Tuir informasaun ne’ebé www.tempotimor.com, asesu husi pájina média UNTL katak, ekiamentu hanesan laptop ne’ebé entrega husi embaixada Koreaia simu direta husi Magnífiku Reitór João Soares Martins.

Hafoin simu laptop hirak ne’e, Magnífiku Reitór, agradese ba embaxadór Koreia nian iha Timor-Leste, tanba bele kumpri ona sira-nia promesa liuhusi ajuda laptop 70 ba universidade.

“Agradese ba embaxadór Koreia ne'ebé mak kumpri ona nia promesa ho UNTL katak sei fó ajuda laptop 70 mai universidade, tanba ne’e ohin ita simu ona laptop hirak ne’e. Apoiu ne’e hanesan rekursu di'ak ida ba UNTL, atu nune’e bele uza ba iha prosesu aprendizajen”, dehan Reitór.

Magnífiku Reitór mós hatutan tan, laptop sira-ne’e sei oferese ba departamentu hotu-hotu iha universidade, maibé barak liu mak sei tau iha biblioteka, atu nune’e bele ajuda funsionáriu sira hodi fó asisténsia ba estudante.

“Laptop sira ita simu ne’e sei oferese ba departamentu hotu iha UNTL, maibé barak liu, ita sei tau iha biblioteka nian, atu nune’e bele ajuda funsionáriu sira hodi fó asisténsia ba estudante sira no sanulu (10) sei oferese ba Sentru Estudu Koreia, tanba Koreia sira fó entaun sira mós presiza ita reforsa iha fasilidade”, afirma reitór.

Iha fatin hanesan Embaxadór Koreia, Shin Mantaek hateten, uluk sira halo hela promesa katak, sei oferese laptop ba UNTL, entaun apoiu ne’e sai ondra ida ba sira, loloos ne'e fó simbolikamente simples de'it, maibé reitór hakarak entrega liuhusi eventu simples ruma, tanba ne’e agradese tebes ba reitór nia hanoin.

“Uluk ami halo hela promesa katak sei oferese laptop ba UNTL, entaun ohin akontese. Ida ne’e sai onra ida mai ami, hanesan ita hotu hatene governu ne’ebé foin lalais, mai ho objetivu ida hakarak atu eleva ou kapasita rekursu umanu Timor-Leste nian. Tanba ne’e ami fiar UNTL hola parte, halo papél importante ida husi kapasitasaun rekursu humanu Timor-Leste nian”, dehan Embaxadór Koreia.

Partisipa iha eventu ne'e, Proreitór ba Asuntu Kooperasaun nian, Tomé Jerónimo, Proreitór ba Asuntu Informatizasaun, Transformasaun Dijital no Inovasaun nian, Frederico Soares Cabral, Diretór Nasional Biblioteka nian, Francisco F. Mendes, Diretór Koica nian, Eunjhu Châ ho ekipa, no ekipa husi Embaxada Koreia nian inklui ekipa husi Sentru Estudu Koreanu iha UNTL no asistente tékniku sira. (*)