Tempotimor (Dili) – Populasaun komesa okupa filafali fatin mamuk iha eis merkadu Komoro, tan fatin ne'e tinan barak ona husik abandona hela. Xefe Aldeia 03 Suku Fatuhada, Zeferino Bras dehan Governu laiha planu no jestaun ne'ebé di'ak.

“Loloos bainhira muda komunidade husi fatin ida ba fatin seluk, Governu tenke aproveita kedas halo buat ruma, iha fatin ne'ebé hasai ona populasaun ba ne'e. La'ós, hasai tiha populasaun depois abandona fali fatin ne'e to'o tinan ba tinan. Ita mós labele duni populasaun ba mai hela de'it, maibé laiha planu. Ida ne'e nunka atu bele rezolve problema,” Zeferino hatete ba tempotimor.com, Segunda (28/10/19) iha fatin eis merkadu Komoro.

Tuir Zeferino, atu hasai populasaun sira ne'ebé agora okupa filafali ona fatin eis merkadu Komoro mós Governu presiza iha planu ida ne'ebé di'ak.

“Para hasai populasaun mós tenke ho dignu. Labele naran hasai de'it. Maibé, presiza kria tan kondisaun ruma ba populasaun sira," relata Zeferino.

Tempotimor (Dili) – Tan transporte limitadu, difikulta Sekretáriu Estadu Protesaun Sivíl (SEPS) hodi bele fó apoiu emerjensia ba komunidade 700 resin, ne'ebé sai vitima ba inséndiu ne'ebé akontese kuaze iha territóriu tomak, inklui RAEOA.

SEPS hatete, tempu udan besik ona, apoiu emerjensia SEPS halo daudauk ona. Maski, iha fatin balun seidauk bele fó apoiu tanbá dadus no tanbá problema transporte atu tula sasán.

"Karreta aluga ne'e limitadu. Tula tiha sasán balun ba fatin akontesementu, karreta tenke filafali mai Dili, para tula fali sasán ba fatin seluk. Maibé, kona-ba emerjensia nian ita prepara. So ita preokupa kuandu tinan 2020, stock bele laiha. Ida ne'e ita atu fó apoiu emerjensia mak difisil uitoan," nia esplika.

Alende ne'e, tuir SEPS iha loron 25 Outubru liubá, katuas ida iha Same mate tanbá nia sunu nia to'os, iha tempu anin bo'ot huu no atraves ba katuas ne'e mos mate. Iha foho Matebian iha uma lisan 14 mak ahi han inklui uma komunidade nain 5.

SEPS halo ona koordenasaun ho PNTL atu bele halo investigasaun kle'an hodi hatene motivu husi sunu rai ne'e rasik.

Prevensaun seluk, tuir SEPD mak halo ona enkontru ho pontu vokál sira iha ministériu no munisípiu  hotu, para bele koordena ho administradór, xefe suku no xefe aldeia sira, hodi alerta ba povu kona-ba inséndiu ne'ebé akontese iha sira nia área.

Tempotimor (Dili) – Sekretáriu Estadu Protesaun Sivíl (SEPS), Alexandrino de Araujo ezije ba Ministériu Obras Públika (MOP), atu bele kria kondisaun ba estrada no be'e, hodi fasilita Bombeirus rezolve problema sunu rai, ne'ebé daudaun akontese iha fatin barak.

"Presiza koperasaun ho liña ministeriais sira seluk. Liuliu Ministériu Obras Públika (MOP). Tanba, Bombeirus ita rekruta no iha ekipamentu. Maibé, kuandu ahi han no dalan la asesu ou dalan aat. Ne'e problema," dehan SEPS iha Parlamentu Nasionál, Sesta (25/10/19).

La'ós problema asesu ba estrada de'it, SEPS mós lamenta ho situasaun balun ne'ebé akontese hodi obriga Bombeirus labele halo nia servisu ho di'ak.

"Tuir fali kona-ba bee. Hanesan foin lalais akontese iha Asumanu, Munisípiu Liquica, semana liubá. Bainhira Bombeirus ba rega, depois bee iha tanki hotu. Nia tenke karega fali bee. Mas, tenke ba buka bee iha fatin seluk. Ida ne'e katak, presiza iha preparasaun bee," nia haktuir.

SEPS reafirma katak nia mós halo ona planu iha orsamentu ba tinan 2020, hodi halo rekrutamentu tan Bombeirus no hola ekipamentu Bombeirus nian.

Tempotimor (Dili) – Sekretáriu Estadu Juventude no Desportu (SEJD), Nelio Isaac Sarmento informa, iha orsamentu hamutuk millaun $4.5 atu fó apoiu ba komunidade ka grupu joven sira, hodi dezenvolve ekonomia iha sira-nia suku.

Nia subliña, Sekretáriu Estadu Igualdade Inkluzaun (SEII) iha millaun $1.5, Sekretáriu Estadu Arte no Kultura (SEAK) iha Millaun $1.5 no SEJD iha millaun $1.5. “Entaun, orsamentu hamutuk millaun $4.5 atu implementa programa ba komunidade iha tinan 2020,” nia esplika.

Apoiu ba suku hirak ne'e, nia dehan, la'ós hanesan subsídiu ida hodi moris beibeik. Maibé, ne'e hanesan subsídiu la permanente ka temporaria.

"Orsamentu hirak ne'ebé apoiu ba grupu sira iha suku ne'e, uza hanesan kapitál ba dezenvolvimentu. Maibé, tenke fó fila. Se la fó fila mak sei simu responsabiliza i la hetan tan oportunidade hodi asesu ba oportunidade tuir mai, ne'ebé  Governu fó," esplika SEJD iha Palásiu Governu, Sesta (25/10/19).

Nia informa, koloka orsamentu atu apoiu ba grupu joven liuliu ba feto sira ne'e, subsídiu temporaria para sira bele uza hodi dezenvolve ekonomia iha sira-nia suku rasik.

Tempotimor (Dili) – Ministru Koordenadór Asuntus Ekonomia (MKAE) interino, Fidelis Magalhaes informa, to'o agora seidauk hatene kauza husi asidente ahi han kapela no ambientál iha Ramelau.

"Atu hari foun fali kapela ka oinsá, ida ne'e ekipa tékniku sira halo verifika didiak tiha lai mak foin mai foti desizaun. Se ita komentariu bainhira sem dadus, hanoin ladún diak," hatete MKAE iha Centru Convensaun Dili (CDD),  Kinta (24/10/19).

Iha fatin hanesan, asesor prinsipál  Ministeiru Turizmu, Komérsiu no Indústria (MTKI), Jacinto Rigoberto dehan, kapela Ramelau ne'ebé mak ahi han foin lalais ne'e, liu de'it loron hira depois nia no ekipa husi MTKI, selebra hela kontratu ba ema na'in 11 atu tau matan no servisu di'ak liután iha Ramelau. Alende ne'e, MTKI mós rekruta tan seguransa na'in 7 hodi fó seguransa ba ambiente Ramelau.

“Imfelizmente, simu fali relatoriu katak ahi han tiha kapela Ramelau. La'ós han de'it kapela, maibé ahi mós han haleu iha foho ramelau,” hateten Jacinto.

Nia parte, tuir Jacinto, horseik kordena kedas ho Sekretáriu Estadu Seguransa Protesaun Sivíl (SEPS) para haruka bombeirus imediatu hodi rezolve.

"Relasiona ho kapela Ramelau ne'ebé ahi han, ami iha ona enkontru ho diresaun relevantes para bele ba halo levantamentus hodi responde kedas. Tanba,  daudaun ne'e ami iha hela orsamentu $ 100 mill atu aloka ba rehabilitasaun Ramelau. Maibé, orsamentu ne'e la'ós husi Fundus Dezenvolvimentu Capitál Humanu (FDCH). Tanba ne'e, seidauk bele implementa," asesor prinsipál ne'e dehan.

Kona-ba akontesimentu ahi han kapela, tuir Jacinto, haruka ona ekipa tékniku para ba koordena ho Amlulik sira para oinsá bele hari foun fali kapela, inklui mós ba fatin lixu sira ne'ebé ahi han tiha ona," tenik Jacinto.

Tempotimor (Dili) – Maski kada tinan, Parlamentu Nasionál (PN) aprova Orsamentu Jerál Estadu (OJE), maibé povu halerik nafatin kona-ba dezenvolvimentu. Povu barak, liuliu iha área rurál seidauk sente dezenvolvimentu mosu iha sira-nia leet.

"Ha'u hanoin, parte ida sira iha razaun. Maibé, parte ida mós laiha karik. Tanba, ita iha Orsamentu Jerál Estadu, ne'ebé kada tinan ita halo implementa. Liuliu, orsamentu la'o hela. Ne'ebé, naturalmente atividade la'o," dehan Primeiru Ministru Taur Matan Ruak iha Palásiu Prezidensiál Bairru-pite, Tersa (22/10/19).

Xefe Governu ne'e afirma, atividade dezenvolvimentu iha rai laran la'o hela. Nia mós halo komparasaun kona-ba kresimentu ekonomia ne'ebé iha tinan 2019 sa'e, kompara ho tinan kotuk.

"Se ita boot sira (jornalista) kompara 2019 ho 2018 no 2018 ho 2017, kompletamente iha mudansa. Ita boot sira haree prozesaun agora kresimentu (ekonomia) ba 2019 ne'e, pursentu 5.1," Taur afirma.

Nia dehan, iha 2018 no 2017 resesaun ekonomia iha pursente 3.5. “Entaun dehan atividade la la'o ne'e oinsá? Ha'u hanoin la'o ho di'ak," nia tenik.

Tempotimor (Dili) – Konsellu Konsultativu Fundu Petrolífeiru (KKFP), to'o agora seidauk bele tetu kona-ba Orsamentu Jerál Estadu (OJE) tinan 2020, ho montante billaun $1.950.

"Osan ne'e atu barak ka oituan, ita tetu iha buat rua. Parte ida, mak ita nia nesesidade nomós ita nia osan rasik natón, para atu halo ita nia programa no atividade sira. Se ita nia osan la to'o ita hatún. Osan to'o ita mantein. Maibé, ne'e depende ba Parlamentu Nasionál, Governu no Prezidente Repúblika," dehan Prezidente Komisaun Konsultivu Fundu Petrolífeiru (KKFP), Julio Crispin iha PN, Kuarta (16/10/19).

Tuir Prezidente KKFP ne'e, OJE 2020 ne'e boot. Inklui mós tinan kotuk nian. Maibé, nia dehan, KKFP seidauk bele haree no tetu osan ida boot hanesan ne'e, atu aloka ba ne'ebé de'it.

“Ami só haree tiha lai katak orsamentu ne'e boot no alokasaun ne'e prioridade duni. Ami seidauk haree, maibé ami rona mak billaun $1.95, ne'ebé fahe ba despeza lubuk ida hanesan saláriu vensimentu, bens servisu, kapitál menór, kapitál  dezenvolvimentu no transferénsia públika," nia afirma.

Tempotimor (Dili) – Ministru Estadu Prezidensia Konsellu Ministrus (MEPKM), Hermenegildo Agusto Cabral Pereira informa, kona-ba sistema Autoridade Marítima Nasionál (AMN) ne'ebé sai matéria diskusaun iha Konsellu Ministru, Kuarta (16/10/19) iha Palásiu Governu, Dili.

Tuir MEPKM, Ministru Defeza no Seguransa (MDS), Filomeno Paixao de Jesus rasik, aprezenta asuntu ida ne'e la'o durante tinan barak liubá kotuk no prosesu diskusaun mós la'o.

Governante ne'e afirma, iha diskusaun ne'e KM fó opsaun tolu ba Ministru Defeza no Seguransa hodi rona no hare pro no kontra. Nu fim KM rekomenda ba ministru defeza hodi kontinua halo abordazen ho entidades iha ita nia rain.

"Hodi hakle'an liután komprensaun iha ita nia setór defeza interiór, alfandega, elementu hotu-hotu ne'ebé integra iha setor ida ne'e bele intende kle'an ona, hodi filafali mai KM hodi simu aprovasaun final," esplika Agio Pereira.

Sistema Autoridade Marítima Nasionál konsidera mós tasi hanesan identifikasaun iha estratejia  nasionál  setór fundamentál ba dezenvolvimentu nasaun.

"Sei estuda mós kona-ba opsaun tolu ne'e ba Autoridade Marítima Nasionál (AMN), ho objetivu atu poteziar pozisaun geoestratejika nasionál ho jestaun ne'ebé efikaz husi valiozus rekursus ne'ebé  eziste iha espasu marítima no asumi responsablidade husi estadu kosteriu iha kapítulu seguransa marítima no protesaun iha meiu ambiente," deklara Agio.

Tempotimor (Dili) – Ministru Negósiu Estranjéiru no Kooperasaun (MNEK), Deonísio Babo Soares rekoñese kona-ba funsionáriu timoroan ida, ne'ebé halakon osan Konsuladu TL nian iha Sydney, Austrália.

Notisia Relevante: Deskonfia Diplomata Na’ok Osan, Tusan Bobar Konsuladu TL

"Iha funsionáriu ida, ne'ebé hetan alegasaun katak halakon osan lubuk ida iha Sydney. Osan ne'ebé mak haruka ba atu halo servisu nian. Funsionáriu ne'e, halakon tiha osan to'o agora buka la hetan. Ne'ebé, problema uitoan mak atu funsiona konsuladu Timor-Leste iha Sydney ne'e," dehan Ministru MNEK Deonísio Babo Soares iha Palásiu Governu, Kuarta (16/10/19).

Nia dehan, semana ne'e ekipa inspesaun husi MNEK sei ba foti dadus iha Konsuladu Sydney.

Notisia relevante: Ministru Fidelis Husu KAK Investiga MNEK

"Semana ne'e, ami iha ekipa ida sei ba foti dadus iha Sydney. Foti tiha dadus, hafoin ita rona depois submete ba parte kompetente. Primeiru ba uluk Komisaun Funsaun Públika (KFP). Depois ba fali Inspesaun Jerál Estadu (IJE). Depois, haree hotu mak bele deside, hodi rezolve ka prosesa. Tuir mai ba hatan Prokuradoria Jerál Repúblika (PJR) no ba Komisaun Anti Korrupsaun (KAK)," tenik Babo.

Ministru Babo mós haruka ona karta ba Prokuradór Jerál Repúblika (PJR), kona-ba asaun ne'ebé mak MNEK halo ona ligasaun ho funsionáriu ne'ebé halakon osan estadu ne'e.

Tempotimor (Dili) Uniaun Estudante Universitáriu Munisípiu Baucau (UEUMB), rejeita totál deklarasaun husi Prezidente Autoridade Munisípiu Baucau (PAMB), Antonio Guterres ne'ebé deklara katak populasaun Munisípiu Baucau laiha problema ba infraestrutura báziku.

Tuir Portavoz II UEUMB, Gabriela Soares, rejeita tebes ho deklarasaun PAMB ne'ebé deklara informasaun liuhosi média online balu, katak populasaun Munisípiu Baucau kuaze %80 asesu ona ba bee moos.

"Hanesan estudante Baucau-oan ne'ebé durante ne'e observa dezenvolvimentu liga ba estetementu PAMB nian, ne'e so halo kontente dei't ba PAMB ne'ebé durante ne'e ukun ona Munisípiu Baucau periodu II. Maibé, populasaun nafatin halerik ba infraestrutura báziku sira hanesan estrada, eletrisidade, bee moos, saúde no edukasaun," deklara Gabriela liuhosi konferensia imprensa iha UNTL Sentrál, Kuarta (16/10/19).

Gabriela afirma, PAMB la haree katak iha komunidade barak mak sei lori masa hein atu kuru bee moos. Gabriela fó ezemplu iha Suku Gariuai, komunidade barak mak lalin masa ho gerobak husi Aldeia Bahamori ba kuru bee moos iha Loloria, Suku Gariuai.

Nia hatutan, iha Postu Saúde Venilale laiha karreta Ambulansia atu transfere pasiente ou inan feto sira ne'ebé atu partu, ba Hospitál Referál Baucau.

Iha fatin hanesan, Lazario Ximenes da Costa nu'udar membru UEUMB hateten, relasiona ho informasaun no dadus ne'ebé PAMB hato'o, ida ne'e la tuir realidade no faktus ne'ebé hatudu.

Nia informa, observasaun ne'ebé UEUMB rasik hala'o iha tereinu hatudu katak realidade povu Munisípiu Baucau seidauk atinzi %80 mak asesu ba bee moos.

Nia dehan, haree ba realidade iha munisipiu refere, iha Postu Administrativu Baucau Vila dei't mós  tuir observasaun UEUMB, populasaun barak mak seidauk asesu ba bee moos.

"Ami la sura ninia pursentu. Maibé, faktus no realidade ne'ebé hatudu momoos katak komunidade maioria mak seidauk asesu ba bee moos," esplika Lazario.

Lazario katak, PAMB bele nafatin mantein ho ninia dadus ne'ebé nia hato'o, UEUMB mós nafatin firme iha nia pozisaun, hodi rezita no kontra PAMB nia deklarasaun.

.