Tuir informasaun ne’ebé www.tempotimor.com, asesu iha pájina MTKI, segunda (08/08) katak, Prezidente Komisaun Funsaun Públika, Faustino Cardoso hatete, objetivu enkontru kontinuasaun ho liña ministériál hanesan MTCI, IGE.IP, CNC, MAE, iha ámbitu komerasaun loron nasionál funsaun públika nian ba dala-ualu, ne’ebé mak komemora tiha iha dia 15 de jullu 2022, maibé atividade jornada la’o tuir ain fatin ne’e seidauk realiza, ho nune’e mak enkontru ho liña ministeriál atu partilla ba malu progresu planu loke Estrada, no konstrusaun monomentu saudozu Nicolau dos Reis Lobato iha suku Ermori.

Vise-Ministra Turizmu Komunitária Kultural, Inácia da Conceição Teixeira hatete, husi parte Ministériu Turizmu Komérsiu Indústria (MTKI) sei apoiu iha konstrusaun monomentu Saudozu Nicolau dos Reis Lobato bazeia ba proposta ne’ebé mak Centru Nasionál Chega (CNC) hatama ona iha Gabinete Ministériu Turizmu.

Enkontru ne’e partisipa husi Prezidente Autoridade Munisípiu Dili, Guilhermina Filomena Saldanha Ribeiro, Prezidente Konsellu Administrasaun, Instituto de Gestão de Equipamentos (IGE) I.P, Ermenegilda da Costa Laurentina, Ekipa husi Centru Nasionál Chega (CNC) no Reprezentante Ministériu Administrasaun Estatal, autoridade lokál husi Suku Ermori. (*)