“Prezidente dehan katak UNICEF sai hanesan parseiru xave hodi apoia iha Governu-nia implementasaun prioridade prezidensiál prinsipál sira: reduz mánutrisaun infantil (espesialmente raes-badak) liuhusi investe iha loron 1000 iha dahuluk, no oferese asesu ba pre-eskolar ba labarik hotu tinan 3 to’o 5”, dehan Country Reprezentative UNICEF Timor-Leste, Bilal Durrani, hafoin audénsia ho PR Horta iha palásiu prezidensiál Bairo Pite, kinta (30/06).

Ba preparasaun servisu ida-ne'e Prezidente Repúblika konvida delegasaun husi UNICEF ne'ebé lidera husi Bilal Durrani, Reprezentante País UNICEF iha Timor-Leste hodi hamutuk diskute etratejia komprovada no bazeia ba evidénsia atu implementa vizaun Prezidensiál ba Timor-Leste ne'ebé laiha labarik ida mate wainhira moris mai, no labarik hotu saudavel, nutrisaun di’ak, aprende no seguru.

Iha ne'e, Prezidente Repúblika mós hato'o agradese ba entidade ne'ebé mak servisu ba labarik sira iha Timor-Leste hahú restaurasaun independénsia iha área saúde inan no labarik, nutrisaun, edukasaun, no politika sosiál no protesaun nian.

Ba kolaborasaun ida-ne'e reprezentante UNICEF iha Timor-Leste mós hato'o sentimentu orgullu atu kontinua servisu no kolabora hamutuk ho Xefe Estadu atu garante diretu Labarik iha Timor-Leste. (*)