Sekretáriu jerál PD António da Conceição "Kalohan", hateten, PR nafatin sura ho Partidu Demokratiku ninia atuasaun polítika iha Parlamentu Nasionál atu bele nafatin dignifika povu nia terus, lori dezenvolvimentu ba rai ida ne’e.
Iha okaziaun ne’e Deputadu Kalohan hateten katak, kona-ba PD atu hola parte iha governu bainhira mosu remodelasaun, PD laiha kbiit hodi ko'alia.
"Ami laiha kbiit atu ko'alia kona-ba asuntu ne’e, tanba la'ós kestaun Partidu Demokratiku nian, maibé kestaun governu no estadu nian. Karik oportunidade remodelasaun iha, maibé seidauk iha informasaun formál ne’ebé ko'alia iha partidu ida ne’e," Kalohan hateten ba jornalista hafoin haosru malu ho xefe estadu iha palasiu prezidensial Bairrupite, Tersa (05/01).
Nia mós afirma, PD fó ona votu ba OJE ne’ebé hanesan raan ba nasaun nian, entaun PD nia pozisaun klaru ona.
"Ami afirma tiha ona ami-nia pozisaun ba saida mak di'ak ba rai ida ne’e, ita boot sira la bele antesipasaun remodelasaun tanba ne’e kompetensia Primeriu Ministru nian,” António subliña.(*)