"Seidauk tan to’o tempo ha'u atu dehan katak ha'u prontu atu kandidata-an. Tanba seidauk to’o tempu, até prezidente mós seidauk ko'alia buat ida, so kuandu PR dekreta ona dehan katak ha'u to’o ona iha momentu ida que ha'u sei kandidata ka la kandidata-an, depois mak ha'u sei anúnsia fali”, dehan Jenerál Lere, iha Kuartel Jenerál Fatuhada, kinta (06/01).

Maske apoiu iha baze hahú ona halo deklarasaun públiku, maibé ne'e la'ós problema ba nia, tanba desizaun ne’ebé sei fó sai hafoin rona loron eleisaun.

"Sim, maske kona-ba apoiu iha baze ne'e hahú ona, maibé ida ne'e la'ós ha'u-nia problema”, dehan nia.

Aleinde ne'e mós, kona-ba prosesa rezignasaun bainhira prontu atu kandidata-an sei la'o tuir estatutu lei forsa armada nia.

"Kona ba prosesu rezignasaun, ita dehan katak forsa armada ninia estatutu no ninia lei ne'e la'ós servisu militár obrigatóriu, ida ne'e dehan kontratadu, voluntáriu, nune'e militár ida sai iha qualquer momentu tuir nia hakarak, hodi halo requerimentu ba rezignasaun ninian”, esplika nia

Maibé kazu Xefe Estadu Maior Jenerál F-FDTL nia ne'e la hanesan ho militare baibain, tanba ne’e labele husi fatin mamuk no hein desizaun konsellu Superior militar hafoin konsellu Ministru popoin, maibé desizaun ikus husi Prezidente Repúblika.

“Kazu ha'u-nia, ha'u nu'udar Xefe Estadu Maior Jenerál F-FDTL, labele husik fatin ne'e mamuk, entaun ita preve buat sira ne'e hotu, bainhira ha'u hakarak sai, Primeiru tenke iha reuniaun konsellu Superior militár, ne'ebé ha'u halo proposta ba Ministériu Defeza, Ministériu Defeza bazeia ba ha'u-nia proposta ba kandidata sira ne'ebé ba ne'e, ami realiza reuniaun konsellu Superior militár depois ida ne'e mak ho relatóriu ho ata haruka ba Konsellu Ministru, depois ne'ebá ne'e sira konkorda ka la konkorda sira haruka proposta ne'e ba Prezidente, tanba prezidente mak iha kompeténsia nomeia e Ezonera, ida ne'e mak prosesu tuir lei militár nia”, esplika Lere. (*)