Tempotimor (Díli) – Komité Populár, Tersa (10/09/19) iha Sede Komité 12 Novembru, Balide, Díli kondekora prémiu populár ba ativista diretus umanu, Saskia Kouwenberg.

“Ha'u sente orgullu tebes, tanba sai hanesan parte ba luta independensia Timor-Leste ninian.  Nu'udar feto, ho aten brani tebes hodi bele sai parte husi luta ba independesia nasaun Timor-Leste nian," Saskia Kouwenberg hatete bainhira simu Prémiu Populár husi Komité Populár.

Saskia, feto Olanda ida ne'ebé brani duni. Ho ninia brani, Saskia konsege lori sai husi Timor, kasete gravasaun video Max Stahl nian iha Santa Cruz. Sei la'ós tan Saskia, mundo internasionál sei la hatene, saida mak akontese iha masakre Santa Cruz, 12 Novembru 1991.

Iha fatin hanesan, Símbolu Solidariedade Timor-Leste, Maria de Lourdes Martins da Cruz (Mana Lu) hatete, nu'udar feto Timoroan ho fuan brani hodi organiza povu iha area rurais hodi bele kontribui ba Timor.

"Iha tinan 20 liu ba, ha'u mós iha misaun ida hodi harii programa prepara ema hodi tulun povu iha área rurais, durante luta ba independensia," dehan Maria de Lourdes.

Nia husu ba Timoroan hotu, liuliu ba jerasaun foun tenke estuda hodi hatene nia identidade rasik, nu'udar Timoroan. "Nu'udar joven, tenke badinas estuda hodi nune'e bele hatene istória no identidade nasaun Timor-Leste ne'e nian."

Tempotimor (Dili) – Seidauk iha Lei atu proteje diretu labarik sira nian iha Timor-Leste, sai preokupasaun boot ba  Fundasaun Forum Comunicação Juventude (F-FCJ) Don Bosco, Balide.

Tan ne'e, Fundadór F-FCJ Balide, Cipriano Freitas ezije Governu atu aselera lalais Lei Protesaun ba Labarik no Kódigu Labarik nian.

"Iha kazu barak iha tribunal, ne'ebé konsidera labarik sira hanesan ema adultu. Oráriu atu halo julgamentu ba labarik la tau espesiálidade. Tanba ne'e, ezije lei ne'e iha para atu tau atensaun espesiál ba kazu labarik sira iha tribunál,” dehan fundador F-FCJ Balide ne'e, Tersa (19/11/19).

Nia dehan, tempu to'o ona para Governu tenke hanoin. Tanba, iha kazu barak liu ne'ebé ligasaun ho labarik. Cipriano fó ezemplu kazu soe bebe, abuzu sexuál, abandonadu, violénsia sexuál, insestu no kazu seluk, ne'ebé tuir Cipriano, presiza ona atu Governu tau atensaun.

"Lei ne'ebé iha ona la garante labarik sira hanesan iha konstituisaun. Kódigu Sivíl de'it ne'ebé tuir ami nia haree, ladún detallu fó atensaun ba kazu ne'ebé labaraik sira iha no infrenta. Diferensia ho Lei Kódigu ba Labarik no Lei Protesaun ba Labarik. Tanba ne'e, mak ami ezije. Lei ne'e kleur ona," nia hatutan.

Tempotimor (Dili) – Tan de'it atu ba servisu iha Austrália, polítika Sekretáriu Estadu Formasaun Profisional no Empregu (SEFOPE), obriga inan-feto sira, ne'ebé tuir hela teste fisiku, tenke bomba rai.  

Observador Polítika husi Uiversidade Nasionál Timor Lorosa'e (UNTL), Camilio Ximenes Almeida lamenta ho hahalok ida ne'e.

"Teste fíziku atu ba Austrália mós haruka inan-feto sira bomba rai. Ita ne'ebé haree ida ne'e, triste. Matan ben monu. Tanba, teste hanesan ne'e so atu sai Polísia ou F-FDTL mak bele aplika," Camilio hatete ba tempotimor.com, iha Kampus tuan UNTL, Kaikoli, Dili, Kuarta (26/11/19).

"Hahalok ida haruka inan-feto sira bomba rai, tan de'it atu ba Austrália ne'e, presiza kombate. Tanba, hahalok ne'e invazor kolonál sira mak uluk halo ba Timoroan. Ita lakohi buat sira hanesan ne'e, mosu tan. Se lae, ita nafatin atan ba bei-beik," esplika Camilo.

Iha sorin seluk, tuir observadór polítika ne'e katak polítika Governu nian hodi haruka Timoroan sira sai ba liur ne'e, loloos la merese.

“Tan saida, Governu la kria polítika seluk hodi loke kampu servisu iha rai-laran. Ka polítika haruka de'it Timoroan sira ba Korreia no Austrália ne'e de'it mak loos ona?” Camilo afirma.    

Tempotimor (Dili) – Deputadu iha Parlamentu Nasional (PN) husu Ministra Finansas (MF) Sara Lobo Brites nu'udar mós membru ba Konsellu Administrasaun husi Fundu Infraestrutura (KAFI), hodi esplika ba povu, kona-ba prosesu pagamentu ba projetu 143.

"Pagamentu kona-ba projeitu 143 ne'e, ha'u haree katak ita soe bola ne'e ba mai de'it. Bainhira ami ko'alia ho Ministru Planeamentu Investimentu Estratéjiku (MPIE), dehan iha Ministru Obras Públiku (MOP). Agora, MOP dehan fali iha ADN, KAFI no PM tan. Entaun, señora ministra hanesan membru KAFI hotu, entaun fó to’ok esplikasaun para rezolve projetu 143 ne'e nia hun," dehan deputadu Abel Pires iha salaun plenária PN bainhira Komisaun C,D,E no F hala'o audiénsia ho Ministériu Finansas, Segunda (04/11/19).

Abel afirma, tuir realidade ne'ebé iha katak, Ministériu Obras Publika (MOP) mak na'in ba projetu ne'e. Maibé, estatementu MOP nian katak desizaun iha KAFI, ADN no Konsellu Ministru.

"Ami hatene katak ne'e husi MOP. Maibé estatementu husi ministru nian katak, ne'e la'ós husi MOP. Maibé, desizaun tenke husi Konselu Ministru (KM) no buat hotu. Entaun, ita boot mós bele ajuda esplika hela mai ami, para atu rezolve ne'e tenke hahú husi fatin ida," dehan Abel.

Alende ne'e, Deputada Anabela Sábio mós husu ba MF relasiona ho 143 projetu ne'ebé KAFI foti ona desizaun iha fulan Jullu 2017. “Tuir ita boot, 143 projetu ne'e legál ka ilegál. Ami presiza esplikasaun," husu deputada Anabela.

Desizaun Foti Ona 

Hatán ba prokupasaun deputadu hirak ne'e, Ministra Finansas esplika, desizaun KAFI nian ba projetu 143, halo tiha ona.

"Hanesan membru KAFI, desizaun ami halo tiha ona. Maibé, presiza atu fundamenta no lori filafali ba KAFI mós bele. Tanba, membru KAFI ne'e la'ós Ministériu Finansas de'it. Maibé MOP, MTK no MPIE. Tanba ne'e, mekanizmu iha. Maibé, razaun sira aprezenta tenke konsolida para pagamentu sira ne'e la'o kuandu projetu sira ne'e, iha terrenu realmente iha nia implementasaun. Tanba, se lae ita prejudika ita nia seitór privadu sira," dehan Sara Lobo.

Nia mós afirma, projetu ne'e iha fundu infrastrutura. Maibé, finansas hola parte iha KAFI no pagamentu finál nian. “Selu ka la selu, ida ne'e depende ba ministériu sira ne'ebé simu knaar atu ezekuta ida ne'e,” Sara Lobo esplika.

Tempotimor (Dili) – Bankada PLP lamenta ho polítika ONG Plan Internasionál (PI) ne'ebé prepara joven feto sira, atu hola parte iha orgaun estadu nian iha oras balun nia laran.

"PLAN Internasionál prepara ona la'ós model hanesan ne'e. Viola regras hotu, buka saida iha ne'e? Plan Internasionál ne'e organizasaun ida, Parlamentu Nasionál iha juventude, Juventude Parlamentar. Agora, ita ema mai ida-idak, ita mai halo orgaun ida ne'e, parte ida ita dignifika estadu, maibé parte ida ladi'ak, nu'udar estadu direitu demokrátiku," dehan Deputadu PLP, Francisco Vasconcelhos iha plenária bainhira Mália da Costa hola pozisaun nu'udar deputada PD, durante oras ida nia laran, Segunda (14/10/19).

Deputadu ne'e la konkorda ho átu ne'ebé mak Plan Internasionál halo. "Ha'u la konkorda ho átu ne'e. Ita labele buka popularidade, depois ita viola regras hotu, ita nia preparasaun ba ita nia joven sira la'ós ho maneira sira hanesan ne'e,” deputadu hatete.

Iha fatin hanesan, deputada Josefa Soares katak hakarak atu dignifika estadu tenke iha regras.

"Ita hakarak atu dignifika estadu ne'e la'ós ho maneira sira hanesan ne'e. Hakarak halo tratamentu bainhira ema, sim señor, Parlamentu Nasionál bele konsede fatin seluk, para sai hanesan treinamentu. Maibé, la'ós iha plenária soberanu ida ne'e. Se ita hakarak dignifika estadu ne'e tenke tuir regras. La'ós ONG ida mai fali iha ne'e no hakat liu fali. Ida ne'e labele," hatete Josefa.

Hatan ba kestaun ne'e Prezidente Parlamentu Nasional (PPN) Arão Noé de Jesus da Costa Amaral katak, asaun ne'e soe ona ba lidera bankada, maibé Laiha pronunsia ruma kona-ba prezensa alin Mália.

"Iha dia 11 Outubru, loron mundiál labarik feto sira. Tanba ne'e, asaun ne'e hahú kedas iha semana kotuk, PR nia halo, PM mós halo, inklui membru Governu balun halo ona.  Tanba ne'e, ohin molok alin ne'e tama mai, ha'u soe ona ba lideres bankada sira. Maibé, laiha pronunsia entaun ita fó alin ne'e mai hola pozisaun hanesan Prezidente Bankada (PD)," dehan PPN Arão.

Tempotimor (Dili) – Deputada Bankada FRETILIN, Maria Angelica Rangel afirma, hasa'e Orsamentu Jerál Estadu (OJE) ba tinan 2020 ne'e, viola ona regra no sai  istória boot ba Timor-Leste.

"Tanba iha tinan 2016 mós ho orsamentu billaun $ 1.9, maibé orsamentu ne'e mai husi parte rua. Ida mai husi OJE no seluk mai husi orsamentu ratifikativu. Iha tinan 2020 ne'e mak proposta orsamentu mai iha PN ho montante billaun $ 1.95 mai dala ida de'it," hatete deputada Angelica Rangel, Kinta (03/10/19) iha Salão Paroquiál, São José, Katedrál Dili.  

Nia dehan, foufoun desizaun husi Konsellu Ministru katak defini no tetu orsamentu ba tinan 2020 ne'e ho montante billaun $1.6.

“Maibé, ikus mai iha Komisaun Revizaun Orsamentu, hasa'e fali ba billaun $1.95. Ita hatene katak Komisaun Revizaun Orsamentu ne'e, atu tetu loloos para hatún montante OJE ne'e tuir proposta orsamentu billaun $1.6 ne'e. Tanba halo revizaun," esplika Angelica.

Angelica promote, sei hein proposta orsamentu ne'e mosu iha PN para bele halo diskusaun. Maibé, antes ne'e simu ona deklarasaun husi Ministra Finansas, depois hetan aprovasaun iha Konsellu Ministru.

“Ami seidauk iha konkluzaun no halo analiza ba proposta orsamentu ne'e. Tanba, ami seidauk simu proposta OJE 2020. Ida agora ne'e foin akompaña dei't rezultadu depois de reuniaun iha Konsellu Ministru," Angelica dehan.

Tempotimor (Dili) Uniaun Estudante Universitáriu Munisípiu Baucau (UEUMB), rejeita totál deklarasaun husi Prezidente Autoridade Munisípiu Baucau (PAMB), Antonio Guterres ne'ebé deklara katak populasaun Munisípiu Baucau laiha problema ba infraestrutura báziku.

Tuir Portavoz II UEUMB, Gabriela Soares, rejeita tebes ho deklarasaun PAMB ne'ebé deklara informasaun liuhosi média online balu, katak populasaun Munisípiu Baucau kuaze %80 asesu ona ba bee moos.

"Hanesan estudante Baucau-oan ne'ebé durante ne'e observa dezenvolvimentu liga ba estetementu PAMB nian, ne'e so halo kontente dei't ba PAMB ne'ebé durante ne'e ukun ona Munisípiu Baucau periodu II. Maibé, populasaun nafatin halerik ba infraestrutura báziku sira hanesan estrada, eletrisidade, bee moos, saúde no edukasaun," deklara Gabriela liuhosi konferensia imprensa iha UNTL Sentrál, Kuarta (16/10/19).

Gabriela afirma, PAMB la haree katak iha komunidade barak mak sei lori masa hein atu kuru bee moos. Gabriela fó ezemplu iha Suku Gariuai, komunidade barak mak lalin masa ho gerobak husi Aldeia Bahamori ba kuru bee moos iha Loloria, Suku Gariuai.

Nia hatutan, iha Postu Saúde Venilale laiha karreta Ambulansia atu transfere pasiente ou inan feto sira ne'ebé atu partu, ba Hospitál Referál Baucau.

Iha fatin hanesan, Lazario Ximenes da Costa nu'udar membru UEUMB hateten, relasiona ho informasaun no dadus ne'ebé PAMB hato'o, ida ne'e la tuir realidade no faktus ne'ebé hatudu.

Nia informa, observasaun ne'ebé UEUMB rasik hala'o iha tereinu hatudu katak realidade povu Munisípiu Baucau seidauk atinzi %80 mak asesu ba bee moos.

Nia dehan, haree ba realidade iha munisipiu refere, iha Postu Administrativu Baucau Vila dei't mós  tuir observasaun UEUMB, populasaun barak mak seidauk asesu ba bee moos.

"Ami la sura ninia pursentu. Maibé, faktus no realidade ne'ebé hatudu momoos katak komunidade maioria mak seidauk asesu ba bee moos," esplika Lazario.

Lazario katak, PAMB bele nafatin mantein ho ninia dadus ne'ebé nia hato'o, UEUMB mós nafatin firme iha nia pozisaun, hodi rezita no kontra PAMB nia deklarasaun.

Tempotimor (Dili) – Prokuradór Jerál Repúblika (PJR), José da Costa Ximenes hatete, kazu desputa rai iha Kaitehu, Munisípiu Likisa ne'e iha Diresaun Nasionál Terras e Propriedades (DNTP). Tan ne'e, tuir PJR José Ximenes, Ministériu Justisa mak bele esplika kona-ba problema ne'e.

"Problema rai, hanesan problema ne'ebé importante. Tanba sai hanesan sentru konflitu iha Timor-Leste. Ita sei lembra 2006 no 2007, kuandu krizi akontese, funsionáriu no autoriedade lokál barak to'o rejistu hotu fahi luhan hotu para hetan osan," dehan PJR José da Costa Ximenes iha Palásiu Prezidensiál Bairro-Pite, Segunda (07/10/19).

Nia dehan, iha tempu agora ema balun hahú fa'an fali rai estadu ba estadu. "Agora, ema balun fa'an rai estadu ba estadu. Rai ne'e rai balun estadu ninian balun komunitáriu ninian no rai privadu. Ida ne'e problema DNTP nian. Ne'ebé ha'u hanoin estadu ne'e tenke afirma, se la afirma susar," José tenik.

Tuir nia, rai ne'ebé iha parte tasi ibun hanesan iha parte Bebonuk nian, ne'ebé estabelese Hotel Arbiru ne'e, ema halo uma arbiru. Inklui estrada sira. Maibé, tuir loloos metru atus ida husi tasi ibun ne'e partense ba rai estadu.

"Ita lalika ba dook ida. Rai ida Hotel Arbiru nian tesik ba tasi ibun ne'e, ema halo uma arbiru no estrada. Ita boot sira hatene, metru 100 husi tasi ne'e partense ba estadu. Maibé, saida mak akontese, bainhira ema ba halo uma iha ne'ebá laiha Obras Públiku inklui DNTP fó hatene katak rai ne'e estadu nian," dehan PJR.

Nia mós husu ba Ministru Justisa atu hatán ba problema ne'e, tanba problema ne'e kona-ba DNTP, Ministériu Justisa.

"Liuliu ema sira ne'ebé halo uma tuir mota ibun, hanesan iha Kaitehu, Likisa nian ne'e problema DNTP. Tan ne'e, husu ba señor Ministru Justisa para bele responde situasaun ida ne'e," PJR afirma.

JSTempotimor (Dili) – Ekipa husi Ministeriu Ensinu Superior Siensia Kulturál (MESSK), Tersa (01/10/19) halo fiskalizasaun ba Universidade João Saldanha ka João Saldanha University (JSU), ne'ebé to'o agora seidauk hetan lisensiamentu husi Ministériu Edukasaun (ME).

Ba jornalista, Ministru Ensinu Superior Siensia Kultura, Longuinos dos Santos informa, objetivu husi fiskalizasaun ne'e atu observa direta ba pedidu ne'ebe mai husi JSU.

"Ami ho ekipa avaliadór sira mai, hodi bele observa direta pedidu ne'ebé Universidade João Saldanha hatoo ona, hodi bele hetan lisensiamentu," MESSK hatete iha JSU, Bekora.

MESSK dehan, universidade hotu-hotu atu hetan lisensiamentu tenke prenxe uluk lai kriteriu sira ne'ebé iha ona.  "Enkuantu atu fó lisensiamentu tenke prenxe kriteriu tolu mak hanesan; rekursu umanu, kurikulu no infraestrutura," nia esplika.

Iha fatin hanesan, Sekretariu Fundasaun Universidade João Saldanha, Ildefonso Soares informa, nu'udar instituisaun foun, ninia parte tenke prenxe duni kriteriu husi MESSK.

"Ami nu'udar instituisaun foun, tenke prenxe duni kriteriu husi MESSK nian, hodi bele garante kualidade ensinu superiór," Ildenfonso dehan.

Tempotimor (Dili) – Prezidente Komisaun Nasionál Kontrolu Kankru Susun, Doutór Alito Soares hatete númeru mortalidade tan moras kankru susun iha rai laran, aumenta aas.

Maski la hatudu grafika no dadus, Doutór Alito dehan, moras kankru susun hanesan moras ida ne'ebé perigu tebes no bele halakon ema nia vida.  

"Iha Timor-Leste moras kankru susun ne'e, ho nia mortalidade aas tebes. Maioria kona ema sira ne'ebé ho idade 18-20 mak hetan moras ne'e," informa Doutór Alito ba jornalista iha Hospitál Nasionál Guido Valadares (HNGV), hafoin lansamentu video kona-ba moras kankru susun, Kuarta (02/10/19).

Nia dehan, Ministériu Saúde hamutuk ho Fundasaun Alola realiza lansamentu video kankru susun ne'e, hodi sosializa moras kankru susun ne'ebé  tuir Alito, aumenta aas iha Timor-Leste.

Tuir doutór Alito, komisaun nasionál ne'ebé nia xefia ne'e hetan suporta husi Ministériu Saúde hodi bele kontrola pasiente sira ne'ebé hetan moras kankru susun.

"Espera katak komisaun ida ne'e hamutuk nafatin ho Ministériu Saúde hodi bele kontrola moras kankru susun iha Hospitál Nasionál  Guido Valadares no moras kankru seluk," nia espera.

Iha fatin hanesan Vise Ministra Saúde, Elia dos Reis Amaral hatete, kankru susun iha impaktu sosiál  ne'ebé forte liu. "Tanba, susun sai hanesan orgaun simboliku ba maternidade no mós ba feto nia familiaridade."

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com