Tempotimor (Dili) – Impase Polítika iha rai-laran, a finál da'et hotu ba problema eletrisidade mate-lakan, ne'ebé rezulta halo populasaun barak ninia sasán eletrisidade sira, aat no kema saugate de'it.

"Ita iha tinan rua liubá, laiha osan atu halo manutensaun no atu hola ekipamentus. Armajen mamuk. Nia impaktu mak ahi mate-lakan," dehan Diretora Jerál Eletrisidade, Arlinda M.R.F.F. Miranda ba tempotimor.com no Jornál Independente iha ninia knaar fatin, Kaikoli, Dili, Kuarta (27/11/19).

Nia relata, kuandu eletrisidade mate ona mak foin ba halo atendementu. Kuandu lakan hela, husik hela de'it. Tanba laiha ekipamentus rezerva atu halo atendementu ho di'ak.

Arlinda afirma, kauza seluk ne'ebé halo ahi mate-lakan mak sasán ne'ebé avaria no distribuisaun uza sistema manual.

“Entaun, bainhira avaria iha parte ruma, parte téknika sira sei ba buka tuir mak foin halo atendementu,” nia esplika.

Sasán Aat

Alende ne'e, ba tempotimor.com populasaun iha Becora, J. Rigoberto (52) kestiona kona-ba ninia sasán eletrisidade hanesan jeladeira ka kulkas no kipas angin nomos sasán sira seluk, ne'ebé estraga, rezultadu husi ahi mate-lakan.

“Ahi mate-lakan hela de'it hanesan ne'e, halo ami populasaun nia sasán sira estraga hotu. Ha'u mós lahatene, sei ha'u lori sasán hirak ne'e ba reklama iha EDTL, kariik bele iha hanesan kompesasaun ka lae?” José hatete.   

Nia esplika, iha parte seluk, kondisaun ahi mate-lakan hela de'it hanesan ne'e, halo komunidade sira sente la hakmatek.

“Kalan-kalan ita tenke hadeer. Tanba, bainhira ahi mate-lakan hela de'it, provoka na’ok-teen sira bele tama uma na’ok ita-nia sasán balun,” nia hatete.

Tempotimor (Dili) – Prezidente Repubilka (PR), ba dala rua, deklara ona veta ba Dekretu Nú. 11/V loron 26 Novembru 2019, kona-ba Lei Atividade Petrolífeiru-Lei Fundu Petrolífeiru (LAP-LFP).

Antes ne'e, iha loron 29 Agusto 2019 liubá, PR mós deklara veta ba Dekretu Nú. 9/V, kona-ba LAP-LFP. Hoi da ne'e, Dekretu Lei kona-ba LAP-LFP, konsidera inkonstitusionál nafatin.

“Veta ne'ebé PR deklara, konstitusionalidade mak permiti bainhira PR haree buat ruma ba diploma ne'ebé mai husi PN no Governu,” hatete Prezidente Tribunál Rekursu (PTR), Deolindo dos Santos iha Igreja Katedrál Dili bainhira partisipa misa agradesimentu ba komemorasaun loron Proklamasaun Independénsia Timor-Leste ba dala 44, Kuarta (27/11/19).

Tuir Deolindo, dala barak públiku kestiona kona-ba prosesu ne'e. “Iha parte primeiru, PR husu TR atu halo investigasaun preventiva ba LAP-LFP. Depois, iha segunda vez mós nune'e? Atu dehan de'it, ne'e konstituisionalidade mak permite ida ne'e. Tanba ne'e, laiha problema ruma, bainhira sua exelénsia Prezidente Repúblika haree buat ruma, ba diploma ne'ebé mai husi Parlamentu Nasionál (PN) ka Governu," nia esplika.

Maski nune'e, deklarasaun veta ba Dekretu Nú. 11/V loron 26 Novembru 2019, TR seidauk simu. "Veto PR nian ba Lei Atividade Petrolífeiru no Lei Fundu Petrolífeiru (LAP-LFP), ami seidauk simu kona-ba ida ne'e," afirma Deolindo.

Tempotimor (Dili) – Iha 28 Novembru tinan ne’e, povu Timor-Leste sei komemora loron Proklamasaun Independensia ba tinan 44. Iha apelu boot ida husi Uma Kreda atu ukun-nain sira ne’ebé kaer ukun, labele tuir nia hakarak no buka riku ba nia an.

Apelu ne’ebé mós konsidera hanesan reflesaun husi Uma Kreda ne’e hato’o liu husi omilia Vigariu Jerál Arqu Dioseze Dili, Mgr. José Antonio da Costa ne’ebé preside misa agradesimentu ba loron Proklamasaun Independensia ne’ebé realiza iha Igreja Katedral, Dili, Kuarta (27/11).

"Ukun labele halo tuir o nia hakarak, se lae nakonu ho injustisa no violensia hodi buka riku-soin ho nune'e reinu ida ne'e sei monu ba ema seluk nia liman," dehan Amu José.

Amu dehan, maske ho iluzaun no hanoin barak, maibé bainhira halo tuir hakarak de’it, sei hasoru susar, laiha pas no justisa.

“Ho nune'e sei hetan mak kiak, violensia ba kbiit laek no ema barak mak sei falta nesesidade hafoin ikus mai sei lakon konfiansa,” dehan Amu ne’e.

Tan ne’e, Amu José husu ba ukun-nain sira atu kaer metin moris hakmatek ba nia sosiadade.

“Ukun-nain matenek sei lori grasa ba nasaun, ukun-nain labele rai odiu tanbá Na’i ne'ebé iha leten sei la simu ema loko aan sira," dehan Amu Lulik ne’e.

Entretantu, misa agradesimentu ne’e hetan prezensa husi espoza Prezidente Repúblika, Espoza Primeiru Ministru, Prezidente Parlamentu Nasional ho nia espoza, Maijor Jeneral Lere Anan Timur ho nia espoza, no entidade estadu no governu sira seluk.

Tempotimor (Dili)-Tempu udan monu rai mai daudauk ona, inundasaun sai problema ne’ebé sempre akontese iha kada tinan. Tan ne’e, Sekretariu Estadu Protesaun Sivil (SEPS) husu ba komunidade sira ne’ebé hela iha mota laran atu sees an.

Sekretariu Estadu Alexandrino Xavier Araujo hato’o apelu ba komunidade sira iha Munisipiu 12, inklui rejiaun Autonomu Oekusse, liu-liu sira ne’ebé hela besik mota-ibun atu kuidade ba dezastre ne’ebé la espera.

“Ha’u husu ba ita hotu-hotu atu koopera hamutuk, tanba nasaun ida ne’e ita nian, se hakarak ita-nia nasaun ne’e mós ha’u husu populasaun sira ne’ebé afeta ba risku dezastre tenke sees husi fatin ne’e hodi labele sai vitima ba dezastre," dehan nia iha nia serbisu fatin, Kaikoli, Tersa (26/11).

Aleinde sira ne’ebé hela besik mota, SE Alexandrino husu mós ba sira ne’ebé hela foho lolon, tasi ibun inklui uma hirak ne’ebé tama liu estrada publiku sira atu kuidadu.

“Ha’u husu ba ita-nia povu sira, liu-liu kapital Dili ne’ebé halo uma besik iha mota laran, foho loron, tasi-ibun inlkui balun halo uma tama liu estrada publiku iha konsensia bele sees aan husi fatin risku ba dezastre sira ne’ebé akontese ita la espera,” dehan Alexandrino.

Nia husu mós ba komunidade tomak atu labele so’e foer arbiru, tanba bainhira bee dalan intupidu bele halo bee sa’e.

Rogerio, Fruteiru

November 26, 2019

KOSAR  suli ne'ebé la para iha ninia tilun-hun, nia hikis uza ninia liman kabun. Tan de'it atu hola anin uitoan, nia tuur sadere hela iha kadera semente iha Largo Lecidere. Nia liman rua, hadi'a hela tali, ne'ebé kesi tangerinas iha ai-leba.

Rogerio Martins. Estudante ida, husi eskola Ensinu Báziku iha Munisípiu Aileu. Nu'udar fruteiru, atividade negósiu ne'e, nia halo bainhira eskola ferias.

"Ha'u rasik mak hakarak. Tanba, bele hetan osan no fila ba foho, bele hola roupa no sapatu foun,” hateten Rogerio ba tempotimor.com iha Jardín Lecidere, Segunda (25/11/19).

Tuir Rogerio, aifuan ne'ebé nia fa'an, la'ós tangerinas de'it. Dalaruma nia mós fa'an hudi tasak. “Konforme ba tempu. Bainhira tempu hudi tasak mak barak, ha'u fa'an hudi,” nia dehan.

Bainhira tuun mai Dili, Rogerio hela ho nia maun ne'ebé servisu nu'udar kondutór karreta. Joven ho idade 15 ne'e, la sente kole no baruk atu hakat ba fa'an ninia aifuan iha área Audian, Jardín 05 de Maiu, Hospitál Bidau no Largo Lecidere.  

Nia rasik hatene, rezultadu ne'ebé nia hetan, labele kompara ho kole ne'ebé nia sente. Iha loron ida tomak, Rogerio bele lori fila osan $10. Iha okaziaun seluk, nia bele hetan liu ida ne'e.

"Ha'u la moe ida. Na’ok mak ita moe. Fa'an de'it  ne'e. Kuandu pasa ferias, ha'u mai hela de'it Dili," nia dehan ho hamnasa.

Hadau moris iha Kapitál Dili ho modalidade fa'an aifuan, la'ós problema simples. Loron manas, kosar suli, hadau malu sorte ho fruteiru sira seluk. Seidauk tan, presiza maneira bainhira hasoru ho ema aat sira, ne'ebé gosta hadau sasán no osan husi fruteiru sira.

Rogerio la konta, dala hira ona ema hadau nia aifuan no osan. “Uluk ha'u tauk ho ema sira ne'ebé hadau ha'u nia sasán ho osan. Maibé, agora ha'u la tauk ona. Husik de'it ba. Pasiénsia de'it,” nia hatete.

Rogerio hanesan hatene ona maneira oinsá atu bele sees husi ema sira hanoin aat ne'e. Nia dehan, esperensia ne'ebé nia hetan durante ne'e, hanorin nia atu bele kuidadu nia an, husi ema aat sira.

Dala ruma, provérbiu: O bele kiak, maibé labele sai ema beik mak fó motivasaun ba Rogerio Martins ne'ebé mehi hela atu sai mestre. Tanba, Rogerio konsidera ema hotu tenke matenek. Ho nune'e, nia rasik hakarak aprende esforsu nia moris. Maski, nu'udar fruteiru iha tempu ferias.

Tempotimor (Dili) – La hanesan ho tinan hirak liubá. Selebrasaun Loron Proklamasaun Independensia ba 44, tinan ida ne'e, sei la'o ho simples. Maski nune'e, iha okaziaun ne'e, estadu sei fó kondekorasaun 74 ba veteranus no ema estranjeiru balun.

Vise Ministru Administrasaun Estatál, Abilio Caetano informa kestaun ne'e iha Palásiu Prezidensiál Bairru-pite, Dili, Segunda (25/11/19), hafoin hasoru Prezidente Repúblika.

"Atividade no lala'ok komemora 28 Novembru tinan ida ne'e, simples liu. Maibé, nafatin valoriza istóriku loron Proklamasaun ne'ebé tinan ne'e halo ba 44," dehan Abilio.

Nia esplika, sekuensia sei la'o hanesan baibain. Maibé, interkala ho kondekorasaun ba veteranus no ema balun husi rai liur, tuir dadus ne'ebé fó sai husi Gabinete Prezidente Republika hamutuk ema 74.

“Kona-ba kondekorasaun 74 ne'e, seidauk bele fó sai ba públiku. Tanba, sei hein iha loron 28 Novembru maka sai dala ida. Maibé, tuir dadus loloos iha 74 kondekorasaun,” nia hatete.

Abilio dehan, hahú husi loron 26 to'o 28  Novembru sei hala'o feira iha Centro Convenções Dili (CCD). Iha loron 27 Novembru maizumenus tuku 09.00 dadeer, sei hala'o mós misa agradesimentu iha Katedrál Imaculada da Conceição, Vila-Verde,Dili.

“Iha 28 Novembru selebra loron Proklamasaun Independensia ba tinan 44, sei hahú tuku 9.00 dadeer iha Palásiu Governu. Iha momentu ne'e, Prezidente Repúblika Francisco Guterres Lú Olo mak sei sai inspetór serimónia hasa'e Bandera RDTL,” Abilio informa.

Nia dehan, iha parte loraik, Prezidente Parlamentu Nasionál, Arão Noe mak sei sai inspetór serimonia iha seremonia hatún Bandeira RDTL.

Tempotimor (Dili) – Oráriu debate Orsamentu Jerál Estadu (OJE) 2020 Segunda (25/11/19), adia ba Tersa (26/11/19). Tuir Deputadu Luis Roberto, adia oráriu ne'e relasaun ho deputadu Bankada UDT, Gilman dos Santos, ne'ebé hakotu iis iha HNGV, Segunda dadeersan.

"Ohin tuir loloos atu debate OJE 2020. Maibé, tanbá ami nia maluk Gilman nia mate. Ami tenke suspende filafali ba aban. Ohin loron, ami sei prepara an hodi ba vizita nia isin mate iha nia rezidénsia," dehan Deputadu Bankada KHUNTO ne'e ba Tempotimor iha Parlamentu Nasionál, Segunda (25/11/19).

Luis dehan, Gilman nu'udar belun ne'ebé di'ak tebes, durante ne'e servisu hamutuk iha tinan ida ho balun, iha Parlamentu Nasionál.

"Ami sente lakon belun diak ida. Nia moras saida, ami mos lahatene. Matebian nunka hatete nia moras saida. Triste tebes. Ohin dadeer rona katak nia mate ona," Luis dehan.

Observasaun hatudu, deputadu sira iha Parlamentu Nasionál ho laran triste husik hela sira nia knaar fatin. La hanesan atividade baibain.

Tuir data fixu, Segunda (25/11/19) ohin, Parlamentu Nasionál hahú debate OJE 2020 to'o Kinta (12/12/19). Maibé, ho situasaun tristeza ne'e, debate OJE 2020 adia fali ba Tersa (26/11/19) aban.

Tempotimor (Dili) – Jornalista Max Stahl sente orgullu no previleziu bele hetan Colar Orden Timor-Leste husi estadu Timor-Leste, atu bele rekoñese liután ninia kontribuisaun.

"Ha'u agradese ba Prezidente Repúblika nia inisiativa. Ha'u agradese mós  ba povu Timor-Leste, tanba ha'u mai iha ne'e buka istória no luta, konaba direitus umanus. Maibé, ha'u aprende buat barak kona-ba realidade liuhosi timoroan sira. Ha'u hetan previleziu bo'ot hodi hasoru sira," dehan Max Stahl hafoin simu kondekorasaun Colar Orden Timor-Leste iha Palásiu Prezidensiál Bairru-pite, Sexta (22/11/19).

Iha okaziaun ne'e, Prezidente Repúblika (PR), Francisco Guterres Lú Olo iha ninia deskursu hateten, seremonia entrega prémiu ne'e nu'udar PR ninia inisiativa rasik. Ne'ebé ho responsabilidade tomak, ho povu no estadu Timor-Leste nia naran, kondekora Max Stahl ho Kolar Órden Timor-Leste.

“Ha’u halo ida ne’e, ohin, ho emosaun kle'an ba rekoñesimentu ba buat hotu ne’ebé belun ne’e halo to’o ohin loron ba nasaun no povu ida ne’e. Belun ne’e mós tulun  ita kore-an hosi dominasaun estranjeira kruel ida,” PR Lú Olo hatete.

Importante, tuir PR, hanoin hikas ninia aten brani boot atu filme iha loron ne’ebé hahalok aat oioin, akontese ba joven sira ne’ebé labele defende-an ho kbiit rasik.

Max Stahl, tuir PR, mai atu halo filme. Maibé, nia fó nia isin no klamar tomak ba Timor-Leste livre no independente. Ohin loron, PR hatete, Max Stahl hela iha Timor-Leste ho nia família no kontribui maka’as tebetebes atu hasa’e nível profisionál ba repórter sira.

“Estadu Timor-Leste, kondekora ona iha 2009  ho Ordem de Timor Leste, grau insígnia. Tinan ida ne’e, PR rasik deside kondekora ho Colar Ordem Timor-Leste. Tanba rekoñese nia servisu ho méritu estraordináriu ba Timor-Leste, iha ámbitu hakerek iha artigu 2 husi Dekretu-Lei númeru 20/2009, 6 maiu, ne’ebé define kondisoins elijibilidade atu fó Ordem Timor-Leste,” hatete PR.

Tempotimor (Dili) – Vigariu Jerál Episkopál Dioseze Metropolitan Dili, Padre Juvito do Rego konsidera Governu nia pozisaun ne'ebé kontratu asesór barak, hanesan moras kolonializmu ne'ebé seidauk lakon husi Timor-Leste.

"Ha'u lahatene, ita hanesan moras kolonializmu ne'ebé mak la remata iha ita nia vida. Kuandu iha asesoria demais ne'e, nova forma de kolonializasaun mental psikolojika. Ita nunka liberta ita nia an.  Husik povu ne'e livre," afirma Amu Juvito iha Palásiu Prezidensiál Bairru-pite hafoin partisipa iha serimonia entrega Colar de Ordem, Sexta (22/11/19).

Nia dehan, povu ne'e povu livre. Ne'ebé lalika hanehan. Sei hakarak aprende, tenke investe ba timoroan sira. Haruka ba eskola atu mai desenvolve Timor-Leste.

"Halo partidu, depois to'o ikus ita ba tau ema sira ne'ebé ukun ne'e, ema ne'ebé kompetensia no kapasidade laiha mós  tuur iha ne'ebá," nia tenik.

Tuir Amu Juvito, uza asesór kuandu nesesidade bo'ot tebes no haree katak ida ne'e, timoroan labele halo ona. Maibe, nia dehan, kuandu timoroan bele halo, la presiza alerjia ho maluk timoroan ou tauk tanba balun matenek liu. Ou tauk hodi bolu asesór sira iha liur mai tanba hatene liu.

“Sentimentu nasionalismu no patriotismu ne'e iha ne'ebé? Atu harii rai ida ne'e ho forma kolonializmu foun, ne'e ha'u  la konkorda. Ha'u hanoin maski  ita beik demais, beik demais maibé ita la presiza asesoria ida barak demais," nia esplika.

Tempotimor (Dili) – Atu halo konstrusaun ba Irigasaun Maliana II, Governu Timor-Leste presiza halo akordu hamutuk ho Governu Indonézia. Razaun, tanba bee ne'ebé atu tama ba irigasaun Maliana II mai husi mota ida ne'ebé baliza entre TL-Indonézia.

"Irigasaun Maliana II ne'e, iha loos mota ida ne'ebé baliza entre TL no RI. Bainhira ninia dezeñu kompletu, ami rasik haruka ba MNEK depois kopia mós ba Embaixada Indonézia iha Dili, para oinsá  iha koordenasaun ho parte Indonézia,” dehan Diretór Nasionál Irigasaun no Jestaun Bee (DNIJB), Martinho Laurentino Soares iha salaun João Paulo II, Comoro, Sesta (22/11/19).

Tuir Martinho, iha parte Indonézia nian, bee suli di'ak tebes. Maibé, parte Timor-Leste seidauk. Nia dehan, tanba atu halo barajem ida, presiza akordu ho parte Indonézia.

"Bainhira koordenasaun la'o loos ona, bee ba irigasaun ne'e sei fahe malu ho Indonézia," dehan Martinho.

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« January 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks