Tuir informasaun ne’ebé www.tempotimor.com, asesu iha pájina média UNTL katak, iha abertura Semináriu Kafé Jéneru ho tema “Cultura Acadêmica da Igualdade”, Visereitora ba Assuntu Estudantís, Ligia Tomas Correia hatete, atividade ne'e iha ámbitu komemorasaun loron Konsulta Popular, liuliu hodi partilla konseitu no kontestu jéneru.

“Objetivu prinsipál husi eventu ne’e mak introdús ba sivitas akadémika, liuliu estudante sira kona-ba konseitu no kontekstu jéneru ne’ebé dalabarak ita hatene asuntu kona-ba jéneru, maibé iguladade jéneru ne'e sei mínimu, liuhusi atividade ida-ne'e bele fahe informasaun ba estudante sira, hodi komprende di’ak kona-ba Igualdade Jéneru”, dehan a Ligia.

Iha fatin hanesan, oradora ba atividade ne'e Judite Dias Ximenes hatete, iha diskusaun Kafé Jéneru ne'e ba estudante hotu bele komprende kona-ba problema no kestaun jéneru ne’ebé fahe ba parte rua mak konstruasaun sosiál no seksu.

“Husu ba ema hotu hodi inteira kona-ba jéneru no seksu ne'e, ba família no sosiedade liuhusi konseitu ida-ne'e ema hotu bele halo servisu, la’ós ba feto de’it maibé mane mós bele halo servisu uma laran nian, hodi bele halo prevensaun ba violénsia entre feto no mane. Atividade ne’e iha ligasaun ho kampus seguru atu asegura kampus livre husi violénsia”, dehan oradora ne’e.

Partisipa iha semináriu ne’e mak hanesan Dekana Faculdade de Turismo Artes Indústria Creativas e Culturais, Glenda M. S. de Carvalho, dosente do estudante sira ne'ebé reprezenta husi fakuldade sira UNTL nian. (*)