“Ami Juventude Aileba-oan, kompostu husi Aldeia 4 ne’ebé iha Suku Tibar, nu’udar grupu independente ida ne’ebé la inklina ba organizasaun no partidu politiku ruma, deklara hodi rai lulik Timor-Leste nia naran katak, ami prontu fó apoiu másimu ba Kandidatu Prezidente Repúblika Premiadu Nobel da Paz Dr. José Ramos Horta ba Prezidente Republika ba períodu 2022 to 2027”, dehan Portavoz GJAO, Paulina Tanec da Silva, iha Aldeia Turuleu, Suku Tibar, sábadu (19/02).

Grupu Juventude sira ne’e konsidera Xanana no Ramos Horta mak bele hadi'a problema nasaun nian hodi hadi'a hikas ben estar povu no nasaun inklui dezenvolve no hadi'a ekonómia Timor-Leste nian.

Tanba durante povu Timor-Leste sofre terus no hasoru dezastre oioin, Xanana no Ramos Horta sempre tun direita hodi fó apoiu ba vítima sira.

Tanba ne'e, Juventude Aileba Oan fiar katak Premiadu Nobel da Paz José Ramos Horta iha pezu politiku atubele rezolve problema interna liliu atubele influénsia Governu, nune’e bele hadi’a ekonomia povu no garantia estabilidade politika no seguransa iha rai laran. 

Tanba kandididatura José Ramos Horta rasik hetan ona apoiu másimu husi Kay Rala Xanana Gumão hamutuk ho Partido CNRT no partidu politiku sira seluk, inklui grupu apoiante oioin.

“Ami mós deposita ami-nia konfiansa tomak ba José Ramos Horta ne’ebé koñesidu iha Mundu atubele promove no rekupera hikas imajen Timor-Leste nin iha nível rejionál no internasionál ne’ebé foer ona durante tinan tolu (3) ikus ne’e”, hatete nia.

Koordenadór Juventude Aileba-Oan Tibar, Plasido Pereira hatete, sira pozisaun fó apoiu tomak ba Kandidtura José Ramos Horta tanba povu Timor-Leste presiza figura ida ne'ebé mak lori povu no nasaun ba oin.

Ho ida ne'e, Grupu juventude aileba oan iha Tibar sei kontinua servisu maka’as hodi sosializa informasaun ba populasaun iha Tibar esplika lista kandidatu Prezidente José Ramos Horta ho númeru surteiu 14 ne’ebé Tribunál Rekursu fó sai ona. (*)