Reprezentante Ekipa Susesu kandidatura Lú Olo, Fernando Dias Gusmão hatete, iha loron segunda (31/01) husi ekipa Francisco Guterres 'Lú Olo' lori ona dokumentu ba rejistu kandidatura iha Tribunál Rekursu.
"Ami husi ekipa Francisco Guterres 'Lú Olo' ninian ami lori mai rejista ona ninia kandidatura e husi Tribunál Rekursu sira dehan dokumentu ne'ebé ami aprezenta maizomenus tuir ona lei ba eleisaun Prezidente Repúblika, e primeiru ami lori karta aseitasaun husi kandidatu ninian, segundu karta dezignasaun ninia reprezentante no teriseiru ami lori dokumentu komprovativu lista asinatira no kartaun eleitorál husi sidadaun rihun-sia (9.000)", dehan Fernando Gusmão iha Edifísiu Tribunál Rekursu, Kaikoli, segunda (31/01).
Rejistu ho sidadaun 9.000 (rihun-sia) tanba ekipa hakarak ajuda Tribunál Rekursu halo verifikasuan ne'ebé lalais liu, maibé dokumentu ne'ebé povu tomak entrega ba FRETILIN hamutuk rihun-atus-ida-ruanulu-resin-lima (125.000).
Maibé ekipa Susesu sira lori apoiante hamutuk rihun-50, aprezenta de’it rihun-9 no iha rihun-40-resin ne’ebé lori fila husi lista apoiante ne’ebé eskipa rekolla hamutuk 125.000.
"Ikus liu atu hatete katak, Prezidente Fransisco Guterres 'Lú Olo' rekandidata-an no nia prontu atu kompete iha eleisaun ne'ebé mai dadauk", deklara nia.
Entrentantu, Francisco Maria de Vasconcelhos hatete, Kandidatura Prezidente Repúblika sente konfortavel hodi kompete ho kandidatura sira seluk.
"Prezidente sente konfiente e konfortavel atu kompete e prontu atu manán”, afirma nia.
Enkuantu, Tribunál Rekursu dadaun ne’e rejistu ona Kandidatura hamutuk na'in-9 hanesan, Kandidatura independente Angela Freitas, Felisberto Araújo Duarte, Milena Píres, Hermes da Rosa Correia Barros Isabel Ferreira, no kandidatura husi partidu mak José Ramos Horta husi partidu Congresso Nacionál de Reconstrução de Timor (CNRT), Armanda Berta Husi Partidu KHUNTO, no Fransisco Guterres 'Lú Olo' independente ne’ebé hetan apoiu husi Frenti Revolusionáriu de Timor-Leste Independente (FRETILIN) no Partidu sira seluk inklui individual balun. (*)
