"Ha'u kandidata-an ba Prezidente Repúblika, ha’u lori veteranu e rejisténsia tomak ninia naran, ne'e para ha’u kompete”, dehan Lere hafoin deklara ninia Kandidatura iha Pantai Kelapa, sesta (29/01).

Maske, la'ós Kandidatura husi partidu Fretilin, maibé Lere sei la ba partidu seluk tuir nia konviksaun ne’ebé iha, tanba uluk família mate mohu ba Fretilin, povu barak mate ba Fretilin, no nia rán rasik fakar ba Fretilin.

"Agora ha’u hanoin katak iha ne'e la'ós Fretilin de'it, la'os partidu laiha de'it, mais iha nene partidu oioin de'it, CNRT mós mai, KHUNTO mós mai, PLP mós mai, PD mós mai, os Verdes mós mai, eh ne'e partidu oioin. Jerasaun Patriota, organizasaun kladestina, Frente kladestina, Santu Antonio, Haburas, CPD/RDTL, ema ne'e FRETILIN maibé ema lakohi bolu, mais ha’u sei ba bolu, bá?. ita ba hamutuk”, esplika nia.

Husi apoiante ne’ebé ekipa susesu husi kandidatura Lere Anan Timur rekolla kuaze rihun 20 ona, tanba ne’e aprezenta dokumentu ba Tribunál Rekursu konpeténsia ekipa juri mak hatene.

Iha loron 28 janeiru 2022, Prezidente Repúblika (PR), Francisco Guterres 'Lú Olo' ofisialmente ezonera ona Tenente Jenerál Tito da Costa Cristovão ‘Lere Anan Timur’ husi kargu Xefe Estadu- Maior-Jenerál Forsa-Falintil Defeza Timor-Leste (F-FDTL) no promove Major-Jenerál Domingos Raul ‘Falur Rate Laek’ ba postu Tenente-Jenerál.

“Prezidente Repúblika, Francisco Guterres 'Lú Olo' liuhusi Dekretu Prezidente Repúblika númeru 4/2022, 28 janeiru, 5/2022 no 6/2022, ezonera Tenente Jenerál Tito da Costa Cristovão ‘Lere Anan Timur’ husi kargu Xefe Estadu-Maior-Jenerál Lere Anan Timur, promove Major-General Domingos Raul ‘Falur Rate Laek’ ba postu Tenente-Jenerál no nomea Tenente Jenerál Falur Rate Laek ba kargu Xefe Estadu-Maior-Jenerál Forsas Armadas”, dehan Komunikadu Imprensa ne'ebé www.tempotimor.com asesu sesta (28/01).

Tanba iha 21 janeiru 2022, Governu liuhusi reuniaun Konsellu Ministru deside prosesu ne’ebé mai husi desizaun reuniaun Konsellu Superior Defeza Militar hodi trata pedidu ezonerasaun Tenente-Jenerál Tito da Costa Cristovão Lere Anan Timur husi kargu Xefe Estadu-Maior Jenerál Forsas Armadas, promosaun no nomeasaun Xefe Estadu Maior Jenerál Forsas Armadas. 

Bazeia ba proposta husi Governu, iha 27 janeiru, Prezidente Repúblika rona hanoin sira husi Konsellu Superior Defeza no Seguransa  kona-ba ezonerasaun no nomeasaun, tuir artigu 86 alinea m) Konstituisaun Repúblika Demokrátika Timor-Leste dekreta ezonerasaun Tenente-Jenerál Lere Anan Timur husi nia kargu Xefe Estadu-Maior-Jenerál Forsas Armadas no nomea Tenente Jenerál Falur Rate Laek ba kargu Xefe Estadu-Maior-Jenerál.

Ezonerasaun ba kargu Xefe Estadu Maior Jenerál Forsas Armadas no bazeia ba prosedimentus no kondisaun sira defini kona-ba promosaun altas xefias militares tuir Novo Estatutos Militares das FALINTIL-Forças de Defesa de Timor-Leste (F-FDTL) no tuir desizaun Konsellu Ministru ba promosaun Major-Jenerál Domingos Raul Falur Rate Laek, Prezidente Repúblika promove Falur Rate Laek ne’ebé ezerse kargu nu’udar Vise-Xefe Estado-Maior-Jenerál ba Tenente-Jenerál. (*)