"Ohin ha'u mai iha ne'e, vizita ofisiál reprezenta Ministru do Interiór mai hato'o agradese ba servisu di'ak tomak durante kampaña eleisaun Prezidénsial," dehan vise MI iha resintu komandu PNTL Munísipiu Baukau, kinta (28/04).

Kampaña eleisaun prezidénsial primeiru volta no segundu volta, la'o di'ak, maske iha perturbasaun balun, maibé parte PNTL atua ho profesionalismu.

Nune'e, Governu liuhusi Ministéiru Interior, agradese ba PNTL nia servisu, tanba maduru ona, hatudu indepedente, imparsialidade, neutralidade hahú husi kampaña primeiru, segundu to'o eleisaun prezidénsial remata.

"Mantein nafatin disiplina ba oin, mantein profesionalismu, ritmu servisu di'ak tomak durante hatudu ona, tenke kontinua nafatin, PNTL tenke lori ba oin, labele markapasu iha fatin ka ba fali kotuk," nia argumenta

PNTL hasoru ona esperensia moruk midar iha pasadu, maibé ne'e sai hanesan esperensia atu dezenvolve instituisaun PNTL ba oin hodi servi povu no rai doben Timor-Leste. (*)