidu KHUNTO, José dos Santos Naimori Bukar, líder husi partidu rua ne'ebé hola parte maioria parlamentár, ida ne'ebé sustenta Governu konstituisionál daualu.
Ba eleisaun segunda volta, biar akontese insidente balun, maibé mós sente orgullu nu’udar pais, tanba konsege halo votasaun dala rua iha ambiente hakmatek, livre demokratiku, no orden komun.
“Agradese mós ba Tribunál Rekursu no Orgaun Eleitorál sira, STAE no CNE, fiskál no observadór nasionál no internasionál, ba ida-idak nia servisu, la haluha agradese mós PNTL ne'ebé hanesan iha ronde dahuluk hatene kumpre nia dever, mantein orden di’ak iha teritóriu tomak, iha kampaña daruak no eleisuan prezidensiál iha dia 19 abril”, afirma nia.
Nu’udar Kandidatu no hanesan mós Prezidente Repúblika, apela nafatin ba povu tomak atu simu rezultadu eleisaun prezidensiál 19 abril 2022, ho laran hakmatek no haksolok atu hothotu bele moris nafatin ho paz iha estabilidade, dezenvolve nasaun no hasai moris di'ak ba ema hothotu, no hametin justisa sosiál. (*)