Membru forsa ne'e envolve asidente iha loron domingu (03/10), maizumenus tuku 12:00 kalan, bainhira konduz hela karreta husi dirasaun Díli ba Baukau.
"Iha ona informasaun hosi sira nia komandu, e agora polisia militár sei halo prosesu atu hatene kauza tan saida maka karreta ne'e soke", Xefe Estadu Maior Falintil-FDTL, Brigadeiru Jenerál Calisto Santos ‘Coliati’, iha kuartel Polisia Militár (PM), Kintál-boot, segunda (04/10).
Tuir loloos membru ne'e simu orientasaun husi komandu Batallaun I Baukau, atu foti karreta iha ofisina (bengkel), lori fila ba servisu fatin.
"Ida lori karreta ne'e, nia kondutor, purtantu nia simu ordém husi komandu atu mai foti karreta iha bengkel, para depois atu lori fila. Agora, atu lori fila oinsá mak hetan dezastre, depois ida ne'e nia sei responde", dehan nia.
Komandante Tránzitu Munisípiu Dili, Inspetór Domingos Sarmento Gama informa, hafoin akontesimentu membru sira Seguransa Rodaviáriu sira to'o kedas inisidente, maibé seidauk rekolla informasaun ruma husi vítima, tanba hetan kanek gráve no oras ne'e halo hela tratamentu iha Hospital Nacional Guido Valadáres (HNGV).
"Ida kondutór mós halo hela tratamentu, maibé ita seidauk foti deklarasaun kona-bá motivu asidente, ne'ebé iha hela prosesu. Depois hetan tratamentu hotu, ita bolu hodi fó deklarasaun kona-bá asidente hirak ne'e", dehan nia.
Karreta ne’ebé hetan asidente ho númeru matrikula F-FDTL 230, kondisaun sira estragu totál dadaun ne’e transporta ona ba Kuratel Jenerál, Fatuhada. (*)
