Iha Intervensaun, Brigadeiro Jeneràl Cornelio Ximenes "Maunana" hatete, promosaun diviza ba membru navál sira importante, tanba bele aumenta rekursu iha instituisaun F-FDTL liliu iha komponente navál.

"Ohin ha'u fò parabéns ba sira ba kabu, servisu di'ak ba oin nafatin”, dehan Maunana iha seremónia promosaun deviza ba membru Komponentete Forsa Navál Lijeira iha Hera, segunda (25/10).

Maibé louva mós membru komponente navál, tanba durante tuir formasaun deviza ou formasaun sira iha sentru formasaun Metinaro smpre hatudu kualidade ne'ebé di’ak.

"Ha'u rona informsaun katak membru komponente navál ne'ebé konkore ba postu kabu iha sentru instrusaun Metinaro iha kursu dala-tolu ona mas komponente Navál sempre hetan primeiru klasifikasaun”, informa nia.

Tanba ne'e, husu atu membru komponte Navál kontinua hatudu performansaun di’ak nune'e hetan konfiansa nafatin. 

Komandante Komponente Forsa Navál Lijeira, Kapitaun Fragata João da Silva hatete, promosaun deviza membru na’in-24 husi komponente Navál ne'e bazea por eskolla no por antiguidade.

"Sira ne'ebé mak ohin hetan promosaun ne'e balun por eskolla no antiguidade, hanesan haree husi sira-nia hahalok di’ak, tuir instituisaun hakarak, no servisu tuir  institusaun nian hakarak komporta”, dehan nia.

Entertantu membru na’in-24 ne'ebé promovidu husi postu soldadu ba kabu, frekuenta kursu durante fulan tolu iha  sentru formasaun F-FDTL Metinaro.

Promosaun deviza ne'e halo iha komponente Forsa Navál Lijeira Hera, ne’ebé prezide direita husi Brigadeiru Jeneràl Cornelio Ximenes "Maunana" akompaña ho Komandante Forsa Navál Lijeira, Kapitaun Fragata João da Silva, hetan partisipa másimu  husi representa Ministériu Defeza, asesór sira no membru F-FDTL komponete Forsa Navál Lijeira. (*)