“Iha 2022 kandidatu ba Prezidente Repúblika iha kedas kandidatu 17, liu de'it 16, ha'u atu moe, bainhira ha’u haree balun halo ona akordu atu fahe malu subsídiu, la'e la'ós dehan atu manán, subsídiu ne'e mak atu fahe, o nia persentajen hira e ha'u-nia hira”, dehan Alkatiri hafoin partisipa Kongressu Juventude Fretilin (JF) iha CCD, Kaikoli, sesta (18/02).

Ba aktu ne'e, Alkatiri sente moe tanba ema ne'ebé pozisaun másimu iha Timor-Leste bele hamosu fali aktu refere.

“Hau moe, ne'e balun, e balun fali atu la'o mesak labele, ba tau foto grafia maromak nian iha kotuk, atu la'o vota ba sé. Ha'u kompriende, ida mak lori mala ho pasta de'it, ida mak komandan, ha’u kompriende, se mak komandan nafatin foto grafia iha ne'eba, ida seluk ne'e atu lori pasta de'it, nia mak dehan de'it, ha’u moe, prontu de'it ne'e ha’u moe, halo nusa mak sobrevivente balun hanesan jerasaun bele laiha dignidade hanesan ne'e”, hatete nia.

Ho situasaun ne'e, Alkatiri dehan, tohar bele tohar maibé atu dehan hakru'uk nia sei la hakruuk inklui mós sei la haksoit ba karuk ka haksoit ba loos hodi haksoit ba buka fatin.

“Tanba ne'e ema balun dehan, balun agora dehan tanba ha'u la fakar rán, balun uluk dehan ho biru de'it ha'u forti duni, ida ne'e duni mak uluk ko’alia hanesan ne'e, e ha’u-nia biru ne'e kala forti duni, halo nusa mak ha’u sei moris”, dehan Alkatiri.

Tanba biru ne'ebé sei haforsa Alkatiri mak juventude Fretilin no militante sira, kuandu iha tempu ida nia monu, mak juventude Fretilin mak okupa fali nia fatin. (*)