"Ita dadaun ne'e akompaña hela, primeiru hakarak identifika sé mak husik sira ba, i sira ba ne’e iha kontratu ruma ka la'o naran de'it, no saida mak ita bele ajuda," dehan PM Taur iha Palásiu Prezidensiál, Bairo-Pite, Kinta (06/10). 

Xefe governu ne’e hatutan, maske iha ona pontu tolu ne'ebé governu kria atu identifika situasaun refere, maibé governu husu nafatin joven sira atu pasiensia oituan. Tanba públiku tomak hatene, nasaun ne'ebé estadu no governu laiha akordu, ne'e komplikadu oituan.

"Iha nasaun ne'ebé iha akordu ne'e mós ita tuir prosesu ida, sa tán ida ne'ebé laiha akordu. Ita agora iha akordu mak Austrália, ho Korea Súl ne'e de'it, restu ne'e ita tenta para hetan akordu, para ba saida, asegura direitu regalias, previleizu, ne'ebé ita-nia sidadaun sira iha direitu," Taur esklarese.

Kualker nasaun ne'ebé timoroan ba, se akordu laiha, maka protesaun ba sidadaun sira mós sei laiha, tanba governu ho governu seidauk kria akordu.

“Ne'e duni, bainhira sidadaun ba nasaun ne'ebe laiha akordu ho governu, signifika ne’e inisiativa sidadaun nian, tanba iha lei mós hatete, kuandu sidadaun ne'ebé deside aan ba estranjeiru ne'e, nia rasik mak sei responsabiliza ba ninia-an totálmente los ka la'e, ne'e ita-nia problema mak ida-ne'e," Nia dehan.

Maibé nia parte kontinua buka dalan, tanba situasaun ne'e sai mós deskusaun iha reuaniun semanál ho entre Prezidente Repúblika no Primeiru-Minsitru, tanba xefe estadu mós haree kazu ne'e no sente triste i preokupadu.(*)