Tuir Xefe Suku Souro, Estevão da Costa Perreira katak, Aldeia ne'ebé seidauk asesu ba eletrisidade mak, Omokanu iha xefe família hamutuk 89 no Sorlau ho xefe família 68.

"Dadaun, kalan sira uza minarai, lilin, balun osan iha mak sosa solar panel," dehan nia iha Suku Ostiko, Postu Administrativu Baukau Vila, sesta (10/06).

Alende ne’e, iha Aldeia Nanakoru ho xefe família 121, Foema ho xefe família 119 no Omokanu 89 mak seidauk asesu ba bee moos.

Preukupasaun ne'e, iha tinan 2012, parte Suku hato'o ona proposta liuhusi Administradór Munísipiu Lautém hodi enkamiña ba Nasionál, maibé to'o agora laiha rezultadu.

"Ha'u tenta beibeik para komunidade bele asesu, sira la responde mós ha'u tenta beibeik," nia argumenta

Nune'e mós, komunidade husi Suku Ililai, Postu Administrativu Lospalos, Jelita Sarmento, informa, bee moos no eletrisidade dadaun sai preukupasaun boot ba komunidade sira.

"Ha'u nu’udar estudante sente triste, tanba kalan estuda ladi'ak, bee moos laiha, ami ba kuru mós la’o kuaze kilomentru 4 mak foin to'o bee matan," nia akresenta

Suku Souro kompostu husi Aldeia 7, hanesan Louru, Nehete, Nanakoru, Foema, Omokanu, Sorlau, no Cevasa, ne’ebé ho xefe família 980 no populasaun hamutuk 5.125. (*)