Diretór Jerál Dezentralizasaun Administrativa, Belarmino Filomeno Neves, hatete, komputadór ne'ebé Governu fahe ba Suku sira, instala hotu ona ho sistema, tanba ne'e sei formasaun Pesoál Administrasaun Suku (PAS) hafoin utiliza ba servisu administrasaun nian.
"Hein agora oinsá koñesementu ba nia sistema, prepara ona, fulan ne'e ou fulan oin ita hala'o formasaun ba ema ne'ebé Xefe Suku sira hatudu atu opera komputadór," dehan nia iha salaun apuramentu Baukau, tersa (07/06).
Formasaun ne'e, lolos realiza tiha ona, maibé impata husi eleisaun Prezidénsial primeiru volta no segundu volta, inklui seremónia investidura ba Prezidente Repúblika foun.
Maibé, dadaun, ékipa Ministéru Administrasaun Estatál, halo ona koordenasaun ho apoiu administrasaun Suku no mós unidade informátika atu lansa formasaun, ne’ebé utiliza fundus husi kapitál umanu.
"Formasaun ba Xefe Suku, minimu loron 5 masimu loron 10, nune'e sira intende di’ak iha nia operasionalizasaun ho di’ak," nia argumenta
Nune’e, unidade informátika ho ajénsia Teknolojia Informasaun no Komunikasaun (TIC-sigla portugés), prepara ona matéria importante balun, ne'ebé kona-ba sistema administrasaun nian.
Entertantu tinan-2021, Governu liuhusi Ministéru Administrasaun Estatál (MAE) sosa komputadór hamutuk 452 ba Munísipiu 12 inklui Oe-cusse ho orsamentu União Europeia ba Timor-Leste, direitamente ba sistema Orsamentu Jerál Estadu 2021 ho montante US$2.000,500. (*)