Ministru Prezidénsia Konsellu Ministru, Hermenegildo Augusto Cabral Pereira Alves “Ágio Pereira”, hatete, konsellu Ministru aprova ona projetu Dekretu-Lei ne’ebé aprezenta husi Ministru Tomás Rosário Cabral, ne’ebé aprova Orgánika Ministériu Administrasaun Estatál nian.

Tanba Ministériu Administrasaun Estatál maka departamentu governamentál ne’ebé responsavel ba konsesaun ezekusaun, koordenasaun no avaliasaun polítika, ne’ebé define no aprova ona husi Konsellu Ministrus, ba área Podér Lokál, desentralizasaun administrativa, apoiu ba organizasaun komunitária, promosaun dezenvolvimentu lokál, organizasaun no ezekusaun ba prosesu eleitorál no referendárius, promosaun ijiene, organizasaun urbana, klasifikasaun no konservasaun dokumentu ofisiál ho valór istóriku.

Nune’e mós aprova projetu Dekretu-Lei, ne’ebé aprezenta husi Gil da Costa Monteiro “Oan Soru”, ne’ebé aprova Orgánika Ministériu Asuntus Kombatentes Libertasaun Nasionál.

Tanba Ministériu Asuntus Kombatentes Libertasaun Nasionál maka departamentu governamentál ne’ebé responsavel ba konsesaun, ezekusaun, koordenasaun no avaliasaun polítika, ne’ebé define no aprova ona husi Konsellu Ministru, ba asuntu antigu Kombatentes Libertasaun Nasionál.

Ikus liu Konsellu Ministrus konsege aprova projetu Dekretu-Lei, ne’ebé aprezenta husi Ministru Donaciano do Rosário Gomes, ne’ebé aprova Orgánika Ministériu Defeza.

Ministériu Defeza maka departamentu governamentál ne’ebé responsavel ba konsesaun, ezekusaun, koordenasaun, avaliasaun polítika, ne’ebé define no aprova ona husi Konsellu Ministrus, ba área defeza nasionál no kooperasaun militár. (*)