“Regra sira ne'e mak hanesan, primeiru mak husu lisensa espesiál sem vensimentu ba sira ne'ebé mak sai kandidatu ba eleisaun prezidensiál, segundu, lisensa sem vencimento maibé ba sira ne'ebé hakarak partisipa sai nu'udar ekipa team susesu ne'e presiza halo karta lisensa sem vencimento”, dehan Komisáriu Faustino Cardoso ba jornalista sira iha palásiu Governu, tersa (25/01)
Lisensa sem vencimento ne'e atu iha klareza, iha akompaña eleisaun Prezidensiál no Eleisaun Parlamentár, ne'ebé mós sei sei realiza iha tinan 2023 mai.
“Hodi hatene katak, funsionáriu ne'ebá ne'e kumpri ona prosedimentu hodi kompete polítika sira ne'ebé la'o iha ámbitu eleisaun prezidensiál" afirma nia.
Bainhira Funsionáriu Públiku ba partisipa atividade iha eleisaun prezidensiál laiha karta lisensa, tama iha kategória infrasaun disiplinár, no sei prosesa funsionáriu refere tuir prosesu disiplinár ne'ebé iha, hanesan akontese ona iha tinan hirak liubá.
“Ami enkoraza, funsionáriu públiku sira, buka sai ezemplár, ho maneira husu lisensa, bainhira hakarak ativamente partisipa iha eventu polítiku sira tantu sira-nia kandidatu nune'e mós sai ekipa avansadu ba prosesu kandidatura sira”, deklara nia. (*)