"Ha'u sai hanesan arguidu iha tribunál, atu hatán kona-bá kazu sosa indústria iha tinan 2014," dehan nia iha Parlamentu Nasional, kuarta (27/1).

Deputadu António da Conceição loloos hatán iha tribunál iha loron 14 janeiru 2021, seidauk bele hatán tanba PN seidauk halo levantamentu ba imunidade.

Nia rekoñese sai arguidu ba kazu partisipasaun ekonómuka bainhira asume kargu Ministru Komérsiu Indústria no Ambiente (MKIA) iha 2014.

Nia dehan, kazu administrasaun danoza ne'e kestaun jestaun ninian maibé nia sente presaun tanba ema hotu ko'alia maibé nia la sente presaun tanba la'ós nia mak direitamente prátika ba kazu refere.

"Ha'u hein no prontu hela atu ba (hatán), ne'ebé hanesan polítiku, hanesan ema ida-ne'ebé hola tiha ona responsabilidade ba estadu, sé buat ruma laloos tenke ba hatán, ne'e normál ba sidadaun hotu-hotu," Deputadu António da Conceição informa ba jornalista sira iha resintu Parlamentu Nasionál, kuarta ne'e.

Nia esplika sai arguidu ba kompra ekipamentu iha diresaun indústria nian iha 2014.

Nia haktuir, diresaun Aprovizionamentu no Lojístika iha MKIA mak simu sasán.

"Bainhira nia mai dehan ba ministru katak sasan simu ona, ita boot (ministru) asina pagamentu no ida-ne'e mak ha'u-nia responsabilidade fasilita. Sé ha'u la asina entaun husik tusan ba tinan oin. Ne'e hanesan ha'u tau problema ida ba estadu, enkuantu osan iha hela la gasta. Sé ha'u la asina mós trava ona kompañia ida-ne'ebé gosta nia osan ba sosa sasán," hateten Eis MKIA ne'e.

Nia parte prontu ba hatán iha tribunál bainhira PN aprova ona levantamentu imunidade.

Tuir informasaun ne’ebé www.tempotimor.com asesu, prosesu ne’e rejista iha Ministeriu Públiku ho númeru NUC 0075/17PGGCC, dedus akuzasaun inklui husu julgamentu iha intervensaun Tribunál koletivu, tuir artigu 236 no 14 hosi kódigu prosesu penál.

Ho ida ne'e, notifikasaun ba arguidu/a na’in-lima ho inisiál ADC, JIB, GPSC, nu’udar kargu xefia iha Ministériu Komérsiu Indústria no Ambiente (MCIA), PMCSV nu’udar Diretór hosi kompañia ida no arguidu António da Conceição nu’udar Ministru MCIA.

Faktu ne’ebé arrola hosi MP katak iha tinan 2014, MCIA iha osan atu sosa ekipamentu diversu hosi orsamentu kapitál menór ho montante global $200,000.00.

Hafoin ne’e MCIA loke konkursu públiku kompañia Kninuk Star Unipessoal Lda, sai vensedór hodi asina kontratu ho MCIA ho montante global $191,000.00, ne’ebé ikus mai Tezouru Ministériu Finansas halo pagamentu ho montante refere ba kompañia, maske iha realidade ekipamentu laboratóriu indústria sira refere, kompañia foin fornese mai iha MCIA, iha fevereiru 2015, fulan-rua depois halo tiha pagamentu, maske nune’e, ekipamentu sira kompañia hatama la kompletu to’o novembru 2015, hodi prejudika ekipamentu sira balun labele funsiona, no la utiliza to’o agora, hodi hamosu prejuizu ba Estadu Timor-Leste ho valor $143,500.00.

MP akuza arguidu/a sira ho krime pekulatu ne‘ebé previstu no punidu hosi art. 295 n° 1, krime partisipasaun ekonomia iha negósiu no administrasaun danoza, ne’ebé previstu no punidu hosi art. 299 n°. 2, no art. 274 n°. 2, krime burla agravadu, falsifikasaun dokumentu, ne’ebé previstu no punidu hosi art. 266 no 267 n°. 1, art. 274 n° 2 no art. 303, hotu-hotu hosi kódigu penál Timor-Leste. (*)