Embaixadór Brazíl mai Timor-Leste, Maurício Medeiros Assis hato’o kompromisu ne’e bainhira hasoru malu ho Primeiru-Ministru, Kay Rala Xanana Gusmão, iha Palásiu Governu, segunda (14/08/2023).

“Ha’u mai hasoru malu ho senhor Primeiru-Ministru, Kay Rala Xanana Gusmão ami ko’alia kona-ba posibilidade Timor-Leste no Brazíl halo kooperasaun iha área edukasaun, kooperasaun ida ne’e Brazíl iha tiha ona apoia ba área ne’e iha programa apoia formasaun ba profesór sira, ne’ebé Primeiru-Ministru husu atu kontinua programa sira ne’e hodi ajuda Governu Timor-Leste”, informa Embaixadór Maurício.

Tanba durante ne’e, Governu Brazíl fó ona apoiu ba Timor-Leste iha área formasaun ba profesór sira, médiku, no agrikultura no área seluk tan maka kapasitasaun membru FALINTIL Forsa Defeza Timor-Leste (F-FDTL).

“Ami-rua primeiru-ministru mós ko’alia oituan kona-ba agrikultura, nomós programa importante ida Brazíl nian, hanesan agrikultura no pekuaria, Timor-Leste mós hanesan, setór agrikultura nu’udar setór prioridade governu nian”, hatete nia.

Iha área edukasaun nian, Governu Brazíl fó oportunidade ba juventude hamutuk -300 liu maka hala’o estudu ba área oioin iha universidade sira iha Brazíl.

Ba apoiu no inisiativa hira ne’e, Primeiru-Ministru, Kay Rala Xanana Gusmão, agradese no husu ba Governu Brazíl atu kontinua apoia programa prioridade hirak ne’e tuir polítika governu nian. (*)