Tempotimor (Dili) – Deputadu António da Conceição iha audensia komisaun Parlamentu Nasionál nian, Tersa (29/10/19) husu ba Ministru  Transporte no Komunikasaun  (MTK), José Agustino atu promove telekomunikasaun CS Link. Tuir deputadu ne'e, na'in ba telekomunikasaun ne'e timoroan.

"Ita presiza fó oportunidade hodi iha komérsiu livre. Uluk, kuandu iha Timor Telecom de'it, deputadu sira iha ne'e duni mak halo kontra, hodi halo komérsiu livre ne'e. Tanba ne'e, mak ohin iha ona TT, Telemor, Telkomcel. Mas agora rai na'in ida atu halo investimentu ba ida ne'e, ita preokupa fali ninia kapasidade rekursu umanu," dehan deputadu António.

Nia dehan, ita preokupa Timoroan investe iha área ne'e. Maibé la preokupa sira ne'ebé mai lori timor nia osan ba liur.

"Ita preokupa rai na'in ida atu investe iha ne'e. Mas ida ne'ebé mai foti ita nia dolar sai ba liur, ita la preokupa fali. Ita presiza halo sedensia ruma, atu rai na'in mós hahú investe. Nune'e CS Link ne'ebé mak daudaun atu halo kompetisaun iha merkadu, ita fó oportunidade," dehan António.

Tempotimor (Dili) – Partidu Demokrátiku (PD) propoin, hodi ko'a  Orsamentu Jerál Estadu (OJE) 2020 ba Ministériu Edukasaun, Juventude no Desportu (MEJD) no Ministériu Ensino Superiór Siénsia no Kultura (MESSK) %50, tanba konsidera laiha utilidade.

Tuir Prezidente Bankada PD, Antonio da Conceição maske edukasaun ne'e importante tebes, maibé tenke hare'e didi'ak orsamentu. Nia dehan, importante la signifika naran tau osan hodi bele dehan halo ida ne'e no halo ida ne'ebá.

"Iha altura ne'ebá, iha hau nia tempu Ministériu Ensino Superiór seidauk iha. So diresaun de'it mak iha. Maibé, agora fahe ona ministériu rua ne'e ho osan bo'ot. Ami propoin ko'a. Ko'a mais ko'a  maka'as. Hatun ba %50 husi nia pedidu ne'e," dehan Antonio iha Parlamentu Nasionál, Segunda (11/11).

Nia esplika, razaun ko'a tanba laiha utilidade ba osan. VIII Governu ne'e, tuir Antonio esperensia iha ona. Maibé, tau osan la tuir dalan.

“Osan ida $21 milloens ne'ebé mak atu tau de'it ba rehabilitasaun ka konstrusaun sala de aulas, ne'e fatin loloos ida iha transferensia públika, ne'ebé mak agora daudauk Ministeriu Edukasaun, Juventude no Desportu tau hela,” nia hatete.

Tuir deputadu ne'e ninia haree, OJE 2020 ne'e bo'ot la halimar. Tan ne'e, nia sujere hakarak atu ko'a  OJE 2020 ne'ebé aloka ba MEJD ne'e atu tau filafali ba fundu de infrastutura. Ho nune'e, tuir Antonio, kapitál desenvolvimentu bele aumenta no haree katak ida ne'e bele hamosu servisu iha rai laran.

Tempotimor (Dili) – Prezidente Bankada Partidu Demokrátiku (PD), Antonio da Conceição deklara katak durante ne'e liñas ministeriais iha VIII Governu subar ona osan ba iha fundu kontizensia nian.

"Liñas ministeriu sira ne'e iha osan ne'ebé sira subar ne'e barak la halimar. Buat ida naran fundu kontinzensia ne'e, iha governasaun sira uluk ne'e so tau de’it iha dotasaun tudu Governu osan ne'e iha ministeriu finansas," dehan Antonio iha Parlamentu Nasional, Segunda (11/11/19).

Nia hatutan, maibé Governu agora ne'e kada ministériu iha fundu kontinzensia, atuasaun emerjensia ne'e ba tudu Governu, la'ós ministeriu ida hanesan ahi han rai Sekretariu Estadu Ambiente ne'ebé la'ós nia responsabilidade.

Nia responsabilidade mak atu promove fali meiu ambiente. Maibé, atu kuda ai ne'e depois, ida fahe asistensia umanitaria mak ba uluk.

"Solidariedade matan dukur hela la ba halo ida, depois seluk ambiente mak tun uluk ba kuda ai iha tempu ne'ebé la'ós udan ne'e imposivel."

Hatudu katak atuasaun ne'e hanesan arbitrariu loos, laiha asaun kordenada, uma ahi han hela iha Lorosa’e ne'ebá to'o uma lulik sira ne'e, Sekretariu Estadu Kultura nian buka atu hadi'a filafali tan sei fahe osan ne'e laloos.

Kultura ne'e moris husi grupu ne'e rasik mak harii la'ós estadu mak ba harii kultura hodi hola parte ba sistema estadu ninian.

Agora sekretariu estadu tau osan ba ida ne'e de'it buat sabraut barak, ne'ebé ami hanoin osan ne'e se ita bele ko'a sira nia osan ne'e diak liután.

Tinan ne'e sira la'ós halo milagre hanesan Jesus nian fila ikan 2 atu fó han ema rihun ba rihun ne'e la to'o ida ne'e laiha kapasidade.

Tempotimor (Dili) – Partidu Dermokrátika iha Parlamentu Nasionál husu Governu no Estadu atu dignifika povu Timor-Leste nia sakrifísiu iha loron Konsulta Populár ne’ebé sei selebra ba dala ruanolu.
 
“Povu Timor-Leste atu selebra loron 30 Agostu, tinan ruanolu referendu iha Timor-Leste. Ita hotu sei hanoin ho neon fresku referendum ne’e nia objetivu no oinsa mak ita realiza referendum,” hatete Prezidente Bankada Demokrátika, António da Conceição, Tersa (13/08/2019) iha Parlamentu Nasionál. 
 
Tuir Antonio, iha momentu ne'ebá, iha duni opsaun ne’ebé Timoroan sira hili liuhosi dalan Unidade Nasionál no mobiliza povu hodi fó desizaun polítika, hodi hasai duni povu husi okupasaun militár Indonézia nian. Deputadu ne’e mós afirma, TL hetan nia ukun rasik an, tanba povu nia kontribuisaun no vontade boot.
 
“Ita konsege independensia, tanba vontade povu nian. Bankada PD iha uma fukun ida ne’e, husu atu polítika sira dignifika povu nia sakrifísiu hodi hala’o selebrasaun ida ne’e, la'ós de’it serimoniá komemorativa. Maibé, sai eventu ida atu dignifika povu nia determinasaun, eroi no mártires sira nia luta no sakrifísiu hodi fó sentidu kle'an ba ukun rasik an nian, ne'ebé ema hotu inspira dezenvolvimentu,” tenik António.

PD Afavór Ba TFM

July 17, 2019

Tempotimor (Dili): Bankada Demokrátika iha Parlamentu Nasionál (PN) promete sei fó votus afavór ba ratifikasaun Tratadu Fronteira Marítima (TFM) liuhusi proposta lei haat ne'ebé durante loron rua (16-17 Jullu 2019) aprezenta iha PN. 

"Ami nia votu mak ne'e. Ba buat ne'ebé partikular ne'e ita sei deskute. Mas ba povu tomak ninian ne'e, ita nunka se bele deskute," hatete Prezidente Bankada PD, António da Conceição iha PN, Kuarta (17/07/2019). 

Deputadu ne'e dehan, partidu eziste atu defende interese ema barak nian, la'ós grupu balun nian. 

"Se ha'u mak hari'i partidu ida, hodi hanoin de'it ba grupu, ha'u mós husu ba povu lalika vota ba ami. Maibé, ami fó ami nia votus afavór tanba kestaun ida ne'ebé mak ko'alia kona-ba fronteira marítima ne'e la'os interese grupu nian. Ne'e problema povu ida ne'e nian no sira ne'ebé aban bainrua sei moris mai nian. Ne'ebé ita lalika deskute buat ne'e," António hatete. 

Tuir deputadu ne'e, maske leis hirak ne'e imposivel atu deskute hotu iha loron rua nia laran, maibé importante haree ba prinsipiu jerais lei ne'e, atu benefisia ba se.

Tempotimor (Dili) – Bankada opozisaun iha Parlamentu Nasionál (PN), konsidera Orsamentu Jerál Estadu (OJE) 2020, boot tebes no pela primeira vez hakerek iha istória Timor-Leste nian. Alende ne'e, OJE 2020 laiha profesionalidade. Tan ne'e, sei la fó impaktu ba ekonomia nasionál.

“Orsamentu ne'e boot tebes. Ida ne'e, pertama kali tercatat iha sejarah ukun Timor nian,” deklara Prezidente Bankada Partidu Demokrátiku (PD), Antonio da Conceição iha Parlamentu Nasionál, Segunda (11/11/19).

Antonio dehan, bele tau osan bo'ot. Maibé, laiha kapasidade ezekuta mak sai problema. Ezekuta, tuir nia hanoin, la'ós liga de'it atu gasta. Maibé, aliñamentu ba prioridade.

“Ita sente dehan atividade exportasaun laiha no halo komparasaun ho importasaun ne'ebé bo'ot tebes. Entaun, tenke hare'e para dezenvolve ona agrikultura. Atu nune'e, bele redus atividade importasaun,” nia esplika.

Populasaun, tuir Antonio, halerik hela de'it tanbá sira-nia sasan la folin. Maibé, sasán husi rai liur kontinua tama mai rai-laran. “Presiza halo aliñamentu ba prioridade orsamentu ne'e, tuir dadus nasionál nian,” nia sujere.

Iha fatin hanesan, Vise Prezidente Bankada FRETILIN, Francisco Miranda Branco rekoñese, montante OJE 2020 bo'ot. Maibé, la determina ekonomia rai-laran. Katak, la fó impaktu ba ekonomia nasionál nian.

"Ami hare'e hotu situasaun hirak ne'e. Katak, orsamentu ida ne'ebé laiha profesionalidade. Ninia alokasaun ba liu bens de servisu, hodi sosa sasán," hatete Francisco Branco.

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com