Rogerio, Fruteiru

November 26, 2019

KOSAR  suli ne'ebé la para iha ninia tilun-hun, nia hikis uza ninia liman kabun. Tan de'it atu hola anin uitoan, nia tuur sadere hela iha kadera semente iha Largo Lecidere. Nia liman rua, hadi'a hela tali, ne'ebé kesi tangerinas iha ai-leba.

Rogerio Martins. Estudante ida, husi eskola Ensinu Báziku iha Munisípiu Aileu. Nu'udar fruteiru, atividade negósiu ne'e, nia halo bainhira eskola ferias.

"Ha'u rasik mak hakarak. Tanba, bele hetan osan no fila ba foho, bele hola roupa no sapatu foun,” hateten Rogerio ba tempotimor.com iha Jardín Lecidere, Segunda (25/11/19).

Tuir Rogerio, aifuan ne'ebé nia fa'an, la'ós tangerinas de'it. Dalaruma nia mós fa'an hudi tasak. “Konforme ba tempu. Bainhira tempu hudi tasak mak barak, ha'u fa'an hudi,” nia dehan.

Bainhira tuun mai Dili, Rogerio hela ho nia maun ne'ebé servisu nu'udar kondutór karreta. Joven ho idade 15 ne'e, la sente kole no baruk atu hakat ba fa'an ninia aifuan iha área Audian, Jardín 05 de Maiu, Hospitál Bidau no Largo Lecidere.  

Nia rasik hatene, rezultadu ne'ebé nia hetan, labele kompara ho kole ne'ebé nia sente. Iha loron ida tomak, Rogerio bele lori fila osan $10. Iha okaziaun seluk, nia bele hetan liu ida ne'e.

"Ha'u la moe ida. Na’ok mak ita moe. Fa'an de'it  ne'e. Kuandu pasa ferias, ha'u mai hela de'it Dili," nia dehan ho hamnasa.

Hadau moris iha Kapitál Dili ho modalidade fa'an aifuan, la'ós problema simples. Loron manas, kosar suli, hadau malu sorte ho fruteiru sira seluk. Seidauk tan, presiza maneira bainhira hasoru ho ema aat sira, ne'ebé gosta hadau sasán no osan husi fruteiru sira.

Rogerio la konta, dala hira ona ema hadau nia aifuan no osan. “Uluk ha'u tauk ho ema sira ne'ebé hadau ha'u nia sasán ho osan. Maibé, agora ha'u la tauk ona. Husik de'it ba. Pasiénsia de'it,” nia hatete.

Rogerio hanesan hatene ona maneira oinsá atu bele sees husi ema sira hanoin aat ne'e. Nia dehan, esperensia ne'ebé nia hetan durante ne'e, hanorin nia atu bele kuidadu nia an, husi ema aat sira.

Dala ruma, provérbiu: O bele kiak, maibé labele sai ema beik mak fó motivasaun ba Rogerio Martins ne'ebé mehi hela atu sai mestre. Tanba, Rogerio konsidera ema hotu tenke matenek. Ho nune'e, nia rasik hakarak aprende esforsu nia moris. Maski, nu'udar fruteiru iha tempu ferias.

Tempotimor (Dili) – Ministru Defeza no Seguransa (MDS), Filomeno da Paixão de Jesus hatete, atu halo kontrolu ba fronteira tasi Timor, presiza iha lejislasaun ne'ebé rigór.

Tuir MDS ne'e, iha ona grupu ne'ebé halo hela estudu ho jurista sira no tékniku sira iha konsellu Ministru nian, hodi estuda kona-ba oinsá mak halo patrollamentu iha tasi ho ró no áero.

"Patrollamentu ba fronteira tasi ninian. Maibé, haree mós ba modalidade no lejislasaun ka dekreta lei ida, atu bele oinsá regula ba movimentu ilegál iha tasi ne'e. Austrália mak kaer ka ita mak kaer. Tanba ne'e, presiza konkordansia mós parte defeza Austrália nian para depois bele kaptura (atividade) ilegál  ne'e oinsa," informa MDS iha Palásiu Governu, Kinta (26/09/19).

Alende ne'e, Ministra Defeza Australia deklara ona katak atu implementa polítika ne'e iha Dezembru 2019. Maibé, depende ba lejislasaun.

MDS afirma, orsamentu ne'ebé atu aloka hodi hola transporte marítima no áero nian, ne'ebé atu halo kontrolu ba tasi Timor ne'e diretamente husi Konsellu Ministru ka Gabinete Primeiru Ministru.

Tempotimor (Dili) – Komunidade Suku Madohi, liuliu sira ne'ebé hela iha Aldeia Anin-Fuik, Aldeia 7 de Setembru no Aldeia Rosário, husu ba estadu atu bainhira hasai populasaun husi rai estadu nian, presiza halo uluk registrasaun.

“Komunidade iha intensaun atu kontribuisaun ba dezenvolvimentu Timor-Leste nian. Maibé, presiza mós konsiderasaun husi estadu no Governu,” hatete komunidade Silveiro da Costa iha Sede Aldeia Anin Fuik, Beto, Dili, Kinta (19/09/2019).

Nia dehan, prosesu atu halo registrasaun ba komunidade ne'ebé okupa rai estadu nian ne'e, tenke kria uluk enkontru, atu ema hotu bele hato'o nia hanoin. Hafoin foti desizaun hodi hasai komunidade husi rai estadu. “Labele uza fali sistema radikál para mai hasai, halo ema hotu la satisfeitu," nia afirma.

Tuir Silveiro, bainhira Governu hasai komunidade tenke ho dignu. Atu nune'e, komunidade labele sai vítima ba prosesu dezenvolvimentu ne'ebé la'o iha rai laran.

Entretantu, reprezentante Diresaun Sistema Nasionál Cadastro (SNC), Felicidade M. Ximenes afirma, iha prosesu atualizasaun ida ne'e atu fahe informasaun kadastrál anteriór nian ba komunidade sira.

"Ohin ami mai fó informasaun ba komunidade sira iha Suku Madohi, Posto Administrativu Don Aleixo. Liuliu iha Aldeia tolu hanesan Anin Fuik, 7 de Setembro no Rosário ne'ebé hela iha rai estadu nian, atu bele halo registrasaun hodi estadu bele hatene uma-kain hira mak durante ne'e okupa," Felicidade hateten.

Ho ida ne'e, tuir Felicidade, prosesu alargamentu ba Aeroporto ne'e la'o, sei hasai populasaun sira ne'ebé okupa rai refere tuir lei no sistema ne'ebé iha ona.

Maski nune'e, komunidade sira ne'ebé hetan afetadu husi rai estadu, seidauk klaru tanba foin mak halo prosesu rejistrasaun.

KSOLOK seremonia tinan 20 referendu ka Konsulta Populár, liu tiha ona. Timoroan, liuliu estranjeiru sira ne'ebé hetan rekonesementu no valorizasaun ba sira-nia kontribuisaun ba rai doben ida ne'e mós, fila hotu ona.

Maski nune'e, iha naran ida ne'ebé komisaun organizadora tinan 20 referendu haluha tiha husi lista naran konvidadus estranjeiru sira. Ema ne'e, loloos hetan mós kondekorasaun iha seremonia tinan 20 referendu ka Konsulta Populár.

Saskia Kouwenberg. Feto Olanda ida ne'ebé brani duni. Sei la'ós tan Saskia, mundo internasionál sei la hatene, saida mak akontese iha masakre Santa Cruz, 12 Novembru 1991. Ho ninia brani, Saskia konsege lori sai husi Timor, kasete gravasaun video Max Stahl nian iha Santa Cruz.

“Saskia feto brani tebes no determina subar kasete iha nia roupa laran hodi nune'e mundo bele haree imajen 12 Novembro nian,” hatete A.F de Sa, ema ne'ebé koñese Saskia liu husi istoriador balun.

Tuir fontes ne'e, estadu Timor-Leste kondekora ona ema barak. Maibé, ema ne'ebé merese liu, barak mak estadu haluha ou la hatene, nune’e ladauk valoriza sira nia kontribuisaun inklui Saskia.

Konvite ne'ebé Komité Popular fó sai, Segunda (09/09/19) hatete, komité ne’e sei oferese Prémiu Populár ba Saskia.

“Hanesan Timoroan barak hatene katak mana Saskia (Jornalista Freelance iha tempu ne’ebá) mak lori sai filmajen 12 Novembru 1991 nian ne’ebé Jornalista Max Stahl halo no subar hela iha rate laran, tanba tauk Militár Indonézia hadau husi nia,” hakerek konvite ne'ebé fó sai husi Komité populár.

“Mana Saskia lori sai Filme ne’e ho maneira brani no determinadu. Lori ba hatudu iha nasaun boot sira ne’ebé antes ne'e apoiu Indonézia nia okupasaun. Ikus mai nasaun hirak ne'e muda sira-nia pozisaun, fó sansaun ba Indonézia no apoiu ba Timor-Leste nian auto-determinasaun,” hakerek anunsiu komité populár.

Komité Populár sei oferese prémiu rekoñesimentu nian ba Mana Saskia. Ba nia dedikasaun sira ne’ebé nia halo ona ba rai doben Timor Lorosa’e,” komité populár hatete.

Entrega prémiu populár  ba Saskia ne’e sei realiza iha Komité 12 Novembru, Balide, Tersa (10/09/19) tuku 9.30 OTL.

Tempotimor (Dili) – Impase Polítika iha rai-laran, a finál da'et hotu ba problema eletrisidade mate-lakan, ne'ebé rezulta halo populasaun barak ninia sasán eletrisidade sira, aat no kema saugate de'it.

"Ita iha tinan rua liubá, laiha osan atu halo manutensaun no atu hola ekipamentus. Armajen mamuk. Nia impaktu mak ahi mate-lakan," dehan Diretora Jerál Eletrisidade, Arlinda M.R.F.F. Miranda ba tempotimor.com no Jornál Independente iha ninia knaar fatin, Kaikoli, Dili, Kuarta (27/11/19).

Nia relata, kuandu eletrisidade mate ona mak foin ba halo atendementu. Kuandu lakan hela, husik hela de'it. Tanba laiha ekipamentus rezerva atu halo atendementu ho di'ak.

Arlinda afirma, kauza seluk ne'ebé halo ahi mate-lakan mak sasán ne'ebé avaria no distribuisaun uza sistema manual.

“Entaun, bainhira avaria iha parte ruma, parte téknika sira sei ba buka tuir mak foin halo atendementu,” nia esplika.

Sasán Aat

Alende ne'e, ba tempotimor.com populasaun iha Becora, J. Rigoberto (52) kestiona kona-ba ninia sasán eletrisidade hanesan jeladeira ka kulkas no kipas angin nomos sasán sira seluk, ne'ebé estraga, rezultadu husi ahi mate-lakan.

“Ahi mate-lakan hela de'it hanesan ne'e, halo ami populasaun nia sasán sira estraga hotu. Ha'u mós lahatene, sei ha'u lori sasán hirak ne'e ba reklama iha EDTL, kariik bele iha hanesan kompesasaun ka lae?” José hatete.   

Nia esplika, iha parte seluk, kondisaun ahi mate-lakan hela de'it hanesan ne'e, halo komunidade sira sente la hakmatek.

“Kalan-kalan ita tenke hadeer. Tanba, bainhira ahi mate-lakan hela de'it, provoka na’ok-teen sira bele tama uma na’ok ita-nia sasán balun,” nia hatete.

JSTempotimor (Dili) – Ekipa husi Ministeriu Ensinu Superior Siensia Kulturál (MESSK), Tersa (01/10/19) halo fiskalizasaun ba Universidade João Saldanha ka João Saldanha University (JSU), ne'ebé to'o agora seidauk hetan lisensiamentu husi Ministériu Edukasaun (ME).

Ba jornalista, Ministru Ensinu Superior Siensia Kultura, Longuinos dos Santos informa, objetivu husi fiskalizasaun ne'e atu observa direta ba pedidu ne'ebe mai husi JSU.

"Ami ho ekipa avaliadór sira mai, hodi bele observa direta pedidu ne'ebé Universidade João Saldanha hatoo ona, hodi bele hetan lisensiamentu," MESSK hatete iha JSU, Bekora.

MESSK dehan, universidade hotu-hotu atu hetan lisensiamentu tenke prenxe uluk lai kriteriu sira ne'ebé iha ona.  "Enkuantu atu fó lisensiamentu tenke prenxe kriteriu tolu mak hanesan; rekursu umanu, kurikulu no infraestrutura," nia esplika.

Iha fatin hanesan, Sekretariu Fundasaun Universidade João Saldanha, Ildefonso Soares informa, nu'udar instituisaun foun, ninia parte tenke prenxe duni kriteriu husi MESSK.

"Ami nu'udar instituisaun foun, tenke prenxe duni kriteriu husi MESSK nian, hodi bele garante kualidade ensinu superiór," Ildenfonso dehan.

Tempotimor (Dili) – Ministru Reforma Lejislativa Asuntu Parlamentar (MRLAP), Fidelis Manuel Leite Magalhães hatete, ezekusaun Orsamentu Jerál Estadu (OJE) tinan 2019 MRLAP nian, atinje ona %80.

"Ezekusaun OJE 2019 MRLAP rasik ne'e atinje ona %80, ne'ebé ezekusaun ne'e haree ba nia rítmu saudavél loos no kumpri kalendáriu ne'ebé sira ne'ebé la'o," hatete Fidelis iha Parlamentu Nasionál (PN), Tersa (24/09/19).

Nia afirma, atividade ne'ebé MRLAP halo durante ne'e mak halo esbosu lei sira no seluk tan.

"Buat ne'ebé mak MRLAP halo mak iha proposta lejislativa, bainhira diskusaun orsamentu prezensa husi MRLAP nian, kontribui ba halo programa reforma administrativa ne'e MRLAP nian. Esbosu lejislativa ne'ebé mak sei aprezenta iha Setembru, esbosu ba kuadru legais sira sei aprezenta Iha Outubru. Ne'e esforsu ida ne'ebé mak MRLAP halo," dehan Fidelis.

Nia afirma, bainhira asume pasta interinu ba MKAE no MTCI servisu mak hala'o enkontru barak hodi aumenta ezekusaun.

"Bainhira ha'u asume kargu hanesan Ministru interinu ba MKAE no MTCI atu koordena bar-barak para dudu sa'e ezekusaun, la'os ba MRLAP nian de'it. Maibé, ba mós MKAE no MTCI," dehan Fidelis

Tuir Fidelis, rítmu ezekusaun nian komesa la'o di'ak tanba balun iha de'it %30, maibé komesa iha ona mudansa. Nune'e hein katak iha tinan ne'e nia rohan, bele atinje ona %50 ba leten.

Tempotimor (Dili) – Ekipa Planeamentu Estratéjiku Forsa Defeza Timor-Leste (EPE-FDTL), Kuarta (11/09/19) aprezenta Konseitu Estratéjiku Militár nian ba Konsellu Ministru, ne'ebé  Governu aprova ona iha tinan 2016.

"Ami mai aprezenta ida ne'e, para Governu aprova depois lori ba Konsellu superiór Defeza depois prezidente halo pareser para aprovasaun, para oinsá dezenvolve forsa armada hahú  husi ohin," dehan Diretór Planeamentu Estratéjiku Forsa Defeza Timor-Leste, Iginio das Neves iha Palasiu Governu

Diretór ne'e afirma, liuhosi planu ne'e atu hadi'a forsa armada nia kualidade iha futuru. "Muda hahú husi nia estrutura rasik, forsa ne'e koloka iha territóriu ne'e oinsá, futuru Timor ne'e sai oinsá, define nia misaun depois kria nia senariu sira atu forsa iha kapasidade, para aban bainrua bele halo nia misaun susesu, defende ita nia territóriu ne'e oinsa," Neves esplika.

Iha aprezentasaun planu ne'e, Primeiru Ministru Taur Matan Ruak rekomenda atu kada tinan preve osan hodi bele dezenvolve F-FDTL.

"Rekomendasun mai husi sua eselensia Primeiru Ministru nian, la'ós atu haree de'it dispozisaun forsa nian iha fatin-fatin. Mas estudante ona oinsá mak atu tau osan tinan-tinan para depois bele dezenvolve forsa armada ba oin," Neves haktuir.

Nia dehan, husi rekomendasun ne'ebé mak Primeiru Ministru enkamina, parte ekipa planeamentu estratéjiku FDTL sei estuda atu bele haree ba forsa armada nian dezenvolvimentu ba oin.

Planu Estratéjiku Forsa Defeza Timor-Leste nian ne'ebé ekipa planeamentu estratéjiku  aprezenta, hetan ona aprovasaun husi Konsellu Ministru. Hein de'it husi Prezidente Repúblika.

Tempotimor (Dili) – Jornalista Max Stahl sente orgullu no previleziu bele hetan Colar Orden Timor-Leste husi estadu Timor-Leste, atu bele rekoñese liután ninia kontribuisaun.

"Ha'u agradese ba Prezidente Repúblika nia inisiativa. Ha'u agradese mós  ba povu Timor-Leste, tanba ha'u mai iha ne'e buka istória no luta, konaba direitus umanus. Maibé, ha'u aprende buat barak kona-ba realidade liuhosi timoroan sira. Ha'u hetan previleziu bo'ot hodi hasoru sira," dehan Max Stahl hafoin simu kondekorasaun Colar Orden Timor-Leste iha Palásiu Prezidensiál Bairru-pite, Sexta (22/11/19).

Iha okaziaun ne'e, Prezidente Repúblika (PR), Francisco Guterres Lú Olo iha ninia deskursu hateten, seremonia entrega prémiu ne'e nu'udar PR ninia inisiativa rasik. Ne'ebé ho responsabilidade tomak, ho povu no estadu Timor-Leste nia naran, kondekora Max Stahl ho Kolar Órden Timor-Leste.

“Ha’u halo ida ne’e, ohin, ho emosaun kle'an ba rekoñesimentu ba buat hotu ne’ebé belun ne’e halo to’o ohin loron ba nasaun no povu ida ne’e. Belun ne’e mós tulun  ita kore-an hosi dominasaun estranjeira kruel ida,” PR Lú Olo hatete.

Importante, tuir PR, hanoin hikas ninia aten brani boot atu filme iha loron ne’ebé hahalok aat oioin, akontese ba joven sira ne’ebé labele defende-an ho kbiit rasik.

Max Stahl, tuir PR, mai atu halo filme. Maibé, nia fó nia isin no klamar tomak ba Timor-Leste livre no independente. Ohin loron, PR hatete, Max Stahl hela iha Timor-Leste ho nia família no kontribui maka’as tebetebes atu hasa’e nível profisionál ba repórter sira.

“Estadu Timor-Leste, kondekora ona iha 2009  ho Ordem de Timor Leste, grau insígnia. Tinan ida ne’e, PR rasik deside kondekora ho Colar Ordem Timor-Leste. Tanba rekoñese nia servisu ho méritu estraordináriu ba Timor-Leste, iha ámbitu hakerek iha artigu 2 husi Dekretu-Lei númeru 20/2009, 6 maiu, ne’ebé define kondisoins elijibilidade atu fó Ordem Timor-Leste,” hatete PR.

Tempotimor (Dili) – Selebrasaun 12 de Novembro ba tinan 2019 Comite 12 Novembro entrega direita ba Governu hodi jere aktividades hotu-hotu.

Iha tinan ida ne'e, Governu mak sai hanesan uma na'in no sai mós komisaun ba selebrasaun loron espesiál 12 de Novembru.

"Comite 12 de Novembro sei apoiu hanoin no planu programa ruma.Tanba ne'e, aktividade ka programa entrega ba Governu liuhosi Sekretáriu Estadu Juventude Desportu (SEJD) mak sei jere. comite hanesan tau matan de'it," dehan Xefe Administrasaun Comite 12 Novembro, Rogeiro Castro da Cruz iha Sede Comite 12 Novembro, Balide, Tersa (24/09/19).

Nia hatutan, komite 12 Novembro nu'udar autór ba komemorasaun ne'e. Tanba ne'e mak komite konvida parte seluk atu jere.

"Tamba Comite 12 Novembro hanesan autór depois kada tinan husi komite mak konvida fali ema no jere fali atividades ne'e ladún di'ak. Nune'e, tinan ida agora entrega ba Governu no jerasaun foun sira mak jere," Rogeiro relata.

Relasiona ho komemorasaun loron nasionál juventude ne'e, tuir Rogerio, Governu mak hatene. Nia dehan, orsamento ba atividade ne'e bele $ 80.000 no bele mós to'o $ 100.000).

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com