“Ha’u hanoin katak polítiku sira lalika polizitiza situasaun sira ne'e, ami hatene, ami hanoin katak Governu mós konfia e hanesan baibain ha'u dehan, la'ós ema seluk mak ukun Timor, kaer forsa, ha'u ne'ebé kaer forsa durante 24 anos, agora kaer forsa nafatin, imi tenke fó konfiansa ne'e ba ha'u", dehan Lere hafoin enkontru ho PR Lú Olo iha Palásiu Prezidensiál Bairopite, kuarta (06/10).

Primeiru Ministru, Prezidente Repúblika la'ós kualkér no la'ós joven ida mak Xefe Estadu ka Xefe Governu, maibé tinan 24 ne'ebé fó-an atu Timor-Leste bele ukun-an nomós fó konfiansa nafatin katak laiha intensaun seluk, preokupasaun, hanoin, hakarak mak oinsá povu bele moris hakmatek, no dezenvolvimentu.

Tanba situasaun rai laran di'ak, hothotu preokupa mak liña fronteira, maibé iha planu halo oinsá atubele asegura fronteira ne'ebé bele dehan instituisaun rua mak toma konta, forsa armada ho PNTL, halo oinsá atu servisu hamutuk.

"Governu deside ona sei entrega seguransa fronteira ba forsa armada, maibé hanesan uluk ha'u dehan katak, la'ós ami mesak, maibé ita dehan katak ita kompleta malu entre instituisaun rua ne'e, tantu defeza, seguransa interna, instituisaun rua ne'e sempre kompleta malu”, afirma Lere.

Hanesan, situasaun uluk tinan 2015, situasaun Mauk Moruk nia ne'e podia seguransa interna ka lae, maibé polísia ho F-FDTL hamutuk mak enfreta situasaun ida ne'e.

Antes ne’e, Xefe Estadu Maiór Jenerál FALINTIL Forsa Defeza Timor Leste (F-FDTL), Lere Anan Timur deklara koloka membru F-FDTL iha fronteira mak aban bainrua funu karik fó sala nia. (*)