Embaixadór Filipina mai Timor-Leste, Belinda Antes hato’o asuntu ne’e durante hasoru malu ho Primeiru-Ministru, Kay Rala Xanana Gusmão hodi kumprimente xefe governu no hato’o planu no programa Filipina nian.

Tanba nasaun Filipina deside sei apoia maka’as Timor-Leste hodi hasa’e rekursu umanu funsionáriu públiku sira no ajuda setór agrikultura sira.

“Agradese tebes, ohin ha’u mai hasoru Primeiru-Ministru halo diskusaun lubuk ida, hodi implementa projetu balun liuhusi koordenasaun ho Governu Timor. Projetu ne’e iha área oioin hanesan dezenvolvimentu rekursu umanu ne’ebé sei fó tuir planu no programa governu nian,” informa Embaixadora Belinda ba jornalista iha Palásiu Governu, segunda (14/08/2023).

Nune’e Governu Filipina komprometidu sei lori investidór Filipina mai investe iha Timor-Leste, tanba prosesu sira ne’e la’o dadaun ona.

“Ami deskute mós posibilidade investidór husi ami nian (Filipina) tama mai Timor-Leste, agora iha hela prosesu, espera ami bele ajuda barak liután iha fulan balun tuir mai”, afirma nia.

Embaixadora Belinda Antes mós agradadese ba esforsu Primeiru-Ministru Xanana ho membru governu sira konsentra maka’as atu rezolve problema sosiál no projetu infraestrutura hirak ne’ebé hetan estragu husi udan bo’ot foin lalais ne’e.

“Loos duni Primeiru-Ministru agora konsentra maka’as hodi rezolve problema doméstika nasaun ida-ne’e, tanba ne’e bele apoiu ba integrasaun ekonomia ho ASEAN, Xanana rekoñese ida-ne’e, liuliu iha rai laran mak área ekonomia mak iha probelma barak”, haktenik nia.

Nasaun Filipina hahú apoiu no realiza konferénsia solidaridade internasionál ba Timor-Leste nia luta ba ukun rasik-an, demokrasia no estadu direitu iha kedas tinan 1994.

Nune’e iha 1999 no 2012, forsa Filipina mós hola parte iha Forsa Manutesaun Paz (United Nations Peacekeeping Missions ih Timor-Leste -UNMIT) no fó apoiu umanitaria ba povu Timor-Leste.

Ho ida ne’e, nasaun Filipina sei kontinua hamutuk ho nasaun membru ASEAN sira seluk hodi fó apoiu ba adezaun Timor-Leste sai membru ASEAN iha 2025. (*)