“Maun boot Xanana ne’e moe laiha. Uja boiña mean. Agora nain rua hotu tau boiña mean halai hamutuk, se mak moe laiha ona. Depois sira tau tiha boiña mean sira nia anak buah sira nia hakarak ne’e ha’u tenke tau duni sapeo metan. Labele kahur sasan,” hatete Alkatiri liu hosi nia diskursu ida iha Lospalos foin lalais.

"Komando da luta uluk ita hotu respeitu, uluk komando da luta uluk komanda ita hotu. Ami be sai ba liur, ami sempre dehan komando da luta tenke iha rai laran, no tenke iha frente armada. Ami rekoñese. Nunka hakarak atu transfere komando da luta ba liur. Ami rejeita. Tanba ne’e to’o mai tempu Taur Matan Ruak nian mós ami rekoñese nafatin komando da luta iha laran,” esplika Alkatiri.

 

Maske nune’e, Alkatiri fiar katak katak eleisaun sei la’o di’ak, sei laiha problema tanba laiha ema ida hakarak halo a’at rai ida ne’e.

 “Se mak hakarak halo a’at, ita nia historia hatudu ona bainhira iha ema ida atu halo a’at ita, ita sei hamutuk hotu atu defende povu ida ne’e, atu defende rai ida ne’e,” garante Alkatiri.

Hatan ba deklarasaun ne’e, portavoz ba Aliansa Mudansa ba Progresu (AMP) atual prezidente Partidu Libertasaun Popular (PLP), Taur Matan Ruak katak, se komando da luta mak la iha, Timor mós la iha, veteranu la iha, sira mós la iha.

“Maun Mari nia la mai tan, tanba nia iha tiha Moçambique ne’eba. Komando la iha ne’e oinsá? Ne’e hanesan oan karik oan moris, maibé inan – aman la iha. Ne’e kulat mak hanesan ne’e. Ema ida tenke iha inan – aman, nega inan – aman ne’e kulat,” responde Matan Ruak.

Matan Ruak mós responde ba Alkatiri ne’ebé konsidera Xanana ho Matan Ruak nu’udar eskoltu ba Naimori katak, entre nia ho Xanana konsidera joven sira ne’ebé tama iha grupu arte marsiais sira nu’udar sira nia oan hotu.

“Ba ami nain rua, ne’e laiha, ami nia oan hotu. KHUNTO ne’e partidu ida. Orgullu loos. PLP iha lider ida historiku. CNRT iha lider ida historiku. Sira la lori naran. Lori sira nia aan duni mak hetan iha povu, ne’e orgullu,” esplika Matan Ruak.

“Sira mak loloos la moe ho PLP no CNRT, no KHUNTO. Imi ka’er historia mak ema fiar imi. Ami la’e, fiar ami nia aan”.

Tanba ne’e, Matan Ruak katak sira nain rua serbisu ho sira tanba partidu, maibé Korka, Kera Sakti, SH, Bua Malus, 77, 55 sira nain rua nia oan hotu.

“Ami nain rua la haketan ida. Só aman mau pagador mak kous oan ba soe tiha ba mota. Ami nain rua nian laiha. Ami nia oan hotu”. (Oki)