Tempotimor (Dili) – Oitavu Governu konstituisional ne'ebé lidera husi Primeiru Ministru (PM) Taur Matan Ruak, prevé Orsamentu Jerál Estadu (OJE) tinan fiskal 2020 nian, hamutuk millaun $56 ba Ministériu Solidariedade Sosiál no Inkluzaun (MSSI).

"Orsamentu Jerál Estadu (OJE) 2020 ne'e hamutuk millaun $56, ne'ebé nafatin ba kategória haat mak hanesan saláriu i vensimentu millaun $1.7, bens i servisu milliaun $6.2, transferénsia públika mak boot iha milliaun $50 no tau uitoan iha kapitál menór," dehan Vise Ministra MSSI, Signi Chandrawati Verdial iha Parlamentu Nasionál (PN), bainhira hala'o audiénsia ho Komisaun C no F iha PN, Kuarta (06/11/19).

Tuir Signi, MSSI tau osan uitoan ba Kapitál Menór para hodi hola fali transporte ba servisu nian, bainhira aat ona.

"Tau uitoan ba Kapitál Menór para karik karreta funeráriu aat ona, motor ladi'ak entaun ita iha planu tinan oin hola karreta kuaze 60 ba servisu na'in sira iha munísipiu, komputador sira liu tinan sanulu, balun aat ona, inklui meza no kedeira," dehan Signi.

Nia afirma, iha tinan 2018 tau duni osan millaun $40. Maibé hola tiha kareta ba Komisária Direitu Labarik, entaun tinan 2020 nian sa'e uitoan.

Nia komenta, tinan 2020 MSSI iha programa boot balun ne'ebé iha ona. “Programa prioridade ida mak ita nia Institutu Seguransa Sosiál ne'ebé di'ak ba ita hotu. Ita hakarak asegura sustentabilidade, inklui ita hakarak promove inkluzaun sosiál, liuliu grupu feto ne'ebé mak vulneravel sira, bele hola parte iha dezenvolvimentu," dehan Signi.

Tempotimor (Dili) – Parlamentu Nasionál (PN), Tersa (17/09/19) aprova iha faze jeneralidade ba Orsamentu Privativa ba Parlamentu Nasionál ho montante tokon US$ 17.9 ba tinan 2020.

Iha debate jeneralidade ba Orsamentu Privativa ne'e, Prezidente Parlamentu Nasionál, Arão Noe de Jesus da Costa Amaral katak, planu inisiál ne'ebé mai husi komisoens sira hotu, submete mai Konsellu Administrasaun PN kuaze tokon ruanulu resin.

"Osan ne'ebé mak submete mai ne'e, kuaze Millioens US$ 20 resin. Ne'ebé, ami konsege lori to'o mai iha Konsellu Administrasaun PN nian, depois konsege halo diskusaun no reduz. Ikus mai hetan millioens US$ 17,9 ba planu orsamentu ne'ebé mak aprezenta iha plenaria hodi debate," dehan Arão Noe iha PN, Tersa (17/09/19).

Husi totál orsamentu ne'ebé PN iha, konsege hetan ona aprovasaun iha faze jeneralidade ba projeitu rezolusaun PN numeru 35/V (II), husi deputadu 51 ho votus a favor 35, abstensun 12 no kontra 4.

Tempotimor (Dili) – Deputadu Francisco Miranda Branco husu ba povu Timor-Leste atu deside ba moris di'ak liuhosi eleisaun. Tanba, tuir Branco, Partidu Aliansa Maioria Parlamentar no Aliansa Mudansa ba Progresu (AMP) ukun tinan 10 ona, maibé povu kontinua moris iha liña pobreza.

"Polítika orsamentál tinan sanulu, la fó orientadu ba ema nian moris. Realidade mak ita haree rasik, ita nia povu nia moris oinsá. Depois ita gasta tiha osan husi fundu minarai kuaze billioens $12-14 ne'ebé gasta tiha ona no rezultadu ladún di'ak," dehan Vise Prezidente Bankada FRETILIN ne'e, iha Parlamentu Nasionál, Kinta (03/10/19).

Nia afirma, maski Governu AMP gasta ona orsamentu estadu husi billioens $12 to'o 14, maibé rezultadu povu kontinua ki'ak no parte agrikultura iha tinan sanulu Governu la tau importánsia.

"Rezultadu husi billioens $12-14 ne'e, la hatudu impaktu ba setór sira ne'ebé fó benefisia diretamente ba povu nia moris, no setór agrikultura ne'ebé populasaun pursentu 70 moris nu'udar agrikultór, orsamentu durante tinan 10 la fó importansia," Branco hatete.

Produtu ne'ebé bele dezenvolve iha Timor-Leste ne'e halo povu no nasaun depende totál ba produtu  importasaun husi rai liur, inklui setór sira seluk ne'ebé Governu la tau importansia.

"Setór edukasaun kontinua namlele, setór saúde loloos Governu labele depende ona ba nasaun seluk, maibé to'o ohin loron ita kontinua halo transferénsia pasiente ba rai liur, tanba ita la prepara rekursu umanu no materiais ba ospitais sira," nia afirma.

Deputadu ne'e dehan átu hasai povu husi liña pobreza, povu mak tenke deside liuhusi eleisaun.

"Futuru ne'e, tenke liuhusi Eleisaun Jerál, povu mak tenke hatene hodi marka diferénsia ne'e. Kaer ukun, depois estadu no povu nia moris kontinua hanesan ne'e. Povu mak tenke deside. Povu mak tenke fó sentensa, katak ida ne'e ukun laloos. Ita tenke fó hanesan ne'e. Fó kastigu. La vota ba sira.  Ne'ebé, povu mak deside," Branco hatete.

Tempotimor (Díli) – Lixu ne'ebé soe naklekar de'it iha área merkadu Taibessi, fó impaktu ba negosiante sira ne'ebé hela iha área merkadu ne'e nia saúde.

Negosiante Apolinario Castro Baptista hatete, foer ne'ebé soe namkari iha área merkadu ne'e to'o dodok, iis no ular.

"Foer hanesan ne'e fó impaktu boot ba ami iha ne'e. Halo ami atu han mós ladi'ak, tanba foer ne'ebé soe arbiru to'o dodok, iis no sai ular,” tenik Apolinario, Sabadu (07/09/19) iha merkadu Taibessi.

Kona-ba oráriu parte saneamentu raut lixu hirak ne'e, tuir Apolonario semana ida dala ida. Nia dehan, bainhira parte saneamentu la ba raut fo'er, negosiante sira mak raut rasik foer ne'ebé dodok ona ne'e.

"Sente ladún di'ak. Tanba foer iha ne'e bainhira nakonu no iis ona, ami rasik suru hodi ba soe. Sujere mós ba ministériu relevante tenke tau atensaun hodi haree servisu saneamentu nian,” Apolonariu husu.

Alende ne'e, negosiante seluk Antonio Gonçalves hatete sira mós preokupa ho sanitasaun báziku iha merkadu ne'e, hanesan hariis fatin. Tuir Apolonariu, hariis fatin ne'ebé iha la favorese.

"Hariis fatin ida agora ne'e, ema barak mak uza hodi hariis no fase roupa. Balun odamatan laiha ona. Bainhira ema barak, tenke hein malu tanba odamatan laiha," Antonio Gonçalves dehan.

Tuir Antonio, hariis fatin ne'ebé negosiante sira utiliza ne'e selu. Maski ho nia presu la hanesan, maibe balun odamatan kontinua aat.

"Hariis fatin ne'e selu, bainhira ami uza hodi hariis no fase ropa. Hariis dala ida, selu 25 centavus, fase roupa 50 centavos. Hariis fatin refere, sempre loke ba negosiante hotu iha merkadu ne'e. Maibé, too 12 oras kalan taka. Tanba sekuriti sira uza. Entaun dadeer mak bele loke fali," Antonio haktuir. 

Rekoñese 

Iha fatin seluk, Diretor Saneamentu Munisípiu Díli, Domingos dos Santos Soriano rekoñese kona-ba servisu saneamentu nian iha públiku.

“Lixu ne'e, ami bele esforsu oinsá mós lixu iha hela de'it. Maibé, esforsu Governu nian ne'ebé iha. Ami depende hotu de'it ba komunidade. Tanba ne'e, bainhira ita nia komunidade iha konsiensia aas, lixu mós sei menus," Domingos afirma.

Diretór ne'e mós rejeita kona-ba negosiante sira nia deklarasaun katak, semana ida parte saneamentu Munisípiu Díli, raut foer dala ida iha Merkadu Taibessi. Tuir Domoingos, ida ne'e laloos.

“Tanba, kada loron kareta saneamentu nian sempre ba raut fo'er. Maibé, konsiensia negosiantes iha área ne'ebá nian mak menus,” Domingos haktuir.

Tempotimor (Díli) – Ministériu Solidariedade Sosiál no Inkluzaun (MSSI), Armanda Berta rejeita apoiu foos ho kondisaun dodok ba sarani iha Parókia Nossa Senhora do Rosario de Fatima, Iliomar, Munisípiu Lautem.

"MSSI seidauk fó foos aat ba komunidade sira hotu. Inklui mós ba komunidade iha Iliomar. Ida ne'e ita tenke halo investigasaun. Tanba, MSSI nunka prepara foos ne'ebé ladi’ak ba komunidade,” afirma MSSI, Armanda Berta iha salaun MSSI, Kinta (05/05/19).

Armanda dehan, nia laran triste ba ema sira ne'ebé halo polítika tun-sa'e ba apoiu ne'e, Apoiu ne'e, tuir Armanda la'ós foin dala uluk nian. 

"MSSI la'ós foin dala uluk fahe foos ba komunidade. Maibé, ita fahe ona foos ne'ebé di'ak ba komunidade iha munisípiu 13. Ministériu mós sei prosesu hela ai-han ne'ebé distribui ona ba komunidade. Presiza tebes atu hadi'a fali  jestaun sira ne'e ho di'ak, hodi bele haree ba ita nia maluk sira ho dignu, iha nasaun ida ne'e," Amanda hatete.

Alende ne'e, Fernando Cardoso de Deus, membru Komisaun Organizadora ba eventu Krús Joven iha Parókia Nossa Senhora do Rosario de Fatima, Iliomar deklara katak MSSI apoiu foos saku neenulu (60) ho kondisaun dodok ba sarani sira iha Iliomar.

“Foos ne'e Governu apoiu ba sarani. Sarani ne'e ema. La'ós animal. Tuir loloos, foos ne'e fó  han ba animál. Ha'u moe liu fali Governu ne'e. Tanba foos ne'e aat no atu soe ona," Fernando tenik, Kuarta (28/08/19) liubá.

Nia dehan, nu'udar membru Komisaun Organizadora ba eventu Krús Joven iha Iliomar, nia preokupa no laran triste tebes ho foos ne'ebé mak apoiu husi MSSI hamutuk saku neenulu (60), maibé ho kondisaun aat no dodok.

Tempotimor (Dili) – Membru Parlamentu Nasionál husi Komisaun D, Mariano Assanami Sabino sujere ba Governu atu buka fali aviaun seluk, hodi troka aviaun Sriwijaya Air ne'ebé remata ninia operasaun iha Timor-Leste (TL).

"Ne'e la'ós problema murni bisnis loos de'it. Maibé, intervensaun Governu ne'e importante. Governu presiza ona tau aviaun no servisu ho seitór privadu atu identifika aviaun. Para ita bele utiliza ona aviaun hirak ne'e ho aluga de'it. Iha tinan lima kuandu la uza ona, bele troka," dehan Mariano iha Paralamentu Nasionál, Segunda (11/11).

Nia dehan, TL tenke iha folin billete aviaun ne'ebé tuun. Tanba, estadu ne'e tenke garantia sidadaun ne'ebé sa'e aviaun. Katak, aviaun mós tenke seguru, folin ne'e natón para halo koneksaun ho rai liur no ba rejiaun ida ne'e.

Tuir Mariano, responsabilidade Governu nian importante iha seitór ida ne'e. Nia dehan, impaktu husi Sriwijaya Air hapara ninia operasaun, bele iha. Maibé, responsabilidade Governu para buka lalais aviaun seluk, hodi troka.

"Iha problema seluk, tenke kria kondisaun para pasajeiru ne'e tenke barak la'ós de'it iha Timor. Maibé, halo ema liuhosi Timor sai tranzitu ne'e mak importante," nia sujere.

Prezidente Partidu Demokrátika (PD) ne'e espera, bainhira pasajeiru barak no aviaun ne'e mós iha rendimentu di'ak, sei mantein halo manutensaun, bele nafatin semo ba mai Timor-Leste.

Tempotimor (Dili) – Traballadór sira ne'ebé durante ne'e servisu iha Kompañia Miramar Blok, ejize ba kompañia nain atu esplika razaun fundamentál ne'ebé hapara sira husi kompañia refere.

"Objetivu husi enkontru ne'e, atu halo aproximasaun ba Kompañia Miramar Blok ho traballadores sira, kona-ba problema entre kompañia Miramar Blok ho ninia traballadores hamutuk na'in 12," dehan Manajer Kompañia Miramar Blok, Osvaldo Tavares iha eskuadra PNTL Munisípiu Dili, Kuarta  (25/09/19).

Nia dehan,  iha aproximasaun entre Kompañia Miramar Blok ho traballadór sira hatudu rezultadu pozitivu husi parte rua.

"Husi aproximasaun ne'e, hatudu rezultadu positivu tanba parte rua simu malu ho di'ak hodi halo koordenasaun ba malu, hodi bele hetan solusaun di'ak husi problema ne'e," dehan Osvaldo.

Iha fatin hanesan, portavóz Sindikatu Jerál Traballadores Timor-Leste (SJTL), Criscencia de Fatima Freitas katak, iha aproximasaun entre kompañia Miramar Blok no traballadór mak laiha solusaun, sira kontinua ejize atu hetan resposta.

"Ohin enkontru ne'e mak laiha solusaun, ami sei ejize nafatin ba kompañia Miramar Blok. Maibé, mak laiha nafatin, ami sei halo asaun greve," nia afirma.

Entretantu, traballadór Fidelino Araújo informa, durante ne'e sira tenta halo negosiasaun ona ho kompañia. Maibé laiha rezultadu.

"Ami hato'o ba Sindikatu hodi buka dalan ne'e, hodi rezolve negosiasaun entre kompañia no traballadór sira ne'e bele simu malu ona, hodi rezolve iha loron Segunda semana oin," nia afirma.

Tuir ninia parte, Fidelino dehan, kompañia halo ona violasaun ba sira nia direitu tanba ko'a  traballadóres sira nia saláriu tuir nain husi kompañia nia hakarak.

"Kompañia viola ami nia direitu kona-ba ami nia kontratu ho saláriu ne'ebé hetan ko'a tuir sira nia hakarak no hapara ami nia servisu iha loron 7 fulan Agostu too agora," nia komenta.

Tempotimor (Dili) –  Sensus Agrikola ne'ebé hala'o durante fulan ida ona foin mak atinje % 22. Maski, membru sira difikulta iha prosesu haruka dadus mai nasionál.

“Purtantu, ita haree ba progresu sira ne'ebé mak iha, to'o Segunda ita iha ona % 22 mak entrevistadu ona. Tuir loloos besik fulan ida ona, tenke atinje pursentu 50. Maibé  to'o agora seidauk," hatete Diretór Jerál Estatísitika, Elias dos Santos Ferreira iha nia knaar fatin, Kaikoli, Dili, Tersa (10/09/19).

Nia informa, dadus husi suku sira ne'ebé tama ona iha nasionál  kuaze pursentu 80. Entaun, falta pursentu 11 mak seidauk tama. Maski nune'e, sensus agrikola tenke termina iha 12 Outubru 2019.

Hatán kona-ba difikuldade ne'ebé ninia membru sira hetan iha treinu, Elias hatete iha semana kotuk sira haruka ona sira-nia master training ba akompaña intervistador sira ne'ebé servisu iha munisípiu.

“Tanba intervistadór balun hetan problema kona-ba oinsá bele haruka dadus mai nasionál. Iha sensus ida ne'e ami uza teknolojia Computer Assistant Personal Interviewing (CAPI). Purtantu, entrevista iha dadeer, loraik ne'e haruka kedas mai nasionál," Elias haktuir.

Ministériu Agrikultura no Peskas (MAP) hamutuk ho Diresaun Jerál Estatístika hala'o Sensus Agrikula ba dahuluk iha Timor-Leste, depois Timor-Leste restaura nia independensia.

Tempotimor (Dili) – Prezidente Autoridade Munisípiu Baucau, Antonio Guterres hatete, populasaun Munisípiu Baucau ne'ebé iha tempu barak la asesu ba eletrisidade, ikus mai hela de'it %18 hodi kompleta %100.

"Infraestrutura báziku iha Munisípiu Baucau iha avansu mak eletrisidade. Tanba iha ona %82. Ita iha aldeia 281, entaun iha aldeia 228 mak eletrisidade kobre ona, hetan naroman ona. Maibé, ba nivel suku ne'e suku tolu mak seidauk asesu eletrisidade hanesan Ossouala, Namanei no Maluro," dehan Antonio Guterres iha Ministériu Finansas, Aitarak Laran, Sesta (13/09/19).

Alende ne'e, kona-ba bee-moos iha Munisípiu Baucau, komunidade hamutuk aldeia 218 mak konsumu ona bee-moos.

"Eintermus bee-mos, ita nia komunidade sira husi aldeia 281 ne'e, aldeia 218 mak asesu ona ba bee-moos," Prezidente Munisípiu Baucau ne'e realta.

Tuir Antonio, iha tinan rua nia laran, Governu hasoru empase polítika. Maibé, Governu lokál  hamutuk ho parseiru sira hanesan sosiedade sivil, kontinua fornese bee-moos ba komunidade sira iha aldeia 218 ne'ebé asesu bee-mos.

Aldeia hirak ne'ebé to'o oran ne'e seidauk asesu eletrisidade hamutuk aldeia 53, no komunidade aldeia 63 mak seidauk asesu ba bee-mos.

 

Tempotimor (Dili) – Bankada FRETILIN iha Parlamentu Nasionál (PN) liuhosi deputadu Favião de Oliveira hatete, alterasaun ba Lei Pensaun Vitalisia (LPV), kompetensia AMP nian.

"Kona-ba pensaun vitalisia ne'e kompeténsia AMP nian. Tanba uluk, sira dehan iha kampaíña katak, se ami mak manan ka kaer ukun, ami sei halakon lei pensaun vitalisia. Maibé, agora sira mak propoin fali millaun $6, ne'e problema sira nian," dehan deputadu husi bankada FRETILIN ne'e iha Parlamentu Nasionál, Kuarta (04/12/19).

Favião afirma, FRETILIN apoiu totál bainhira AMP hakarak halakon LPV. Entaun, AMP mak ko'alia, AMP mak tenke halo lakon.

"Sira mak ko'alia, sira rasik mak tenke halo lakon.  Tanba ne'e, ami lakohi tau ami nia kanuru tohar. Ida ne'e, kestaun sira nian. Sira rasik mak promete ba povu," dehan Favião.

Hatán ba kestaun ne'e, deputadu CNRT Patrocino dos Reis katak, vizaun hotu la'o ba alterasaun LPV. Maibé, buat hotu la'ós fasíl.

"Vontade hotu iha. Prosesu hotu la'o. Vizaun ne'ebé hateke ba iha ne'ebá, maibé komprimísiu ida ne'ebé atu la'o ne'e la'ós buat hotu fasil, hanesan ita fila ita-nia liman de'it," dehan Patrocino.

AMP uluk kedas iha hanoin atu halakon LPV. Iha kampaíña molok eleisaun, AMP promete atu halakon LPV. Maibé, to'o ohin loron LPV sei nafatin vigora. Aat liu, governu propoin tan millaun $6, hodi sustenta LPV.

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com