Deputadu António da Conceição hato'o ezijénsia ne'e hafoin partisipa iha debate espesialidade dahuluk ba proposta Orsamentu Jeral Estadu (OJE) 2021.

"Ha’u husu atu ministru ne'e, tenki revoga ninia liafuan ida fokit manu fulun ne'e," nia dehan.

Nia parte lamenta tebes ba liafuan fokit manu fulun ne'ebé hasai husi ministru ne’e no konsidera juventude sira ne'ebé ba servisu rai liur ida ne'e hatudu katak sira kontribui ba empregu, ne'e duni membru governu tenke orgullu, la’os prega fali liafuan ne’ebé la merese ba sira.

Nia haktuir, proposta orsamentu 2021 ne'ebé aposta husi membru governu sira, daudaun tama ona debate espesialidade ne'ebé sita ho asuntu barak, ligadu ba kestoens juventude, no empregu.

Deputadu ne’e husu ministru ne'e atu defende joven sira ne'ebé kria ona emprega ba sira nian, sira oferese aan ba rai liur tanba Timor seidauk iha kondisaun kona-ba ida ne'e.

Antes ne’e Ministru Agrikultura no Peska Pedro dos Reis hateten, do que ba fokit manu fulun iha rai liur, diak liu fila ba foho hodi servisu toos no natar tanba rai mamuk barak abandonadu. (*)